ISAI 56 - Pathien Lekhabu Inthieng (BSI)

Pathien thuthlung vawng zing lâwmman

¹ Lalpa chun hieng ang hin a tih, “Rorêl zâwm unla, feltakin thaw ro, ka sandamna chu a hung tlung vâng vângin, ka felna chu a hung inlang ṭêp ta si a.

² Chuong ang thaw mi le, chu chu pawm tlattu mihriem naupa chu, a hamṭha ie; châwlni bawse lova inser hlaktu le, thil ṭha naw hrim thaw lo dinga a kut vêng ṭha hlaktu chu.

³ Chun, ram dang mi, Lalpa zâwmtu chun, “Lalpain a mihaia inthawk hin mi suktum ngei a tih,” ti naw raw se; mitillâk chun, “En ta thing ṭâwl el ka ni hi,” ti bawk naw raw se.

⁴ Lalpa chun hieng ang hin a tih, “Ka châwlnihai inser a, ka lâwm zâwng thilhai thlang a, ka thuthlung pawm tlattu mitillâkhai chungchâng thua chun,

⁵ an kuomah ka in sûnga le ka kul sûnghaia chun naupasalhai le naunuhmeihai neituhai nêk chun hriet zingna ṭha lem le hming ṭha lem pêng ka tih; an kuomah kumkhaw hming, sukbohmang nâwk ta naw ding pêng ka tih.

⁶ Ram dang mi khawm, châwlni bawse lova, inser hlakhai le, ka thuthlung pawm tlat taphawt chu, Lalpa rawng bâwl ding le, Lalpa hming hmangai ding le, a siehlawahai um dinga Lalpa zâwm taphawthai;

⁷ anni ngei chu ka tlâng inthienga chun ṭhuoi ka ta, ka ṭawngṭâina inah sukhlim ka tih; pumrawhmanga an thilinhlânhai le an inthâwinahai chu ka maichâma chun lâwmin um a tih; ka in chu mi tinrêng ta dingin ṭawngṭaina in an ti ding a ni si a,” tiin.

⁸ Lalpa Pathien, Israelhai hnawt suoka umhai ṭhuoi khâwmtu chun, “Ama ta ṭhuoi khâwma umhai naw khawm hnam danghai a kuomah la ṭhuoi khâwm ka tih,” a ta.

A milim biek leia Israelin thiemnaw a changna

⁹ Ram sa po pohai, anih, ramhnuoia sa um po pohai, fa dingin hung ro.

¹⁰ A râl vêngtuhai chu an mit ân del a, hrietna nei naw ruok an na; ui râwl nei lo ruok an na, an inngak thei nawh; mang nei a, zâl zing a, imu hêmi an nih.

¹¹ Anih, uihai chu duâmtak an na, huntâwk ti hrim an nei ngai nawh; chuong chu berâm vêngtu thil hre theilohai an na, mâni lampui pei, mâni hlâwkna tieng seng, an ngha vawng tâwl, an rêng elin.

¹² “Hung ro khai, uoin lâng ka ta, chuongchun, zuin ei inthun sip ding annâwm; zînga chun vawisûn ang hi ni nâwk a ta, ni ropui nasa deu el nîng a tih,” an ti seng a.