ISAI 39 - Pathien Lekhabu Inthieng (BSI)

Hezekiain Babulona inthawka palaihai a lo dawng

¹ Chuong lai chun Baladan naupa Babulon lal Merodakbaladan chun lekhahai le lâwmman Hezekia kuoma chun ân phur a, a na ti le a dam nâwk tah ti a lo hriet leiin.

² Hezekia chu an chungah a lâwm a, an kuomah a thil hlu siena in dâm, tangka dâm, rângkachak dâm, thil riminhnik dâm, hriek hlutak dâm, a râlthuom siena in sûng po po dâm, a ro ṭha laia um po pohai chu ân entir vawng a; a ina mi le a ram sûnga um chu Hezekia chun ân entir naw hrim hrim thil a um naw a.

³ Chuong lai chun zâwlnei Isai chu lal Hezekia kuoma chun a hung a, a kuomah, “Nakieta mihai khan ieng am an hril a? Khâw laia inthawkin am i kuomah an hung a?” a ta. Hezekia chun, “Ram hlataka inthawkin, Babulona inthawk chun ka kuomah an hung a nih,” a ta.

⁴ Ama chun, “I ina hin ieng am an en kha?” a ta. Hezekia chun, “Ka in sûnga um po po chu an en vawng, ka ro ṭhahai laia mi kân entir naw iengkhawm a um nawh,” tiin a dawn a.

⁵ Chuongchun, Isai chun Hezekia kuoma chun, “Sipaihai Lalpa thu hi hre rawh.

⁶ ‘Ngai ta, i in sûnga um po po le, vawisûn ni chena i puhaiin an lo inkhâwl khâwm chu Babulon tienga fepuiin um vawng a tih; iengkhawm mâksana um um dêr naw nih; chuong ang nihai chu a la tlung ding a nih’, Lalpain a tih.

⁷ ‘Chun, i naupa i rîla la ra ding, i nei ding ngeihai laia mi chu, fehmangpui an tih; anni chu Babulon lal ina chun mi tillâkah la um an tih,’ a tih, ” a ta.

⁸ Hezekia chun Isai kuomah, “Lalpa thu i hril hi a ṭha ie,” a ta. Ama ma chun, “Ka dam sûng hin remna le thutak a um ding a ni si a,” a ta.