INṬANNA 24 - Pathien Lekhabu Inthieng (BSI)

Isak nuhmei ding hmupêka a um thu

¹ Chun, Abraham chu a hung upa a, a hung tar ta hle a; chun, Lalpain Abraham chu thil iengkimah mal a sâwm ta a.

² Chun, Abraham chun a siehlaw, a in sûnga upa tak, a nei po po chunga thuneitu kuoma chun, “Lunginsiettakin i kut kha ka elpui hnuoiah rawl rawh;

³ chuongchun, Lalpa, vân Pathien le hnuoi Pathien chu sâlin, ka umna Kanaan mihai nunghâk laia mi hi ka naupa nuhmeia neipêk lo dingin, ṭawng kân khâmtir ding che a nih;

⁴ ka ram tieng, ka laibunghai laia fein, ka naupa Isak hi nuhmei i neipêk lem ding a nih,” a ta.

⁵ Siehlaw chun a kuomah, “Nuhmei chun hi ram tieng hin a mi zui nuom kher da el rawi mawh, i naupa hi i hung suokna ram tieng chun ka ṭhuoi kîr ding am nîng a ti?” a ta.

⁶ Abraham chun a kuomah, “Ka naupa hi chutaka chun ṭhuoi kîr nâwk naw dingin fimkhur rawh.

⁷ Lalpa vân Pathien, ka pa ina inthawk le ka piengna rama inthawka mi ṭhuoi suoktu le, a mi betu, ‘Hi ram hi i thlahai kuomah la pêng ka tih,’ tia ka kuoma inkhâma hriltu chun, ama ngeiin vântirko chu i hmaah infetir a ta, chutaka inthawk chun ka naupa hi nuhmei i hung neipêk ding a nih.

⁸ Chun, nuhmei chun a zui nuom naw che chun, ka kuoma i înkhâmna kawnga hin inthieng el i tih; iengkhawm ni sien ka naupa hi chutaka chun i ṭhuoi kîr nâwk ding a ni nawh,” a ti a.

⁹ Chuongchun, siehlaw chun a kut chu a pu Abraham êlpui hnuoia chun a rawl a, chu thua chun a kuoma chun ân khâm ta a.

¹⁰ Chun, siehlaw chun a pu sanghâwngsei laia mi sanghâwngsei sâwm a ṭhuoi a, a pu thil ṭha tinrêng chawiin a suok ta a: chuongchun, a tho a, Mesopotamia rama Nahor-hai khuoa chun a fe ta a.

¹¹ Chun, zântienga nuhmei ruol tui chawi dinga an suok hun lai tak chun, khawhnâwmah tuisunsuo kâwla chun a sanghâwngseihai chu ân dingṭhaṭhuontir a.

¹² Chun, “Aw Lalpa, ka pu Abraham Pathien, lunginsiettakin vawisûn hin mîn hlawtlingtir la, ka pu Abraham chunga chun lunginsietna inlangtir rawh.

¹³ En ta, tuikhur kâwlah ka ngîr a, khuoa mihai naunuhmei ruol khawm tui chawi dingin an hung hi:

¹⁴ chuongchun, hieng ang hin ni raw se, nunghâk tu kuoma khawm, ‘Lunginsiettakin ka dâwn dingin i tuibêl kha sukhnuoi raw khai,’ tîng ka ta; ‘Dâwn rawh, i sanghâwngseihai khawm dâwn ding pêng ka tih,’ titu taphawt chu, chu ngei chu i siehlaw Isak ta dinga i ruot chu ni raw se; chutaka chun ka pu chungah lunginsietna în entir ti hrieng ka tih,” a ta.

¹⁵ Chun, a hril zo hmain, ngai ta, Abraham sangpa Nahor nuhmei Milka naupa Bethuel naunu Rebeka chu a liengkoa tuibêl putin a hung suok a.

¹⁶ Chu nunghâk chu a hmêl a ṭha hle a, nunghâk inthieng a ni a, pasal hrim hrimin an la pâwl ngai dêr nawh. Tuikhura chun a zu fe a, a tuibêl a thâl sip a, a hung tung ta a.

