ISAI 21 - Pathien Lekhabu Inthieng (BSI)

Tuipui thlalêra rimsikna hung tlung ding

¹ Tuipui thlalêr phurrik chu. Sim rama thlivirin hung mûthmât peiin, thlalêra inthawkin, ram ṭiumtaka inthawk chun, a hung ie.

² Inlârna khirkhântak el ka kuomah inhriettir a ni tah; vervêktaka thawtu chun vervêktakin a thaw a, rawktu chun a rawk a. Aw Elam mihai, hang fe ro; aw Media mihai, inhuol ro; an inrûmna po po chu ka sukbo vawng tah.

³ Chuleiin, ka kâwnghai hi natna nasatakin a sip a, nuhmei nau invawi natna angin natnain a mi man ta a; naa hre thei lo khawp hielin na ka tuor a; khaw hmu thei lo khawp hielin ka lunginzîng a.

⁴ Ka lungril hi ân thuok hlawp hlawp a, thil râpthlâktakin a mi suklâu a; zântieng dei ka nghâkhla hlak kha ka ta dingin inthinnaah ân chang a,

⁵ Dawkân chu an buotsai a, râlvêngtu chu an invêngtir a, an fâk a, an dâwn a; mi lienhai, tho unla phaw kha hriek nâl ro.

⁶ Lalpa chun ka kuomah hieng ang hin a hril a nih, “Fe la, râlvêngtu invêngtir rawh; ama chun a thil hmu chu hril raw se.

⁷ Chun, sipai pâwl dâm, sakawr chung chuong a kawp peia fe dâm, sabengtung pâwl dâm, sanghâwngsei pâwl dâm, a hmu pha chun nguntakin ngaithlâng a tih,” tiin.

⁸ Chun, ama chu sakeibaknei angin ân rûm a, “Aw Lalpa, sûna chun râlvêng bûk chunga hin ka ngîr rawp a, zânkhawvârin ka vêngnaa hin i mîn umtir rawp a;

⁹ ngai ta, hitaka hin mihriem pâwl, sakawr chung chuong a kawp peia fe an hung ie,” tiin. Chun, ama bawk chun, “Babulon khuo chu a tlâwm tah, a tlâwm tah; an thiempuhai milim siem fâwmhai po po chu hnuoia suknâwiin a um tah,” tiin a dawn a.

¹⁰ Aw ka bu vuok sa, ka hrizâwla bu; sipaihai Lalpa Israelhai Pathiena inthawka ka hriet chu ka hril cheu a ni hi.

Duma chunga rimsikna hung tlung ding

¹¹ Duma phurrik chu. Mîn Seir tlânga inthawkin an mi ko a, “Râlvêngtu, zân hi iengchen am a liem ta a? Râlvêngtu, zân hi iengchen am a liem ta a?” tiin.

¹² Râlvêngtu chun, “Zîngkâr a hung ni ding a ni tah, zân khawm: in indawn nuom chun indawn ro: nghakîr nâwk unla, hung ro,” a ta.

Arabia chunga rimsikna hung tlung ding

¹³ Arabia ram chunga phurrik chu. Aw Dedanhai khuol inzin pâwl tinhai, Arabia rama ramhnuoiah riek in tih. Dangchâr kuoma chun tui an hung lâk a.

¹⁴ Dabgchârhai kuomah tui hung chawi unla, aw nangni Tema ram hluotuhai,tlânhmanghai ta dingin bu hung chawi ro.

¹⁵ Kâwlhnâmhaia inthawkin, kâwlhnâm phawisahaia inthawkin le, thalngul kuoisaa inthawk le indona nasataka inthawka tlân hmang an ni si a.

¹⁶ Lalpa chun hieng ang hin ka kuomah a hril, “Inhlawfa kum tiema kum khat sûngin Kedarhai ropuina po po chu bo zo vawng a ta,

¹⁷ thal kâp mi, Kedar thlahai laia mi hrât tak la um sunhai chu, tlâwmte nîng an tih: Lalpa Israelhai Pathien chun chu chu a hril ta si a,” tiin.