ISAI 45 - Pathien Lekhabu Inthieng (BSI)

Kura kuoma thawding pêk chu

¹ Lalpa chun a hriek nâl, Kura, hnamhai chu a hmaa tukdawl ding le, lalhai kâwngkhi chu sûtpêk ding le, a hmaa kawtkhârhai hawngpêk ding le, kul kawtkhârhai khâr lova inumtirtu ding, a kut changtienga ka ichel kuoma chun hieng ang hin a tih,

² “Kei i hmaah fêng ka ta, ân ṭumnawnahai chu sukruol ka tih, dâr kawtkhârhai chu sukse rem rum ka ta, a kalna thîr tluonhai chu sukbawng ka tih;

³ chun, Lalpa, i hminga kotu che, Israelhai Pathien ngei chu ka nih ti i hriet theina dingin inthim laia rohai chu pêng ka ti che a, hmun fienrielhaia sum thuphmanghai khawm chu pêng ka ti che.

⁴ Jakobhai ka siehlawhai le, Israelhai ka ithlanghai lei chun i hmingin ka ko che a nih; mi hre ngai naw la khawm, hming ka sakpêk che a nih.

⁵ Kei hi Lalpa chu ka na, a dang hrim an um nawh, keima naw chu Pathien hrim hrim an um nawh, mi hre ngai naw la khawm i kâwng khitpêk ka ti che:

⁶ keima naw chu a dang hrim an um nawh ti nisa suoknaa inthawk le thlangtienga inthawka an hriet theina dingin; kei hi Lalpa chu ka na, a dang hrim hrim an um naw a nih.

⁷ Var ka siem hlak a, inthim khawm ka siem hlak a nih; inremna ka siem hlak a, intheidana khawm ka siem hlak; kei hi Lalpa, chuong thilhai po po thaw hlaktu chu ka nih,” tiin.

Lalpa, Siemtu chu

⁸ Vânhai, chungtienga inthawk khan infarthlâktir ro, vân dumhai khan felna hung buok thla raw hai se, sandamna an inder dawktir theina dingin hnuoi inhawng sienla, felna leh mâwng hmunkhat raw se; kei Lalpa hin chu chu ka siem a nih.

⁹ Mâni siemtu sêltu chu a chung a rik ie! hnuoia behar laia behar mei mei chu! Pilpawk chun a hemtu kuomah, “Ieng am i siem leh?” a ti ding am a nih? annawleh, i sinthaw chun, “A kutin thiem hrim a nei nawh,” a ti ding am a nih?

¹⁰ A pa kuomah, “Ieng am i nei leh?” titu amanih, a nu kuomah, “Ieng am i nei ding an leh?” titu chung chu a rik ie!

¹¹ Lalpa Israelhai Mi Inthieng, anni siemtu chun hieng ang hin a tih, “Thil la hung tlung ding thu chu mîn dawn unla; ka naupasalhai thua le, ka kut sinthaw thua hin thu mi pe ro.

¹² Hnuoi hi ka siem a, a chunga mihriem um hi ka siem bawk a, keimân ka kut ngei hin vân ka keiphar a, a sipaihai chu thu ka pêk bawk a nih.

¹³ Kura chu felna neiin ka keihar a, a lampuihai po po chu suktlûn ka tih; ama chun ka khawpui chu siem nâwk a ta, an intlanna man dit lei ni lovin, lâwmman dit lei ni bawk lovin, ka salhai chu insuoktir a tih, sipaihai Lalpain a tih,” tiin.

¹⁴ Lalpa chun hieng ang hin a tih, “Aigupta sininrimhai le, Ethiopia sumdâwng mi le Sabeanhai mi insângtakhai chu in kuom tieng hung an ta; in taah um tâng an tih; nangni chu zui an ti cheu, khaidiet bunin a nih an hung ding chu; chuongchun, bawkkhupin chibai bûk an ti cheu a: ‘Pathien chu nangnia hin a um ngei el, a dang hrim hrim an um nawh, Pathien dang hrim an um nawh,’ tiin in kuomah lunginsiet hnîng an tih,” tiin.

¹⁵ Aw Israelhai Pathien, Sandamtu, Pathien inthup hlak chu i ni ngei el.

¹⁶ Muolphotakin um an tih, anih, an rêngin inzaktakin um an tih; milim siemtuhai chu inzaknaa chun lût tâwl an tih.

¹⁷ Israelhai ruok chu kumkhaw sandamnaah, Lalpa sandamin um an tih: chatuon chen khawmin muolphoin inzak naw ti niu.

¹⁸ Lalpa vân siemtu (ama chu Pathien), leihnuoi hi inngira siemtu chu (ama chun leihnuoi hi a sukdet a, iengkhawm ni lovin a siem naw a, mihriem umna dingin ân ngîr lem a nih) hieng ang hin a ti si a, “Kei hi Lalpa chu ka na, a dang hrim hrim an um nawh.

¹⁹ Inrûkin, ram inthim hmunah thu ka hril ngai naw a, Jakob thlahai kuomah, ‘Iengkhawm lovah mi zawng ro,’ ka ti ngai nawh: kei Lalpa hin felna thu ka hril hlak a, thu indiktakhai chu ka hril hlak.

Babulon milimhai le Lalpa chu

²⁰ “Inkhawm unla hung ro; hnam tin laia hremna pumpeltuhai, hung hnai seng ta u, an thing milim siemfâwm chawi hlak a, mi sanhim thei lo pathien kuoma ṭawngṭai hlaktuhai chun hrietna hrim hrim an nei nawh.

²¹ Hril unla, hung suksuok ro, anih, inrâwn tâwl raw hai se; inhmaa inthawk tah tuin am ân hriettir a? Tienlaia inthawk tah tuin am a hril a? Kei Lalpa hin ka thaw a ni naw am a nih? Keima naw chu Pathien dang hrim an um nawh. Keima naw chu a dang hrim an um nawh; Pathien fel le sandamtu ka nih.

²² Kâwlkawdawnga mi po pohai, keia tieng hung ngha unla, sandamin um ro; kei hi Pathien ka ni si a, a dang hrim hrim an um nawh.

²³ ‘Khûp tinrêng chu ka hmaah dingṭhaṭhuon tâng an ta, lei tinrêng khawmin ṭawng inkhâmin thu tiem tâng an tih,’ tiin mâni le mâni insâlin ṭawng kân khâm tah; thu chu felna ruokin ka baua inthawkin a suok ta a, hung kîr nâwk ta naw nih.

²⁴ Miin, ‘ Lalpaa chau felna le hrâtna a um,’ tiin, ka chungthu la hril an tih; ama kuoma mi ngei hung an ta, a chunga lungninawhai po po chu muolphotakin um tâng an tih.

²⁵ Israel thlahai po po chu Lalpaa chun a nih thiem inchangtira an um a, Lalpa chu an sawng ding chu,” tiin.