ISAI 44 - Pathien Lekhabu Inthieng (BSI)

Lalpa chau chu Pathien a nih

¹ “Tu ruok hin chu aw Jakobhai ka siehlawhai, aw Israelhai ka ithlanghai, ngai ro khai;

² Lalpa nangni siemtu, sula inthawka nangni inngîrtu, nangni ṭhangpuitu ding chun hieng ang hin a tih, ‘Aw Jakobhai ka siehlawhai, nangni Jesurun ka ithlanghai, ṭi naw ro,’

³ Dangchâr chunga chun tui ka hung buok ding a ni si a, hnuoi ṭâwlahai chun tuiluonghai chu ka hung buok bawk ding a nih; in thlahai chungah ka thlarau buok ka ta, in nauhai chungah ka malsâwmna buok bawk ka tih:

⁴ chuongchun, anni chu tuiluongna kâwla phahrâm mâwng ang hin, hlohna lai chun mâwng an ta.

⁵ Mi pakhatin Lalpa ta ka nih tîng a ta, mi dangin Jakob hming inbûk a ta; mi dangin a kutah, Lalpa ta tiha ziekin, Israel hming chu a chi hmingah hmang a tih,” tiin.

⁶ Lalpa Israelhai Lal, an intlantu sipaihai Lalpa chun hieng ang hin a tih, “Kei a hmasa tak chu ka na, a nuhnung tak khawm ka nih; keima naw chu Pathien hrim hrim an um nawh.

⁷ Tienlaia mihai ka siem china inthawk tah keima thaw angin tuin am ko a ta, tuin am chuong chu hril a ta? Tlung dinghai le la hung um dinghai chu hril raw se.

⁸ Inlau naw unla, ṭi bawk naw ro, inhma khan in kuomah ka hrilin kân hriettir ta cheu a ni naw am a nih? Chuongchun, nangni hi a mi hrietpuituhai in nih. Keima naw hi Pathien dang hrim hrim an um am? Lungpui hrim hrim a um nawh, pakhat khawm a um ka hriet nawh,” tiin.

Milim biek indik nawna

⁹ Milim siem fâwm siemtuhai chu an rêngin boruok el an na; an thil dit zâwnghai ienga ṭhahnem ni naw ni hai; an muolphona ding hrim hrimin anni hrietpuituhai khawmin an hmu thei naw a, an hriet thei bawk nawh.

¹⁰ Tuin am pathien chu ân ngîr chai leh? Annawleh, tuin am ienga ṭhahnem chuong lo milim siem fâwm a sung hrim leh?

¹¹ Ngai ta, a pâwlpuihai po po chu muolpho an tih; sinthaw mihai khawm mihriem laia mi an nih; an rêngin inkhâwm vawng hai sienla, ngîr raw se; ṭîng an ta, muolpho tâwl an tih.

¹² Thîrsuin hreipui a sut hlak a, meihawla chun a thun lût a, tubauhaiin a sut a, a bân hrâttak chun a sut hlak, anih, a phîng a hung ṭâm a, a tha chu a hung zawi hlak; tui hrim hrim a dâwn naw a, a châu hlak.

¹³ Thingrem siemtuin hrui a keimar a, pensilin a riruong a, thingnâwtnahaiin a sukruol a, inkhina hmangin a riruong a, mihriem ruongâmin ân ngîr a, ina um dingin mihriem mawina angin ân ngîr hlak a.

¹⁴ Sidar thinghai a ta dingin a phûr a, sething le thingsaisuo a lâk a, ramhnuoi thing laia pakhat chu a puola um dingin a sukdet a, fâr kûng a phun a, ruotuiin a châwm hlak.

¹⁵ Chu hnunga chun mi ta dinga meia ti ding ni tâng a tih; chutaka mi chu a lâk a, ân suklum hlak, anih, meiah a sêm a, bei a em hlak; anih, pathien a siem a, a biek hlak; chu thing chu milim siem fâwmah a siem a, chu chu bawkkhupin chibai a bûk hlak.

