ISAI 25 - Pathien Lekhabu Inthieng (BSI)

Lalpa ditsakna leia inpâkna hla

¹ Aw Lalpa, nang chu ka Pathien i na; chawimawi ka ti che a, i hming inpâk ka tih; thil maktak, inhmaa remruothai chu, ringumtak le thutakin i thaw si a.

² Khawpui khawm hnuoi pâwngah în changtir a; khuo kulpui nei khawm khaw ṭawpah în changtir a; ram dang mihai lal in khawm bâwlin um nâwk ta naw nih.

³ Chuleiin, mi hrâttakhai chun chawimawi an ti che a, hnam ṭiumtak khawpuihai chun ṭîng an ti che.

⁴ Mi ṭiumhai thuok chu thlipuiin bang a nam sawk sawk anga a hung um lai hin, nang chu mi rimsihai ta dingin kulbîng, pasie lunginzîng laia dinga kulbîng, thlipuia inthawka inhumhimna, nisa sat hlietu i ni hlak si a.

⁵ Hmun ṭâwla khaw lum chu i sukre hlak ang hin ram dang mihai ri chu sukbo i tih, khaw lum chu sûm hlieha sukboa a um hlak ang hin, mi ṭiumhai hla sak chu sukboin um a tih.

⁶ Chun, hi tlânga hin sipaihai Lalpa chun mi tinrênghai ta dingin thil thauhaiin ruoi ṭhêng a tih, uoinhai a fe le inchie zing, thil thautakhai thlina sip, uoinhai a fe le inchie zing ṭhataka thlit fai chu.

⁷ Chun, mi tinrêng an inkhumna le, hnam tinrêng an inkhumna chu, hi tlânga hin suksieng a tih.

⁸ Thina chu a lem sawng tah; Lalpa Pathien chun mi po po hmaia inthawk chu mitthlihai chu hrufai a tih; a mihai hming sietna chu leihnuoi po po chunga inthawk hin la hmang a tih; Lalpain chu chu a hril ta si a.

⁹ Chun, chu nia chun, “Ngai ta u, hi hi ei Pathien a ni hi, ama hi ei nghâk zing a; chuongchun, ama chun mi sandam a tih: hi hi Lalpa chu a ni hi; ama hi ei nghâk zing a, a sandamnaa chun hlimin lâwm ei tih,” tîng an tih.

¹⁰ Hi tlânga hin Lalpa kut chu innghat a ta. Moab chu, bupâwl chu êkthlia sirdea a um hlak ang hin, ama hmunah sirdein a um ding a ni si a.

¹¹ Chuongchun, tui inhlieuin tui inhlieu dinga a vai ang hin, chu lai chun a kut chu vai a tih; chun, a chapona chu a kut vervêk pum chun Lalpa chun sie hnuoi a tih.

¹² Chun, i kul banghai, in insâng kulpui chu sukchimin, sie hnuoiin, hnuoiah, pilvut tlung khawp rakin sukthlûng a tih.