ISAI 66 - Pathien Lekhabu Inthieng (BSI)

Lalpa rorêlnahai le Zion hung phuiinsuina ding chu

¹ Lalpa chun hieng ang hin a tih, “Vân ka ṭhungpha a na, hnuoi ka ke innghatna a nih; in ieng ang am in mi bâwlpêk ding a na? Khâwlai hmun am a na ka châwlna ding chu?

² Hieng thil iengkim hi ka kutin ka siem a ni si a, chuongchun, hieng thil iengkim hi a hung um tah a nih, Lalpain a tih; amiruokchu, hi mi rimsitaka um, lungrila insîr ngawi ngawi, ka thua inthin hlaktu tieng hi en lem ka tih.

³ Bâwngchal thattu chu mihriem thattu ang a na; berâmtea inthâwitu chu ui rîng suktliektu ang a nih; thilpêk inhlântu chu vawk thisen inhlântu ang a nih; beraw rawtu chu milim malsâwmtu ang a nih, anih, anni lampui chu an thlang ta a, an thil tirdakumahai chun an lungril a lâwm hlak.

⁴ Ka ko lai khan tukhawma an mi dawn naw a, thu ka hril lai khan nain an hriet naw a, ka mithmua thil suol chu an thaw lem a, ka thil lâwm naw zâwng chu an thlang leiin kei khawmin anni hlêmna ding chu thlangpêk ka ta, an ṭi zâwnghai chu an chungah intlungtir ka tih,” tiin.

⁵ A thua inthin hlakhai, Lalpa thu hi hre ro, “In unau, nangni theidatu le ka hming leia nangni hnawt suoktuhai cheu chun, ‘In lâwmna kan hmu theina dingin Lalpa chu sukropuiin um raw se,’ an ti a, nisienlakhawm, inzak lem tâng an tih.

⁶ Ngai ro, khawpuia sa mur mur ri chu! biek ina ri a ni chu! a hmêlmahai thungtu Lalpa ri a ni chu!

⁷ Ama chun invawi hman lovin nau a nei a; na hre hman lovin naupasal a nei a.

⁸ Chuong ang chu tuin am a hriet hlak a? Chuong ang chu tuin am a hmu hlak a? Ni khatah ram a pieng thut dîm a nih? Vawilekhatah hnam a pieng thut dîm a nih? Zion chun nauhase ân vawi phing chun nau chu a nei el ta si a.

⁹ Pieng hun intlungtir siin kân neitir naw ding a ni? Lalpain a tih; kei inneitir hlaktu hin nau kân neitir phal naw ding am a nih? i Pathienin a tih.

¹⁰ “Jerusalem hmangaitu po pohai, Jerusalem chu hlimpui unla, lâwmpui ro; ama sûntu po pohai, lâwm leiin hlimpui ro;

¹¹ in nêk, a thlamuongna nêneahai chun in tlai theina ding le, in nêk daa, a ropuina tamtaka chun in lâwm theina dingin,” ti hi.

¹² Lalpa chun hieng ang hin a ti si a, “Ngai ta u, inremna chu vadungpui ang elin a kuom chenin inluongtir ka ta, hnam tin ropuina chu vadungtê a kuong liem dûl dûl angin a kuom tlungin inluongtir bawk ka tih, chuongchun, chu chu nêng in tih; hmathlâk a ti cheu a, a khûp chunga chun inchâwmtir a ti cheu.

¹³ Mi, a nuin a thlamuon angin thlamuon ka ti cheu a, chuongchun, Jerusalema chun thlamuonin in um ding a nih.

¹⁴ Chun, chu chu hmûng in ta, in lungril chu hlim a ta, in ruhai khawm hlohna hring dup angin inno hlut hlut a tih; chuongchun, Lalpa kut chu a siehlawhai tieng a um ti hrieng an ta, a hmêlmahai chunga chun lungni naw ni.

¹⁵ Ngai ta u, a lunginsenna chu hrîkthla ding le, a kâwkna chu meichawkhaia hrîkthla dingin, Lalpa chu mei leh a hung ding a ni si a, a tawlailîrhai chu thlivir ang el nîng a tih.

¹⁶ Meiin a nih Lalpain a ngaituo ding chu, a kâwlhnâmin a nih mi po po a ngaituo ding chu; chuongchun, Lalpa isukhlumhai chu tamtak nîng an tih.

¹⁷ Huonahai chun an fe a, a laia mi hnunga um nghien dinga insukthieng le insukfai hlakhai, vawk sa le thil tirdakum le mazu fa chu bohmang tâwl an tih; Lalpain a tih.

¹⁸ An thilthawhai le an ngaituohai chu ka hriet si a; hnam tinrêng le ṭawng tinrêng ka ṭhuoi khâwm hun a la hung tlung ding a nih; chuongchun, hung an ta, ka ropuina hmûng an tih.

¹⁹ Chun, anni lai chun inchikna inumtir ka ta, chuongchun, anni laia hremna khêltuhai taphawt chu hnam tin kuomah Tarsis dâm, Pul dâm, thalngul kuoihai Lud kuoma dâm, Tubal le Javan mihai dâm, thlierkâr hlatak, ka hminginthang la hre ngai lova ka ropuina la hmu ngai lohai kuoma chun tir ka tih; chuongchun, hnam tin lai chun ka ropuina thu hril an tih.

²⁰ Israel thlahaiin an thilinhlân chu bûrlebêl inthiengtaka Lalpa ina an hung lâklût hlak ang hin, Lalpa kuoma thil inhlân dingin hnam tin laia inthawka in unauhai po po chu sakawr chunga dâm, tawlailîra dâm, zâwnnaa dâm, sabengtung lien chi chunga dâm, sanghâwngsei chunga dâm, Jerusalem ka tlâng inthienga chun hung ṭhuoi an tih; Lalpain a tih.

²¹ Chun, chuong laia mihai khawm chu thiempu ding dâmin, Levi mihai ding dâmin lâng ka tih, Lalpain a tih.

²² Vân tharhai le hnuoi thar ka la siem ding chu ka hmaa a um zing angin, in thlahai le in hming chu a um zing bawk ding a nih, Lalpain a tih.

²³ Chun, hieng hi hung nîng a ta, thla thara inthawka thla thar dang chenin, châwlnia inthawka châwlni dang chenin mi po po ka hmaa chibai mi bûk dingin hung zut zut an tih, Lalpain a tih.

²⁴ Chun, fe suok hlak an ta, keia chunga bawsetuhai ruok chu en an tih, an ngêhai chu a thiin, an mei chu sukhlumin a um ding a ni si naw a, mi po po ta dingin thil tirdakumtak nîng a tih”.