ISAI 28 - Pathien Lekhabu Inthieng (BSI)

Ephraim ta dingin zillâwkna

¹ Ephraimhai zu inruihmanghai chapona lallukhum chung le, an mawina ropui pâr ṭuoi mêk, uoin inchie hnea umhai ruom ṭhatakin a khum chung chu a rik ie!

² Ngai ta, Lalpa chun mi hrât thilthawtheitak a nei a; ama chun riel nasatak tla dur dur, thlipui thil sukse rem rum ang le, tuilien nasatak lien zur zur ang elin, hnuoiah pei chawr a tih.

³ Ephraimhai zu inruihmang chapona lallukhum chu sirdein um a ta;

⁴ an mawina ropui pâr ṭuoi mêk, ruom ṭhatakin a khum chu, nipui hmaa theichang hmin hmasa tak, a entuin a hmu a, a kuta a um phinga a fâk zo el hlak ang chu nîng a tih.

⁵ Chu nia chun sipaihai Lalpa chu, a mi la um sunhai ta dingin ropuina lallukhum dâm, mawina lukhum dâm,

⁶ rorêl dinga ṭhung ta dinga rorêlna thlarau dâm, kul kawtkhâr bula hung thawtuhai dangkîrtuhai ta dinga hrâtna nîng a tih.

Jerusalem ta dinga zillâwkna le thutiem

⁷ Nisienlakhawm, chuonghai khawm chu uoin leiin an thle an thle a, zu leiin an pêm an pêm a, thiempuhai le zâwlneihai chu zu leiin an thle a, uoin lem zoin an um a, zu leiin an pêm an pêm a; inlârna thuah an thle an thle hlak a, rorêlna thuah an pêm an pêm hlak.

⁸ Hmun fai hrim hrim um naw khawpin dawkân po po chu luok le thil pawrchein a sip a nih.

⁹ Hrietna tieng chu tu hîm ân chûktir ding a ni leh? Thucha chu tu hîm ân hriettir ding a ni leh? Nene nêk bân chauhai le nêne innêktir ta lohai hîm an ni ding?

¹⁰ Thununna thu chunga thununna thu inchuon a, thununna thu chunga thununna thu inchuon a, dân chunga dân inchuon a, dân chunga dân inchuon a; hitakah tlâwmte, sawtakah tlâwmte, ti ruok a ni si a.

¹¹ Anih, nisienlakhawm, hmûr danglam put mi hmangin, ṭawng dangin hieng mihai kuoma hin thu hril lem tâng a tih:

¹² “Hi hi a nih châwlna chu, sâwlhai chu inchâwltir ro; hi hi a nih insukharna chu,” a tihai chu: nisienlakhawm, an ngai nuom si nawh.

¹³ Chuleiin, an fe a, an thala an tlûk a, an kawinawi a, chânga an âwk a, mana an um theina dingin, Lalpa thu chu annirawi ta ding chun, thununna thu chunga thununna inchuon a, thununna thu chunga thununna inchuon a, dân chunga dân inchuon a, dân chunga dân inchuon a; sawtakah tlawmte, hitakah tlâwmte ti ruok ni el a tih.

¹⁴ Chuleichun, mi hmusit hmanghai, hieng mihai, Jerusalema umhai ro rêlpêktuhai, Lalpa thu hi hre ro.

¹⁵ “Thina kuomah thu kan thlung tah, Seol leh thu kan intiem tah; vuokna tui lien liem chu a luong tlang pha khawm keini chen chun luong naw nih; khêl thu dâm kan inhumhimna dingin kan hmang a, khêl hnuoiah kan inbihmang ta si a,” in ti leiin;

¹⁶ chuleiin, Lalpa Pathien chun hieng ang hin a hril, “Ngai ta, lung, lung fie hnung, a kia lung hlutak ka phûm, dettak chu, Ziona chun lungphûm dingin ka rem hi; ama ringtu chu inhmaw naw nih.

¹⁷ Rorêlna fel chu a suktlûnna hruiin hmang ka ta, felna chu a dârmûmkhaiah hmang ka tih, riel chun inhumhimna khêl thuhai chu dêng hmang vawng a ta, tuihai chun inbîkhmangna chu chîm tlum a tih.

¹⁸ Chun, thina kuoma in thuthlung chu sûtin um a ta, Seol le in thutiem khawm chu ngir suok naw ni, vuokna tui lien liem chu a luong tlang pha chun, chu pha chun sirdein um in tih.

¹⁹ A luong tlang po leh la pei a ti cheu a; tûk tin tûk tinin, a sûn a zânin, a luong tlang âwm si a; thu incha umze hriet chu thil râpthlâk ruok nîng a tih,” tiin.

²⁰ Khum chu inthluongna dingin a tawi ta law si a; puonthuo chu inkhumna dingin a chîn talaw bawk si.

²¹ A sin, a sin danglam chu, a thaw theina ding le, a thilthaw, a thilthaw danglam chu a muolsuo theina dingin, Lalpa chu Perazim tlânga a tho ang khan a tho ding a ni si a, Gibeon ruoma a lunginsen ang khan a lunginsen ding a ni si a.

²² Chuongchun, mi hmusit hmangtuhai ni ta naw ro, chuong naw chun, in kawl bunhai chu ringumtakin siem rawi an tih; tâwpna, tâwpna tlung ngei dinga ruot tlat chu, hnuoi pumpui chunga a tlung ding thu, Lalpa, sipaihai Lalpa kuoma inthawk chun ka hriet si a.

²³ Na sit unla, ka râwl hi hre ro, ngai unla, ka thu hril hi hre ro.

²⁴ Hnuoi inlettu chun chi thena dingin hnuoi chu ân let ân let el hlak am a nih? a hnuoi tlanghai chu a suknawiin a sukphit zing hlak am a nih?

²⁵ A chung chu a chawkruol zoin Mohuri chu a thedar ni lo am a nih? Zira dâm khawm a the ni lo am a nih? Bu dâm chu a tlarin, buṭei dâm chu hmun ruotah, mimhai khawm chu a hnâwm hrûlah a tû hlak ni lo am a nih?

²⁶ A Pathien chun ama chu feltakin a thununin ân chûktir hlak si a.

²⁷ Mohuri chu bu chîlna khâwl ngeiin an chil ngai si naw a, zira chungahai chun tawlailîr kehai chu an inhlumtir ngai bawk nawh; mohuri chu hmawlin an vuok lem hlak.

²⁸ Beiphit bu chu râwtnawiin a um hlak, kumkhuoin a vuok zing âwm si naw a, tawlailîr ke le a sakawr chun sukdar sienla khawm, ân râwtnawitir ngai nawh.

²⁹ Chuong khawm chu sipaihai Lalpa, inrâwnna kawnga mi maktak le, varna kawnga mi ṭhatak kuoma chu a suok a nih.