ISAI 37 - Pathien Lekhabu Inthieng (BSI)

Sennakerib kuta inthawka Juda sanhima a um thu

¹ Lal Hezekia chun chu chu a hriet phingleh a silfênhai chu a keithlêr a, saiip puon ân bel a, Lalpa ina chun a lût ta a.

² Chun, a sûnghai chunga hotua um Eliakim le lekhaziektu Sebna le thiempuhai upahai chu saiip puon inbelin Amoz naupa zâwlnei Isai kuomah a tir a.

³ Anni chun a kuomah, “Hezekia chun hieng ang hin a tih, ‘Vawisûn ni hi lunginzîngna ni le hmingsietna ni a nih, nauhai chu an pieng a hun ta si a; anni chu nei dingin hrâtna a um ta si nawh,

⁴ Rabsake, a pu Assuria lalin Pathien hring hrilse dinga a itirpa thuhrilhai chu Lalpa i Pathienin a naa a hriethai chun la kâwk ngei a tih; chuleiin, hlabîka la umhai ta ding hin i ṭawngṭâina chu hang inhlân rawh,’ a ti a,” an ta.

⁵ Chuongchun, lal Hezekia siehlawhai chu zâwlnei Isai kuoma chun an hung a.

⁶ Isai chun an kuomah, “In pu kuoma chun hieng ang hin in hril ding a nih, ‘Lalpa chun hieng ang hin a tih, I thu hriet, Assuria lal siehlawhaiin an mi hrilsietnahai kha ṭi naw rawh.

⁷ Ngai ta, a phîng sûnga chun thlarau inumtir ka ta, chuongchun, thuthang lo hrieng a ta, ama ramah fe nâwk el a tih; chuongchun, ama ram ngeia chun kâwlhnâma sukthlûkin inumtir ka tih, a ti a,’ tiin,” a ta.

⁸ Chuongchun, Rabsake chu a kîr nâwk a, Assuria lal chun Libna khuo a lo thaw lai chu a va hmu a, Lakis khuoa inthawk chun a fe suok tah ti a hriet sa hrim a na.

⁹ Chun, Assuria lal Sennakerib chun Tirhak Ethiopia ram lal chungchâng thu, “Nangma thaw dingin a suok tah,” ti mi hril a hriet a. Chuongchun, chu chu a hriet phingleh Hezekia kuomah palaihai a tir a.

¹⁰ “Hieng ang hin Juda lal Hezekia kuomah in hril ding a nih, ‘I ring Pathien chun Jerusalem khuo Assuria lal kutah pêk ni naw nih, tiin hlêm naw raw se che.

¹¹ Ngai ta, Assuria lalhaiin ram po po sukse vawngin an chunga an thilthawhai kha i nain i hriet a; nang hi sanhimin i um bîk ding am a nih?

¹² Hnam tin pathienhai chun, Gozan mihai dâm, Haran mihai dâm, Rezeph mihai dâm, Eden nau Telassar khuoa umhai dâm, a mi thlatuhaiin an sukbohmang hai kha, an sanhim am a nih?

¹³ Hamath lal dâm, Arpad lal dâm, Sepharvaim khawpui lal dâm, Hena lal dâm, Ivva lal dâm kha khâw lai am an um ta leh?’ tiin,” a ta.

¹⁴ Chun, Hezekia chun palaihai kuta inthawk chun lekha chu a hmu a, a hang tiem a, chuongchun, Hezekia chu Lalpa ina chun a hang lût a, Lalpa hmaa chun a phar ta a.

¹⁵ Hezekia chu Lalpa kuomah a ṭawngṭai a,

¹⁶ “Aw sipaihai Lalpa, Israel Pathien, cherubhai chunga ṭhung, nang hi, nang chau hi, hnuoi chunga um po pohai Pathien chu i nih, nang chun hnuoi le vân hi i siem a nih.

¹⁷ Aw Lalpa, i na hung sit la, ngai ta; aw Lalpa, i mit meng la, en ta; Pathien hring hi hrilse dinga mihai tirtu Sennakerib thuhai po po hi ngai ta.

¹⁸ Lalpa, Assuria lalhaiin ram po po le an inchâwk chu an suksiet ngei luo a,

¹⁹ an pathienhai chu meiah an pei bawk a; chuonghai chu Pathien an ni naw hrim a nih; mihriem kuta siem, thing le lung an ni lem; chuleichun, an sukbohmang a nih.

²⁰ Chuleiin, aw Lalpa kan Pathien, nang hi, nang chau hi, Lalpa i nih ti leihnuoi hluo ram po po hin an hriet theina dingin annia inthawk hin mi sandam rawh,” tiin.