¹⁶ Chu thing chu aṭhen chu meiah a ti a, aṭhen chu sa fâkna dingin a hmang a; sa a raw a, a tlai hlak; anih, mei lum a awi a, “Chei, ka lum tah, mei hmêl ka hmu ta le!” a ti a.

¹⁷ A mahla chu pathienah a siem a, a siem fâwm milim ngeia chun; chu chu bawkkhupa chibai bûkin a biek a, a kuomah a ṭawngṭai a, “Mi sanhim rawh, ka pathien i ni si a,” a ti hlak.

¹⁸ An hriet naw a, an ngaituo bawk nawh; ama chun an hmu thei nawna dingin ân sîmtir ta si a; an hrietthiem nawna dingin an lungril khawm a khârpêk ta a.

¹⁹ Tukhawma an hriet suok nâwk naw a, “Ṭhenkhat chu meiah ka ti si a; anih; a aia khawm bei ka em nghe nghe a; sa khawm ka raw a, ka fâk si a, a mahla chu thil tirdakumah ka siem ding am a nih? Thinga mi bawkkhupin chibai ka bûk ding am a nih? ti dingin annia chun hrietna le hrietthiemna a um bawk nawh.

²⁰ Vut chau a fâk hlak a; a lungril hlêma um chun, a hringna ân sanhim thei nawna ding le, ‘Ka kut changtieng hin khêl a um naw am a nih?’ a ti thei nawna dingin ama chu ân pêttir tah.

Lalpa Israel intlantu chu

²¹ Aw Jakobhai, chuong thilhai chu hre zing ro, Israelhai, hre zing bawk ro; ka siehlawhai in ni si a; keiin kân ngîr cheu a; ka siehlawhai in nih; aw Israelhai, ka theinghilin um naw ti niu.

²² In bawsietnahai chu sûm sâmup sukboin ka sukbo ta a, in suolhai chu sûm sukbo angin ka sukbo ta bawk a; ka kuomah hung kîr nâwk ro, kân tlan ta si cheu a.

²³ Aw vânhai, hlimtakin hla sak ro, Lalpain chu chu a thaw ta si a; leihnuoi hnuoitienghai, khêk ro, tlânghai, aw ramhnuoi le a sûnga thing um tinrênghai, hla sak suok phut ro: Lalpa chun Jakobhai chu ân tlan ta a, Israelhaia chun ân chawimawi ding a ni si a.

²⁴ Lalpa, nangni intlantu, sula inthawka nangni inngîrtu cheu chun hieng hin a tih, “Kei hi Lalpa, thil po po siemtu, mâni chaua vân keiphartu, hnuoi suklientu chu ka nih; tu am ka kuomah a um a?

²⁵ Kei hi khêlhliphai inchiknahai chu teplova siem a, aisânthiemhai invêta siemtu, mi varhai innghat kîrtir a, an hrietna invêtthlâka siemtu,

²⁶ mâni siehlaw thu sukdet a, mâni palaihai remruot sukmuolsuotu, Jerusalem chungchâng thua, ‘Chutaka chun mi um nâwk an tih,’ titu le, Juda ram khawpuihai chungchâng thua, ‘Siemin um nâwk tâwl an ta, a sietna laihai chu siem ṭha nâwk ka tih,’ titu,

²⁷ tui inthûktak kuoma, ‘Kang intan rawh, i vadunghai khawm ka sukkang ding a nih,’ titu,

²⁸ Kura chungchâng thua, ‘Ama chu ka berâm vêngtu a nih, Jerusalem chungchâng thua, siemin um nâwk a tih, ti le, Pathien biekin kuoma, I lungphûm chu remin um nâwk a tih, ti hiel khawpin ka dit zâwng po po chu thâwng a tih,’ titu ka nih,” tiin.