ISAI 48 - Pathien Lekhabu Inthieng (BSI)

Thil thar chanchin hrillâwkna

¹ Aw Jakob sûng, Israel hming inṭâwmpuia, Juda tuihaia inthawk suok a, thutakah ni si lova, felnaa khawm ni bawk si lo, Lalpa hming sâla ṭawng inkhâma, Israelhai Pathien hming lam hlaktuhai, hi hi lo ngai ro.

² (Khawpui inthienga mi an inti si hlak a, Israelhai Pathien chungah ringna an innghat bawk a nih; a hming chu sipaihai Lalpa a nih).

³ Kha hma thilhai chu tiena tlângah ka lo hril ta a, anih, ka baua inthawkin a suok a, kân hriettir a; kârlovin ka muolsuo thut a, a hung tlung ta a.

⁴ Mi kâwmaw in na, in rîng chu thîr tha a na, in chal chu dâr a ni ka hriet leiin,

⁵ tienlaia inthawkin in kuomah ka hril a, a hung tlung hma khawma in kuomah kân hriettir cheu kha; chuong naw chun, “Ka milim chun a ti a nih, ka milim siem fâwm le ka milim sung chun thu a pêk a nih,” ti rawi in tih.

⁶ In hriet de kha; hieng po po hi en ro; nangnîn in hril ding a ni lem ta naw am a nih? Tuta chen chu thil thar inhriettir tâng ka ti cheu, thil inthup in hriet ngai nawhai chu.

⁷ Chuong chun inhmaa siem ni lovin, tuta siem a nih; vawisûn ni hma khan chu in na khawma in hriet ngai nawh; chuong naw chun, “Ngai ta, chuong chu kan hriet zing annâwm, ” ti rawi in tih.

⁸ Anih, in nain in hriet ngai naw a; anih, in lungrilin in hriet ngai bawk nawh; anih, inhma hrim hrim khan in na chu hawngin a um ngai nawh; vervêktak takin in thaw hlak ti le, sula inthawk hrimin bawsetuhai an ti hlak cheu ka hriet si a.

⁹ Ka sukbohmang nawna ding cheuin, ka hming leiin ka lunginsen chu khêk hrîng ka ta, inpâk ka hlawna dingin in chungah insûm ka tih.

¹⁰ Ngai ta u, ka sukthieng cheu a na, nisienlakhawm, tangka sukthieng ang chun a ni nawh; rinumna raw tuina meia chun ka fie cheu a nih.

¹¹ Keima le keima leiin, anih, keima le keima lei ngawtin a nih ka thaw ding chu; ka hming hi ieng dingin am suksietin um a ta? Ka ropuina hi mi dang kuomah pe naw ning ah.

Lalpain Israel intlan a tih

¹² Aw Jakobhai le ka ko Israelhai, ka thu hi ngai ro; kei hi ama chu ka nih; a hmasa tak chu ka na, a nuhnung tak khawm ka nih.

¹³ Anih, ka kut hin leihnuoi innghatsan chu a phûm a, ka kut changtieng hin vânhai khi a keiphar a; ka ko phingleh an ngîr khâwm hlak.

¹⁴ Nangni rawi po pohai, inkhâwm unla, ngai ro; anni lai chun tuin am hieng thil hi a hril hlak a? Lalpa chun ama chu a hmangai a, ama chun Babulon chunga chun a dit zâwng thâwng a ta, a bân chu Kaldaihai chungah inletin um a tih.

¹⁵ Kei, keima ngei hin thu ka hril ta a; anih, ama chu ka ko a, ka ṭhuoi a, a lampui chu suktluong pei ka tih.

¹⁶ Nangnirawi hin mi hung hnai unla, lo ngai ro; a tira inthawk khan arûkin thu ka hril ngai naw a; a um tîr laia inthawk khan chutaka chun ka um a; tuhin Lalpa Pathien chun keima le a thlarau chu a mi tir ta a.

¹⁷ Lalpa, nangni intlantu, Israelhai Mi Inthieng chun hieng ang hin a tih, “Kei hi Lalpa in Pathien, in ṭhatna dinga nangni inchûktirtu, in fena lampuia ṭhuoitu ding cheu chu ka nih.

¹⁸ Aw nangni hin ka thupêkhai chu lo ngai chu ni unla chu aw! In chungah inremna chu vadung ang ela umin, in felna chu tuipui infâwnhai ang elin a um ding bah;

¹⁹ in thlahai khawm ṭieu phaiphin zâta umin, in rîla rahai khawm ṭieu pilvut mal tê tê zât rauin an um ding bah: an hming chu ka hmaa inthawka thaihmangin um naw ni a, sukbohmangin um bawk naw ni,” tiin.

²⁰ Babulona inthawkin suok unla, Kaldaihai chu tlân hmangsan ro, hi hi hla sak riin inhriettir unla, hril unla kâwlkawdawng chen khawma sukri ro, “Lalpa chun a siehlaw Jakobhai chu ân tlan tah,” ti ro.

²¹ Thlalêrahai chun a ṭhuoi lai khan an dang a châr naw a; lungpuia inthawk chun an ta dingin tuihai ân luong suoktir a; lungpui chu a sukkawi a, chuongchun, tuihai chu a hung suok ta zur zur a.

²² Lalpa chun, “Mi rilohai ta ding chun muongna hrim hrim a um nawh,” a tih.