ISAI 46 - Pathien Lekhabu Inthieng (BSI)

¹ Bela chu a lo kûn zing a, Nebo chu a lo insukhnuoi zing bawk a; an milimhai chu ran chunga le sa chunga chun an dawm kai ta a; Milim phurlawna umhai chu phurrik, sa châu ta dinga phurrik an nih.

² An lo insukhnuoi zingin an lo kûn tâwl seng a, phurrik chu an sanhim thei si naw a, anni ngei khawm chu sala ṭhuoiin an um ta lem a.

³ Aw Jakob sûnghai le, Israel sûnghai laia hlabîkhai po po, phînga inthawka ka puok a, sula inthawka ka pawm tahai, ka thu hi lo ngai ro;

⁴ in tarkûn chen khawma ama chu nîng ka ta, in lua kêlsam a ṭo vawng chen khawma pawm ka ti cheu, keiin ka siem a, keima bawkin ka puok a, anih, kei chun pawm ka ta, sandam ka tih.

⁵ Thuhmuna ngai kan nina dingin tulêm in mi tekhi a, tu tluk âm in mi siem a, tu lêm mi hrilkhîng in ta?

⁶ Mansaa inthawka rângkachak bun suok hlak a, tangka bûknaa bûk hlakhai chun rângkachak suttu an ruoi a, ama chun pathienah a siem hlak a; chuongchun, an bawkkhup a, anih, chibai an bûk hlak.

⁷ An liengkoah an put a, an fepui a, a hmun dinga chun an sie hlak a, a ngîr ta zing a, a umnaa inthawk chun insawn ta naw nih: anih, miin ama chu ko an ta, nisienlakhawm, dawn thei si naw ni a, an lunginzîngnaa inthawkin sansuok thei chuong naw ni.

⁸ Aw bawsetuhai, chu chu hre zing unla, insukpasal unla, hre suok nâwk ro.

⁹ Kha hmaa tienlai thilhai kha hre zing ro; kei hi Pathien ka na, a dang hrim an um si nawh, kei hi Pathien ka nih; keima ang hrim hrim an um nawh:

¹⁰ keiin a tâwp ding chu a tira inthawk hrimin ka hril hlak a, thil la thaw nawhai chu tienlaia inthawk khan ka hril ta hlak; “Ka remruot chu ngîrsuok a ta, ka dit zâwng po po chu thaw vawng ka tih,” ka ti a,

¹¹ khawsak tienga inthawkin vate hnukinrâwltak, ram hlataka inthawka ka mi ruot chu ka ko a, anih, ka hril ta a, muolsuo bawk ka tih; ka tum ta a, thaw bawk ka tih.

¹² Lungril uong, felna hlata umhai, ka thu hi ngai ro; ka felna chu ka hung lâk hnai a, hlatakah um naw ni, ka sandamna khawmin sâwt riel naw nih;

¹³ chuongchun, ka ropuina Israelhai ta dingin sandamna chu Ziona chun sieng ka tih.