ISAI 41 - Pathien Lekhabu Inthieng (BSI)

Israel kuoma Pathien thutiem

¹ Aw thlierkârhai, ka hmaa chun to ṭhiep ro; mi tin chun an hrâtna sukthar nâwk hai sienla, hung hnâi tâwl raw hai se; chu hnunga chun hril raw hai se; rorêl dingin inhnai tâwl ei tiu khai.

² Khawsaka inthawkin mi pakhat, felna leia a ke bula a iko chu, tuin am a keihar a? ama chun hnam tin a hmaah a pêk a, lalhai chungah ro ân rêltir a, anni chu pilvut angin a kâwlhnâm kuomah a pêk a, busi thli imût lêng angin a thalngul kuomah a pêk bawk a.

³ Ama chun annirawi chu a hnawt a, himtakin a fe pei a, a kea a la fena ngai naw lampuia chun,

⁴ A tira inthawkin suon po po koin, tuin am thaw a, thaw zo? Kei Lalpa, a hmasa tak le a nuhnung tak kuoma um hi, a thawtu chu ka nih.

⁵ Thlierkârhai chun an hmu a, an ṭi a; kâwlkawdawnghai chu an inthin a, an hung hnâi a, an hung a.

⁶ Mi tinin mâni ruolhai an ṭhangpui a, mi tinin an unauhai kuomah, “Lungmuongtakin um rawh,” an ti seng a.

⁷ Chuongchun, a chârna tieng thua chun, “A ṭha ie,” tiin themthiem mi chun rângkachak sut mi ân fui a, tubaua sutnâm mi chun dolunga sut mi chu ân fui bawk a; chun, ân hnîng nawna dingin kilnahaiin a kil tlat a.

⁸ Nisienlakhawm, nangni Israelhai ka siehlaw, Jakob hai ka mi thlang, ka ruolpa Abraham thlahai,

⁹ nangni leihnuoi tâwpnaa inthawka ka mi ṭhuoi, a kia inthawka ka mi ko, “ka siehlawhai in nih, pei thla lovin ka thlang lem cheu,” ka itihai,

¹⁰ ṭi naw ro, kei in kuomah ka um si a; lunginzîng naw ro, kei in Pathien ka ni si a; sukhrât ka ti cheu a, anih, ṭhangpui ka ti cheu, anih, ka felna kut changtiengin chel zing ka ti cheu.

¹¹ Ngai ta, in chunga lungninaw po pohai chu muolphotak le inzaktakin um an tih; nangni sêltuhai cheu chu iengkhawm ni lo ang nîng an ta, bohmang an tih.

¹² Nangni sêltuhai cheu chu zawng in ta, hmu si naw ti niu: nangni dotuhai cheu chu iengkhawm ni lo ang nîng an ta, thil um naw ang el nîng an tih.

¹³ Kei Lalpa in Pathien hin, “Ṭi naw ro, ka ṭhangpui ding cheu a nih,” tiin, in kut changtieng chu ka chel ding a ni si a.

¹⁴ Nang chawkchawnâl Jakob le Israel mihai, ṭi naw ro, ṭhangpui ka ti cheu, Lalpain a tih, nangni intlantu cheu chu Israelhai Mi Inthieng chu a nih.

¹⁵ Ngai ta, bu chîlna khâwl thartak, ngeitak, ha nei miah siem ka ti cheu: tlânghai chu chîlin vaw nawi in ta, muol pâwnghai chu busi angin siem in tih.

¹⁶ Zâp in ta, thliin mût lêng a tih, thlivir chun sukdar a tih; chun, nangni chu Lalpaa chun lâwm in ta, Israelhai Mi Inthieng chu la suong in tih.

¹⁷ Mi rimsi le pasiehai chun tui an zawng hlak a, a um si naw a, an lei dangchârin a ṭâwl vawng hlak; kei Lalpa hin anni chu dawn ka ta, kei Israelhai Pathien hin anni chu mâksan naw ning.

¹⁸ Tlâng insâng kawl vel vula chun vadunghai inluong suoktir ka ta, ruom laiahai chun tuihnârhai insuoktir bawk ka tih; thlalêr chu dîlah siem ka ta, ram ṭâwl chu tuihnârah siem bawk ka tih.

¹⁹ Thlalêra chun sidar thing dâm, sittim thing dâm, inhmui thing dâm, hriek thing dâm phun ka ta; ram ṭâwla chun fâr dâm, phân dâm, fârsuok dâm phun vawng tâwl ka tih;

²⁰ Lalpa kut chun chuong chu a thaw a nih ti le Israelhai Mi Inthieng chun a siem a ni ti an hmu a, an hriet a, an ngaituo a, an hrietthiem sengna dingin.

Lalpain pathien indik nawhai a cho

²¹ In thu chu hung hril ro, Lalpain a tih; pathien in tina san takhai chu hung la suok unla, Jakobhai Laltak chun a tih.

²² Chuong chu inlangtir sienla, thil la hung tlung ding chu kan kuomah hril raw se; kan ngaituo theina ding le kan hriet theina dingin, kha hmaa thilhai chu ieng am a ni hril ta u; annawleh, thil la hung tlung dinghai chu mîn hriettir ro,

²³ Pathien in nih ti kan hriet theina dingin hi hnunga thil hung tlung dinghai chu hril ro le, anih, kan lunginzîngna ding le kan en sengna dingin, thil ṭha amanih, thil ṭha naw amanih thaw ro le,

²⁴ Ngai ta u, iengkhawm in lo ni naw hi, in thil thaw khawm iengkhawm a ni bawk nawh, nangni thlangtuhai cheu chu mi tirdakumtak an ni hi.

²⁵ Hmârtienga inthawkin mi pakhat ka kei har a, ama chu a hung tlung tah; nisa suoknaa inthawka ka hming lamtu chu; ama chun lung chârna sawisak angin rorêltuhai sawisâng a ta, bêlhemtuin pilpawk a sir hnâk angin sir bawk a tih.

²⁶ Ka hriet theina dingin tuin am a tira inthawk khan a hril hlak a? “Ama hi ân dik ie,” kan ti theina dingin tuin am a hrillâwk hlak a? Anih, a hril hrim hrim an um nawh, anih, inhriettir hrim hrim an um nawh, anih, in thuhrilhai hi a hrie hrim hrim an um nawh.

²⁷ Keiin Zion kuoma chun, “En ta, anni saw en ta,” ti hmasâng ka ta; Jerusalem kuoma chun chanchin ṭha hung intluntu pakhat pêng ka tih.

²⁸ Chun, ka hei en khawma mi hrim hrim an um naw a; anni chu ka hei indawn khawmin anni lai remruottu, thu pakhat khawm dawn thei, tukhawm an um dêr nawh.

²⁹ En ta u, an rêngin, an sinthawhai chu iengkhawm ni lo a na, thil umlo el a nih, an milim sunghai khawm chu thli le boruok el a nih.