INṬANNA 29 - Pathien Lekhabu Inthieng (BSI)

Rakil le Leah hlaw dinga Jakobin Laban rawng a bâwl

¹ Chu hnunga chun Jakob chu a fe pei a, khawsak nauhai ram chu a hung tlung ta a.

² A hang en chun phûla tuisunsuo um hi a hmu a, a kâwla chun berâm ruol thum hi an um zing a; chu tuisunsuoa inthawk chun berâm ruolhai chu tui an indâwntir hlak a nih: tuisunsuo kawta lung um chu a lien hle el a.

³ Chutaka chun berâm ruol po po chu an fe khâwm hlak a, tuisunsuo kawta lung chu an inhlum hmang a, berâmhai chu tui an indâwntir a, lung chu tuisunsuo kawta a umna pângngaia chun an sie nâwk hlak a.

⁴ Jakob chun an kuomah, “Ka unauhai, khawtienga mi am in ni a?” a ti a. Anni chun, “Harana mi kan nih,” an ti a.

⁵ Ama chun an kuomah, “Nahor naupa Laban in hriet am?” a ti a. Anni chun, “Hre e,” an ti a.

⁶ Ama chun an kuomah, “A dam lai a ni?” a ti a. Anni chun, “A dam lai a ni ie, en ta, a naunu Rakil khawm berâm ṭhuoiin a hung saw,” an ti a.

⁷ Ama chun, “Ngai ta u, nisa khawm a lân sâng hle a, ran ṭhuoi khâwm khawm a la hun naw a: berâmhai hi tui indâwntir unla vân thla ro khai,” a ti a.

⁸ Anni chun, “Thei naw ning ungah, berâm ruol po po an fe khâwm a, tuisunsuo kawta lung hi an inhlum sawn hmakhat chu; chu hnunga chun berâmhai chu tui kan indâwn tir hlak a nih,” an ti a.

⁹ Anni a la biek lai chun Rakil chu a pa berâmhai ṭhuoiin a hung tlung a; ama chun a vêng hlak a ni a.

¹⁰ Chun, Jakob chun a nu ṭapa Laban naunu Rakil le, a nu ṭapa Laban berâm ruol chu a hmu chun a va hnai a, tuisunsuo kawta lung chu ân hlum hmang a, a nu ṭapa beramhai chu tui ân dâwntir a.

¹¹ Chun, Jakobin Rakil chu a fâwp a, inringtakin a ṭap ta a.

¹² Chun, Jakobin ama chu chu minu pa tupa a nizie le Rebeka naupa a nizie Rakil chu a hril a; chuongchun, Rakil chu a tlân a, a pa a va hril ta a.

¹³ Laban chu a farnu naupa Jakob chanchin a hriet chun, a tuok dingin a tlân a, a kuo a, a fâwp a, ama chu a inah a ṭhuoi ta a. Chun, Jakobin chuong thu po po chu Laban a hril ta a.

¹⁴ Laban chun a kuomah, “Ka tisa le ka ru ngei i ni chu tie,” a ti a. Chun, thla khat a kuomah a um ta a.

¹⁵ Chun, Labanin Jakob kuomah, “Ka tupa i ni leiin a thlâwnin ka rawng i bâwl ding am a ni? Iengam hlâwng i ta? mi hril raw khai,” a ta.

¹⁶ Laban chun naunuhmei pahni a nei a,a upa lem hming chu Leah a ni a, a naupang lem hming chu Rakil a nih.

¹⁷ Leah chu mitmeng inkhup deutak a ni a, Rakil ruok chu pieng ṭhatak, hmêl ṭhatak a nih.

¹⁸ Jakob chun Rakil chu a hmangai a; chuongchun, “I naunuhmei naupang lem Rakil hi nei dingin kum sari i rawng bâwlpêk ka ti che,” a ti a.

¹⁹ Laban chun, “Ama chu mi dang kuoma ka pêk nêk chun i kuoma ka pêk chu ṭha lem a tih, ka kuomah um zing el rawh,” a ta.

²⁰ Jakob chun Rakil nei ding chun kum sari chu rawng a bâwl ta a, nisienlakhawm, Rakil chu a hmangai êm leiin ni sâwt nawte ang chauin a hriet a.

²¹ Chun, Jakobin Laban kuomah, “Ka pâwl theina dingin ka nuhmei chu mi pe raw le, ka hun a kim ta si a,” a ta.

²² Chuongchun, Laban chun chu khuoa mi po po chu a khâwm vawng a, ruoi a ṭhe a.

²³ Chun, thimbut hin a naunu Leah chu a ṭhuoi a, Jakob kuomah a ṭhuoi lût a; ama chun a lo pâwl a.

²⁴ (Laban chun a suoknu Zilpah chu a naunu Leah kuoma chun a suoknu dingin a pêk a).

²⁵ Chun, zîngtieng a hung ni chun Leah a lo ni zing el a; chuongchun, Jakobin Laban kuomah, “Ka chunga i thilthaw hi iengtizie am a ni a? Rakil nei dingin i rawng ka bâwl ni lo am a nih? Iengdinga i mi hlêm am?” a ti a.

²⁶ Laban chun, “Kan rama hin chuong anga nau a u hmaa a naupang lem infetir chu dân a ni naw ie.

²⁷ A pakhata inneina chawlkâr chen chu tlingtla phawt la, chun, kum sari dang ka rawng i bâwl nâwk ding chun a dang khawm chu pêng kan ti che,” a ta.

²⁸ Jakob chun chuong ang chun a thaw a, chu nu chawlkâr chu a tlingtla a, chuongchun, a naunu Rakil chu a nuhmei dingin a pêk ta a.

²⁹ (Laban chun a suoknu Bilha chu a naunu Rakil suoknu dingin a pêk a).

³⁰ Jakob chun Rakil khawm chu a pâwl a, Leah nêk chun Rakil chu a hmangai lem bawk a, Laban rawng chu kum sari dang a bâwl nâwk ta a.

Jakob nauhai

³¹ Chun, Lalpain Leah chu theidain a um ti a hriet a, chuongchun, a sul a hawngpêk a. Rakil ruok chu a ching a.

³² Chun, Leah chu ân rai a, naupasal a nei a, a hmingah Reuben a sak a: “Lalpa chun ka rinumzie a hmu leiin a ni hi; tuhin chu ka pasalin mi hmangai tâng a tih,” a ti a.

³³ Chun, ân rai nâwk a, naupasal a nei nâwk a, “Lalpa chun theidain ka um ti a hriet leiin hi khawm hi a mi pêk a ni hi,” a ti a; chuongchun, a hmingah Simeon a sak a.

³⁴ Chun, ân rai nâwk a, naupasal a nei nâwk a, “Tu zêt hin chu naupasal pathum ka neipêk ta a, ka pasalin mi zâwm tâng a tih,” a ti a: chuleiin, a hmingah Levi sak a nih.

³⁵ Chun, ân rai nâwk a, naupasal a nei nâwk a, “Tuta ṭum hin chu Lalpa chu inpâk ka tih,” a ti a; chuleiin, a hmingah Juda a sak a, chu hnung chun nau a nei nâwk ta nawh.