ISAI 34 - Pathien Lekhabu Inthieng (BSI)

Hnamhai le Edom chunga Lalpa lungsenna

¹ Hnam tinhai, naa hre dingin hung hnai ta u; mi tinhai, ngai ta u; hnuoi le a sûnga um po pohai chun nain hre raw hai se; khawvêl le a sûnga inthawka suok po pohai leh.

² Lalpa chun hnam tinrêng chunga chun lungninawna a neiin, an sipaihai po po chunga chun lunginsenna a nei si a; anni chu a sukbohmang vawng a, that dingin a pêk ta a.

³ Anni laia thata umhai chu pei suokin um an ta, an ruong rimsie chu innam vut vut a ta; tlânghai chu an thisen suktuiin um a tih.

⁴ Vâna umhai po po khi sukboin um an ta, vân khi lekhabu zuol mi an zuol angin zuolin um a ta; a umhai po po khi grêp hruia inthawka a hna a vuoi a, a tla hlak ang le, theichang kûnga inthawka a hna vuoi a tla hlak ang hin vuoi zoin tla vawng an tih.

⁵ Ka kâwlhnâm chun vânah tlaitakin a dâwn ta si a, ngai ta, chu chu, rorêl dingin, Edom mihai chunga le, ka ṭawngse inphur mihai chunga chun tlâng a tih.

⁶ Lalpa kâwlhnâm chu thisenin a khawp a, thâunaa sukthâuin a um ta a; berâmte le kêlte thisenin, berâmchal kal thâu dâmin; Lalpa chun Bozra khuoa chun inthâwina a nei a. Edom rama chun thatna nasatak a nei bawk si a.

⁷ Ramsielchalhai khawm chu an ruola sât thlûkin um an ta, bâwngchalhai, bâwngchalngênghai leh; an ram chun thisen inrui a ta, an pilvut chu thâunaa sukthâuin um a tih.

⁸ Lalpa phuba lâk ni a ni ta si a; Zion sêlna kawng thua thungna kum chu.

⁹ A vadung tuihai chu lawng hnaia inchangtirin um a ta, a pilvut chu kâta inchangtirin um bawk a tih, a ram chu lawng hnai kâng hlut hlutah inchang a tih.

¹⁰ Asûn azânin sukrêmin um naw ni a; a meikhu chu kumkhuoin intung ngut ngut a tih; suon um sûng po po chun serâwpin um zing a ta, tukhawma kumkhuo khawma pal naw ni hai.

¹¹ Tuivalawng le sakuin chu ram chu nei lem an tih; chingpirinu le vaâk chutaka chun um an ta; sietna hrui le ruokna dârmumkhai chu a chungah keimar a tih.

¹² An mi ṭhahai chu ram awp dingin ko an ta, nisienlakhawm, chutaka chun ko ding tukhawm um naw ni hai a; an mi lienhai po po chu iengkhawm ni naw ni hai.

¹³ An lal inahai chun hlohlingneihai ṭo a ta, an kulpui sûngahai chun zakthlai le buorhai ṭo a ta, sihalhai umna ding le vate rîngseihai ta dingin in inhuon sûng tuollai nîng a tih.

¹⁴ Chun, thlalêra ramsahai chu satenehai leh intuok an ta, sakêl chun a ruolhai ko a ta, anih, zân thil ṭiumtak chun chutaka chun umhmun khuor a tih, ama ta dingin châwlhmun ding hmûng a tih.

¹⁵ Chutaka chun rûltliem chun bu sep a ta, intui a ta, kêu a ta, awp khâwm a tih, anih, chutaka chun muhai chu kawppui nei sengin um khâwm an tih.

¹⁶ Lalpa lekhabuah zawng unla, tiem ro; chuonghai laia chun pakhat khawm a kim naw um naw ni a, pakhat khawm kawppui nei naw um naw ni; ka bau ngeiin thu a pêk a, a thlarau ngeiin chuong chu a ṭhuoi khâwm tâwl ta si a.

¹⁷ Ama chun an ta dingin ai a sânpêk a, a kutin hruia inkhiin ram chu a sempêk tâwl a; kumkhuoin nei an ta, suon um sûng po po chun chutaka chun um an tih.