ISAI 24 - Pathien Lekhabu Inthieng (BSI)Hnuoi chunga Lalpa rorêlna 1 Ngai ta, Lalpa chun hnuoi hi sukruokin, a sukram ding a na, a letkhupin, a umhai chu a sukdar ding a nih. 2 Chun, vântlâng chunga a um angin, thiempu chunga khawm um a ta, suokpa chunga a um angin a pu chunga khawm um a tih; suoknu chunga a um angin a pi chungah um a ta; inchawtu chunga a um angin a zawrtu chunga khawm um a tih; inpûktirtu chunga a um angin a pûktu chunga khawm um a tih; a pung hnawta inpûktirtu chunga a um angin a kuoma a pung petu chunga khawm um a tih. 3 Hnuoi hi sukruok fai dêr le, suksiet fai dêrin um a tih; chu thu chu Lalpain a hril ta si a. 4 Hnuoi hi a ṭapin a ṭuoi a, khawvêl hi a ṭuoiin a châu a, hnuoia mi chunghnunghai chu an châu ie. 5 Hnuoi hi a umhai hnuoia chun a pawrche zo ta a; dânhai chu an bawsiet a, thuruot chu an sukdanglam a, kumkhaw thuthlung chu an bawsiet leiin. 6 Chuleiin, ṭawngsie inphurnain hnuoi a fâk zo a, a umhai chu thiemnaw inchangtirin an um tah; chuleiin, hnuoia umhai chu an kâng hlum a, mi tlâwmte chau an um tah. 7 Uoin thar chu a ṭap a, grêphrui chu a châu ie, lungrila hlim po pohai chu an inrûm ie. 8 Khuongtêhai hlimna chu a re a, lâwmtaka umhai ri chu a dei ie, ṭingṭang hlim ri chu a re ie. 9 Hla sak pumin uoin dâwn naw ni hai, zu chu a dâwntuhai ta dingin khatak nîng a tih. 10 Buoina khawpui chu sukchimin a um tah; tukhawm an lût nawna dingin in tin chu khârin a um tah. 11 Uoin leiin kawtthlêrahai chun ṭap ri a um a, hlimna po po sukthimin a um a, hi ram hlimna hi a bo tah. 12 Khawpuia chun rausanna mâksanin a um a, a kul kawtkhâr chu vuok sietin a um tah. 13 Hnuoi lailia mi tin lai chun hieng ang hin a la um ding a ni si a, oliv thing vuok hnunga a ra la um hlak ang le, grêp lo hnunga grêp hmu ṭhel lo ding a la um hlak ang el hin. 14 Chuonghai chun an râwl insuong an ta, khêk an tih; Lalpa ropuina leiin tuisuorieta inthawkin inringtakin an khêk ie. 15 Chu chu lei chun Lalpa chu khawsaktieng chun chawimawi ro, Lalpa Israelhai Pathien hming ngei chu tuisuoriet thlierkârahai chun chawimawi ro. 16 Kâwlkawdawnga hla sakhai kan hriet a, “Mi felhai kuomah ropuina um raw se,” ti hla hi. Nisienlakhawm, kei chun, “Ka chêr deu deu a, ka chêr deu deu a, ka chung a rik ie! vervêktaka thawtuhai chun vervêktakin an thaw a, anih, vervêktaka thawtuhai chun vervêktakin an thaw,” ka ti a. 17 Aw hnuoia um, ṭitumna dâm, khur dâm, châng dâm chu i chungah a um a. 18 Chuongchun, ṭitum ria inthawka tlânhmang chu khura chun tlâng a ta; khur sûnga inthawka hung suok chu chângah âwk a tih; chungtienga tukverhai chu hawngin a um si a; leihnuoi innghatsan chu ân hnîng bawk a nih. 19 Hnuoi hi a kawi se vawng a, hnuoi hi sukboin a um tah, hnuoi hi nasatakin ân hnîng a. 20 Hnuoi hi zu inrui ang elin pêm thlawk thlawk a ta, bûktê insâwi angin insâwi dar dar a tih; a bawsietna chu a chungah riktakin um a ta, chuongchun, tlûng a ta, tho nâwk ta naw nih. 21 Chun, chu nia chun Lalpa chun chungtienga mi achunghnunghai pâwl lientak chu hrem a tih, hnuoia hnuoi lalhai leh. 22 Chun, mi intânghai khursûnga ṭhuoi khâwma an um angin chuonghai chu ṭhuoi khâwmin um an ta, intângna ina khumin um an ta, ni sâwttak hnunga chun hremin um an tih. 23 Chu hnunga chun thla khi inzaktakin um a ta, nisa khi muolphotakin um a tih; sipaihai Lalpa chu Zion tlâng le, Jerusalem khuoa le, a upahai hmaa chun, ropuitakin lalah a um ding a ni si a. |
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
Bible Society of India