ISAI 26 - Pathien Lekhabu Inthieng (BSI)

Lalpa vêngnaa innghatna hla

¹ Chu nia chun Juda ramah hi hla hi sak an tih; “Khawpui dettak ei nei a, ama chun sandamna chu kul banghai le kulpuihai leh ruot a tih.

² Hnam fel thutak zâwmtu chu a lût theina dingin kul kawtkhârhai chu hawng ro.

³ I chunga lungril innghattu chu nang a ring che leiin, lungmuongtaka um dingin vêng i tih.

⁴ Lalpa chu kumkhuoin ring ro; Lalpa JEHOVAA chun kumkhaw lungpui chu a um si a.

⁵ Ama chun insângtaka umhai chu a suktlâwm ta si a, khawpui insângtak chu; chu chu a sie hnuoi a, hnuoi tlung rakin a sie hnuoi a, pilvut tlung rakin a sukthlûk a.

⁶ Ke chun sirdêng a ta, rimsihai ke le pasiehai kalchawi ngei chun.

⁷ Mi fel lampui chu indikna a na, nang lungril indiktak put chun mi fel lampui chu i sukruol hlak.

⁸ Anih, Aw Lalpa, i rorêlna lampuia chun kan nghâk zing che a, kan hringna dit zâwng chu i hming tieng le i hriet zingna tieng hi a nih.

⁹ Ka hringna hin zâna chun a ngai che a; anih, ka sûnga thlarau um hin zîngkâr chun ka zawng che; i rorêlnahai chu hnuoiah a um po leh khawvêla umhai chun felna chu an inchûk hlak si a.

¹⁰ Mi rilo chu ditsakin um sienla khawm, felna inchûk chuong naw nih: indikna rama chun indik nawtakin thâwng a ta, Lalpa ropuina hmu chuong naw ni.

¹¹ “Lalpa, i kut chu pharin a um a, nisienlakhawm, an hmu si nawh; amiruokchu, mihai ta dinga i ṭhahnemngaina chu hmûng an ta, inzak tâng an tih; anih, nangma dotuhai chu meiin kâng hmang a tih.

¹² Lalpa, nangin inremna mi ruotpêk i ta; nangin kan sin po po khawm i mi thawpêk si a.

¹³ Aw Lalpa kan Pathien, nang chau ni lovin, lal dang khawma kan chungah thu an nei ta hlak a, nisienlakhawm, nangma ṭhangpui ngeiin i hming hi lam tâng kan tih.

¹⁴ Anni chu an thi ta a, hring nâwk ta naw ni hai, an bo ta a, tho nâwk ta naw ni hai; chuleiin, nangin anni chu hremin i suksiet a, an hriet zingna po po khawm i sukbohmang tah.

¹⁵ Hi hnam hi i sukpung ta a, aw Lalpa, hi hnam hi i sukpung tah; nang chu chawimawiin i um ta a, hi ram hi a ramri po po chu i suklien tah.

¹⁶ “Lalpa, an lunginzîng lai chun an sir hlak che a, i hremna chu an chunga a tlâk lai chun an ṭawngṭai zawmzawt a.

¹⁷ Nuhmei nau vawn, nei hun ta chu, a na hlak a, nauhasea a khêk rawng rawng hlak ang hin, aw Lalpa, keini khawm i hmaah kan um hlak kha.

¹⁸ Nau kan vawn a, kan na a, thli ang chau el kan nei kha, hnuoia hin sansuokna kawng hrim kan sukkaw naw a, khawvêla umhai hlak an tlu bawk nawh.

¹⁹ I mithihai chu hring nâwk an ta, an ruonghai chu tho nâwk an tih. Pilvuta umhai, har unla, hlimtakin hla sak ro, i daidâw chu thlaihai daidâw ang a na, hnuoi hin mithihai chu a pei suok ding a ni si a,” ti hi.

²⁰ Hung ta u, ka mihai, in pindan sûngahai lût unla, in kawthai chu inkhâr khum ro, lungninawna hi ân kieng hmakhat chun mitkhapkâr chau bêk inbihmang ro.

²¹ Ngai ta u, Lalpa chu, an suolna leia hnuoia umhai hrem dingin a umnaa inthawk chun a hung ṭum ding a nih; hnuoi khawm hin a thisenhai chu suklang a ta, mi an thathai chu inkhum ta naw ni.