ISAI 52 - Pathien Lekhabu Inthieng (BSI)

Pathienin salintângnaa inthawkin Zion sansuok a tih

¹ Aw Zion, har la, har la, i hrâtna inbel rawh; aw Jerusalem, khawpui inthieng, i silfên mawitakhai chu inbel rawh; tuta chen chu sertanlo le mi pawrche chu i sûngah an lût ta âwm si naw a.

² Aw Jerusalem, pilvut i kai kha inthin rawh, tho la, ṭhung rawh; aw Zion naunu, sala um, i rîng khuopnahai kha sût rawh.

³ Lalpa chun hieng ang hin a ti si a; “Iengkhawm ni lova zawr in ni ta a, chuongchun, tangka ni lova intlan ni tâng in tih,” tiin.

⁴ Lalpa Pathien chun hieng ang hin a ti si a, “Ka mihai chu a tira chun Aigupta rama um dingin an fe thla a, chun, Assuria mihai chun ieng lei ni lovin an nêksâwr tâwl a.

⁵ Chuongchun, hitaka hin tuhin ieng am a na ka thaw ding? Ka mihai hi iengkhawm ni lova ṭhuoi hmangin an um si a, Lalpain a ti a, an chunga rorêltuhai chu an khêk tuor tuor a, Lalpain a tih, ka hming hi sûnnithlâk thlâka hrilsietin a um hlak.

⁶ Chuleiin, ka mihai chun ka hming hrieng an tih; ngai ta, keima hi ka nih,” tiin.

⁷ Tlângahai chanchin ṭha intluna, in- remna thu khêkpuia, thil ṭha chanchin ṭha intluna, sandamna thu khêkpuia, Zion kuomah, “I Pathien chu lalah a ṭhung,” tituhai ke chu a va mawi de!

⁸ Ngai rawh, i râl vêngtuhai râwl chu! Râwl an insuo a, hlimtakin hla an sak tâwl chu, Lalpa chu Ziona a hung kîr nâwk pha chun inhmatuokin an hmu ding a ni si a.

⁹ Jerusalem hmun se ta hnunghai, hlim suok phut unla, hlimtakin hla sak tâwl ro; Lalpa chun a mihai chu a thlamuon ta si a, Jerusalem chu ân tlan tah a nih.

¹⁰ Lalpa chun hnam tinrênghai mithmua chun a bân inthieng chu a hlîm tah; chuongchun, kâwlkawdawnga mi po poin ei Pathien sandamna chu hmûng an tih.

¹¹ Suok ro, suok ro, chutaka inthawk chun suok ro; thil inthieng naw hrim hrim tâwk naw ro; a sûnga inthawkin fe suok ro; Lalpa bûr le bêl chawituhai, inthiengtakin um ro.

¹² Inhmâwtakin in fe suok âwm si naw a, tlânsiein fe bawk naw ti niu; Lalpa chun in hma a ṭhuoi ding a ni si a; Israelhai Pathien chu in hnung dâltu nîng a tih.

¹³ Ngai ta, ka siehlaw chun vartak- in thâwng a ta, chawimawi le chawisângin um a ta, insângtakin um a tih.

¹⁴ Mi tamtakin mak an ti hle che angin, (a hmêl chu mihriem hmêl nêk hmana suksietin a um a, a pienken chu mihriem nauhai pienken nêk hmana suksietin a um a),

¹⁵ hnam tamtakin maktîng an tih; lalhaiin a kuoma chun an bau lân chîp an ta, an kuoma hril ngai lo chu la hmûng an ta, naa an hriet ngai naw chu an ngaithiem ding a nih.