²¹ Chun, chuong lai chun Amoz naupa Isai chun Hezekia kuoma chun mi a tir a, hieng ang hin a hril a, “Lalpa Israelhai Pathien chun hieng ang hin a ti a nih: Assuria lal Sennakerib sietna ding tienga ka kuoma i ṭawngṭai leiin,

²² hi hi a chungchâng thu Lalpain a hril chu a nih: Zion naunu nunghâk chun a hmusit che a, a nuisan che; Jerusalem naunu chun a lu a thin khum che.

²³ Tu am i sukhmingsietin, i hrilsiet a? Tu chung âm i râwl i sukpuom a, i mit i suksâng? Israel Mi Inthieng chung ngeiah.

²⁴ I siehlawhai hmangin Lalpa chu i sukhmingsiet a, Ka tawlailîr tamtakhai leh tlâng ram, Lebanon ram rilahai hin ka hung tlung ta a;sidar thing insângtakhai le a far thing ṭha mihai hi phûr ka ta; a hmun inzotak, a hnuoi ṭhatna hmun rampuia chun lût ka tih.

²⁵ Tuisunsuo ka cho a, tui ka dâwn hlak a; ka kepha hnuoi hin Aigupta vadung po po chu sukkang vawng ka tih, i ti a.

²⁶ Keimain inhmaa inthawka chuong chu ka thaw a na, tienlaia chuong chu ka siem an nih ti i hriet nâwm a nih? Khuo kulpui neihai kha in chim khâwm el anga suksetu i ni theina dingin tuhin kân tlungtir a ni ta hi.

²⁷ Chuleiin, a sûnga umhai chu an hrât mang naw a, an ṭi a, an hung muolpho ta kha; phûl hlobet ang le, hlohna hring ang le, in chunga hlohna ang le, lo bu ṭhat hma ang chau an ni kha.

²⁸ “Kei ruok chun chu i ṭhung dâm, i suok dâm, i lût dâm, ka chunga i lunginsenziehai hi ka hriet i sawnnaw.

²⁹ Ka chunga i lunginsen lei le, i ṭawng mingemzie chu ka naa hin a hung lût tâk leiin ka hnâr inbûk chu i hnârah inbûk ka ta, ka thîrse chu i hmûrah inbûk bawk ka tih; i hungna lampui ngeia khan inkîrtir nâwk ka ti che, tiin

³⁰ Chun, hi hi i ta dinga inchikna ding chu nîng a tih; tu kum hin bu inhli ring in ta, kum nâwk khawm chu inhli bawk chu ring in tih; chun, a kum thumnaa chun bu tu unla, ât unla, grêp huonhai siem unla, a ra chu fa ro.

³¹ Chun, Juda sûnghai laia a la dam sunhai chu a suktienga zungkeia, a tungzâwnga rain um nâwk a tih.

³² Jerusalema inthawkin a la um sunhai chu suok an ta, Zion tlânga inthawkin a la dam dinghai chu suok bawk an tih; sipaihai Lalpa ṭhahnemngaina chun chuong chu thâwng a tih.

³³ Chuleiin, Lalpa chun Assuria lal chungchâng thuah hieng ang hin a tih, ‘Ama chun chu hi khawpui hi hung tlung naw ni a; hitaka hin thal kâp bawk naw ni, phaw leh a kâwla hin hung bawk naw ni a, a thawna dingin hnuoi kul siem bawk naw ni, Lalpain a tih.

³⁴ A hungna lampui, chutaka ngei chun kîr nâwk a ta, hi khawpui hi hung tlung naw nih.

³⁵ Keima le ka siehlaw David leiin hi khawpui hi sanhim dingin ka hum ding a nih’ tiin,” a ti a.

³⁶ Chuongchun, Lalpa vântirko chu a va suok a. Assuria mihai riekhmuna chun mi nuoi khat, sing riet sâng nga a sukhlum a; chun, zîngkâra mi an hang tho chun ngai ta, mithi ruong khât ngawt a lo ni ta a.

³⁷ Chuongchun, Assuria lal Sennakerib chu a suok a, a fe a, a kîr nâwk ta pei a. Ninevi khuoa chun a um ta zing a.

³⁸ Chun, a pathien Nisrok ina chun pathien a biek laiin a naupasalhai Adrammelek le Sarezer hai chun kâwlhnâmin an sât hlum a; chuongchun, an tlânhmang a, Ararat rama chun an lût ta a. Chun, a naupa Esar-haddon chun ama aiawin ro a rêl ta a.