ISAI 33 - Pathien Lekhabu Inthieng (BSI)

Lalpain sandamna chu hung intlungtir a tih

¹ Nang rawk tuok ngai si lova, rawktu, vervêktaka thaw tuok ngai si lova, vervêktaka thawtu, i chung a rik ie! Mi rawk i bân phaleh, rawk la tuok vêng i ta; vervêktaka i thaw zo phaleh i chungah vervêktakin thâwng an tih.

² Aw Lalpa, mi lunginsiet la; kan nghâk zing che hi: tûk tin kan bân hung ni la, lunginzîng huna chun a mi sandamtu hung ni bawk rawh.

³ Sa mur mur ria chun mi tin chu an tlân hmang ta a; nang i hung tho meu chun hnam tin chu sukdarin an um tah.

⁴ In sum râllâka lâk ding chu thilhringin thil an thak khâwm sup sup ang hin thak khâwmin um a ta; khâuṭhikṭhihai an inchâwm sup sup ang hin annirawi chu sum chunga chun inchâwm sup sup an tih.

⁵ Lalpa chu chawisângin a um tah; chungtienga khin a um si a; ama chun Zion chu rorêl felna le felnain a suksip tah.

⁶ I dam sûng chun um nghetna um a ta, sandamna dâm, varna dâm, hrietna dâm um ṭeu a tih; Lalpa ṭîna chu a ro a nih.

⁷ Ngai ta, an pasalṭhahai chu tuoltieng an khêk a, inremna palaihai chu an ṭap an ṭap a.

⁸ Lamlienhai chu a ṭhing ṭhiep ṭhuop a, mi inzin inlawn chu an um ta naw a, ama chun thuthlunghai chu a bawsiet a, khuohai chu a hmusit a, mihriem a ngaisak ta nawh.

⁹ Ram chu a ṭapin a châu a; Lebanon chu ân zakin a vuoi a, Saron chu thlalêr ang a ni tah; Basan le Karmel chun an hnahai an thin thlâk a.

¹⁰ Lalpa chun, “Tuhin chu tho ka ta, tuhin chu inthawk ka ta, tuhin chu chawisângin um tâng ka tih.

¹¹ Hlo ṭâwl vawn in ta, bupâwl nei in tih; in thuok chu nangni kâng hmang ding mei a nih.

¹² Mi tinrênghai chu chinai lung raw ang, hlohlingnei vât hnung meia an pei ang chu nîng an tih,” a ta.

¹³ Hlataka umhai, ka thilthaw hi nain lo hre ro; hnaitaka umhai, ka thilthawtheizie hi hre ro.

¹⁴ Ziona mi suol umhai chun an ṭi a; Pathien inza naw mihai chu inthinnain a man ta a. Eini lai hin tu am thil kâng hmang mei kuomah um ei ta le? eini lai hin tu am kumkhuoa kâng hlut hlut kuoma dâm chun um ei ta le?

¹⁵ Feltaka um a, indiktaka hril hlaktu; nêksâwrnahai hlâwkpuina hrim hrim theida a, thamna la nuom lova, kut thin san a, thisen insuo thu ngai nuom lova na hup a, suolna hrim hrim en nuom lova insîm hlaktu chu;

¹⁶ ama chu chungtieng chun um a ta, a kulbîng insânghai chu lungpui kulbînghai chu nîng a tih: bu chu a kuoma pêk nîng a ta, a tuihai chu um ngei ngei a tih.

¹⁷ I mithai chun lal chu a mawinaa chun la hmûng a ta, ram par lientak la thlîr a tih.

¹⁸ “A tiemtu kha khâw lai am a um ta a? siechawi bûktu kha khâw lai am a um ta a? Râl vêng in insânghai tiemtu kha khâw lai am a um ta a?” tiin; i lungrilin thil râpthlâktak kha ngaituong a tih.

¹⁹ Mi ṭiumtak, ṭawng inriltaka i hriet thei nawa ṭawng mihai, ṭawng danglam i hrietthiem nawa ṭawnghai chu hmu ta naw ti ni.

²⁰ Kan ruoiṭhena khawpui Zion khi en ta, i mit chun Jerusalem chu umna muongumtak, puon in iengtik khawma sawn lo ding, a keimarna hem iengtik khawma phawi lo ding, a keina hrui hrim hrim intan lo ding ang chu, hmûng a tih.

²¹ Chutaka chun Lalpa, vadung lientak tak le, vadungtêhai um nghên nghuonna hmun chu, ropuitakin ei kuomah um lem a tih; chuong tui chunga chun indona lawng lientak kheraval nei mi hrim hrim fe naw ni a, lawng lien ropuitak khawma fe khêl bawk naw nih.

²² Lalpa chu ei rorêltu a na, Lalpa chu dân mi petu a nih; Lalpa chu ei lal a na, ama chun mi sandam a tih.

²³ I hruihai chu sukfuolin a um a; an puon zâr bul chu an sukdet thei naw a, puon zâr chu an zâr thei naw a; chu lai tak chun râllâk sum tamtak chu semin a um a; kebaihai khawmin râllâk sum an lâk ta a.

²⁴ Chu khuoa um chun, “Ka damnaw ie,” ti naw ni a, a sûnga mi umhai chu suol ngaidamin um an tih.