INṬANNA 3 - Pathien Lekhabu Inthieng (BSI)

Mihriem tlûkna

¹ Chun, Lalpa Pathienin ramsa a siem danghai po po nêkin rûl a var vervêk tak a. Ama chun nuhmei kuoma chun, “Pathienin ‘Huona thei ra hrim hrim hi in fâk ding a ni nawh,’ a ti am a nih?” a ta.

² Nuhmei chun rûl kuoma chun, “Ti lo e, huona thing rahai hi kan fâk thei a;

³ huon lailung lai taka thing um, chu ra ruok chu Pathienin, ‘in fâk ding a ni naw a, tâwk khawm in tâwk ding a ni nawh, chuong naw chun thîng in tih,’ a ti a nih,” a ta.

⁴ Rûl chun nuhmei kuoma chun, “Thi naw tawp in tih;

⁵ in fâk nia inthawk chun in mit hung var a ta, a suol le a ṭha hrein Pathien ang in hung ni ding a nih ti Pathienin a hriet zing a ni chu,” a ta.

⁶ Chuongchun, nuhmei chun thing ra chu fâk dinga ṭha a nih ti le, mit latak a nih ti le, mi sukvar dingin thing ra inhnarumtak a nih ti a hriet chun a ra chu a lo a, a fâk ta a; a kâwla um a pasal kuoma khawm chun ṭhen khat a pêk a, ama khawm chun a fâk ta a.

⁷ Chuongchun, an pahni chun an mit a hung var a, saruok an nih ti an hung inhriet ta a; theichang hna an ṭhui mat a, puonbil an insiem fâwm ta a.

⁸ Chun, Lalpa Pathien chu zântieng nisa deia huona a hung lêng chu an hriet a: chuongchun, Adam le a nuhmei chun huona thing lai chun Lalpa Pathien chu an lo inbîksan ta a.

⁹ Chun, Lalpa Pathien chun mihriem chu a ko a, a kuomah, “Khâwlai am i um a?” a ta.

¹⁰ Ama chun, “Huonah i ri ka hriet a, saruok ka ni leiin ka ṭi a, chuongchun, kân bihmang a nih,” a ta.

¹¹ Ama chun “Saruok i nih ti tuin am a hril che a? Thing ra fâk lo ding ka ti kha i fâk a ni maw?” a ti a.

¹² Mihriem chun, “A mi umpui dinga nuhmei i mi pêk ngei khan thing ra chu a mi pêk a, ka fâk ta a nih,” a ta.

¹³ Chun, Lalpa Pathien chun nuhmei kuoma chun, “I thilthaw hi iengtizie am a na?” a ta. Nuhmei chun, “Rûlin a mi hlêm a ka fâk tah a nih,” a ta.

¹⁴ Lalpa Pathien chun rûl kuoma chun, “Hieng ang hi i thaw leiin ran po po le ramsa tinrêng laia chun ṭawngsephurin um bîk i ta, bawkkhupin lâwn tâng i ta, i dam sûngin pilvut fa bawk i tih;

¹⁵ nang le nuhmei hi indotir ka ti cheu a, i thlahai le a thlahai khawm lân dotir bawk ka tih; ama chun i lu la sukthitling a ta, nangin a kekhawng la sukthitling i tih,” a ta.

¹⁶ Nuhmei kuoma chun, “Nau vawnna le nau neinaa i rinumna chu nasatakin sukpung ka ta, natak tuorin nau nei hlak i ta; nisienlakhawm, i nuom zâwng chu i pasal tieng nîng a ta, ama chun i chungah thu nei a tih,” a ta.

¹⁷ Chun, Adam kuoma chun, “I nuhmei thu i zâwm a, thing pakhat, ‘A ra i fâk ding a ni nawh,’ tia thu ka pêk che kha a ra i fâk leiin hnuoi hi nanga leiin ṭawngsephurin a um tah a nih; i dam sûngin inrimtaka sinthawin a ra chu fa tâng i tih;

¹⁸ hling le buorhai khawm insuopêk a ti che; chun, hnuoia thlai chu fa tâng i ta;

¹⁹ hnuoia i kîr nâwk hmakhat chu, i hmaiah thlan luong rak khawpin bu fa tâng i tih; hnuoia inthawka lâk suok i ni si a, pilvut i ni a, pilvutah i kîr nâwk ding a nih,” a ti a.

²⁰ Chun, mihriem chun a nuhmei chu mi hring po po nu a ni leiin a hmingah Evi ân bûk a.

²¹ Chun, Lalpa Pathien chun, Adam ta ding le a nuhmei ta ding chun savun zakawfuolhai a siempêk a, ân hâktir ta a.

²² Chun, Lalpa Pathien chun, “Ngai ta u, mihriem chu a suol le a ṭha hrein eini laia pakhat ang a hung ni ta a; tuhin chu a kuta banin, hringna thing ra chu loa fain, kumkhuoin hring rawi a tih,” a ta,

²³ chuleiin, Lalpa Pathienin ama a lâksuokna hnuoi chu inlet dingin Eden huona inthawk chun a tir suok ta a.

²⁴ Chuongchun, mihriem chu a hnawt dawk ta a; chun, hringna thing lampui chu vêng dingin Eden huon saktieng panga chun Cherubhai le mei kâwlhnâm inlet tuo zawk zawk chu a sie ta bawk a.