¹⁷ Chun, siehlaw chu ân tuokpui dingin a tlân a, “Lunginsiettakin i tuibêla tui kha tlâwmte mîn dâwntir raw khai,” a ti a.

¹⁸ Ama chun, “Dâwn ta la, pu,” a ta; inhmâwtakin a tuibêl chu a kutah a dawm thlâk a, ân dâwntir ta a.

¹⁹ Ama ân dâwntir zo chun, “I sanghâwngseihai khawm an dâwn khawp hmakhat chun chawi pei ka tih,” a ta.

²⁰ Chun, inhmâwtakin a tuibêl chu ran thlênga chun ân ruok a, tui chawi dingin tuisunsuo tieng chun a tlân nâwk a, a sanghâwngseihai po po ta ding chun a chawi ta pei a.

²¹ A vân zinnaa chun Lalpain ân hlâwtlingtir le tir naw hrietna dingin siehlaw chun amanu chu to ṭawkin a en zing a,

²² sanghâwngseihai chun an dâwn khawp phingleh, siehlaw chun rângkachak hnâra inbûk duli bûk le, a kuta dingin bânbun pahni rângkachak tangka sâwm bûk a phawr a;

²³ a kuomah, “Tu naunu am i ni a, lunginsiettakin mi hril ta. I pa inah kan riekna ding hmun um a ti?” a ti a.

²⁴ Ama chun a kuomah, “Nahor ta dinga nei Milka naupa Bethuel naunu ka nih,” a ta.

²⁵ Ama bawkin a kuomah “Bupâwl le ran bu kan hau ve ve a, riekna hmun khawm kan nei,” a ti nâwk a.

²⁶ Chuongchun, siehlaw chun a lu a kûn a, Lalpa chu chibai a bûk a.

²⁷ Chun, “Ka pu chunga a lunginsietna le a takna bo ngailo Lalpa, ka pu Abraham Pathien chu inpâkin um raw se; kei khawm hi Lalpa chun ka pu unauhai in tieng a mi ṭhuoi a lo ni hi,” a ti a.

²⁸ Chun, nunghâk chu a tlân a, chuong thu chu a nu sûnghai a va hril a.

²⁹ Rebeka chun ṭapa a nei a, a hming chu Laban a nih: chuongchun, Laban chu a suok a, tuikhur tieng mi kuoma chun a va tlân a.

³⁰ Hnâra inbûk le a farnu kuta bânbunhai chu a hmu a, “Mi chun chuong ang khâng ang chun a mi tih,” tia a farnu Rebeka thu hril chu a hriet phingleh, mi kuoma chun a va fe a; chun, ngai ta, ama chu tuikhura sanghâwngseihai lai chun a lo ngîr zing a.

³¹ Chun, Laban chun, “Nang Lalpa malsâwmna dawngtu, hung lût rawh, iengdinga tuola i ngîr zing am? In le sanghâwngseihai ta ding hmun ka siemrêl tah a nih,” a ta.

³² Chun, chu mipa chu ina chun a lût a, chun Laban chun sanghâwngseihai thuomhnaw chu a sût a; sanghâwngseihai ta ding chun bupâwl le ran bu a pêk a, a ke le a ruolhai ke sâwpna dingin tui a pêk bawk a.

³³ Chun, Abraham siehlaw hmaa chun fâk ding an hung pêk bawk a; nisienlakhawm, ama chun, “Ka hungna san thu ka hril hmakhat chun fa naw ning,” a ti a. Ama chun, “Hril ta la,” a ti a.

³⁴ Chun, ama chun, “Abraham siehlaw ka nih.

³⁵ Lalpa chun ka pu chu nasatakin mal a sâwm a, mi lientak a hung ni a. Lalpa chun ama chu berâm ruol dâm, bâwng ruol dâm, tangka dâm, rângkachak dâm, suokpa dâm, suoknu dâm, sanghâwngseihai dâm, sabengtung dâm, a pêk bawk a.

³⁶ Ka pu nuhmei Sara chun a tar hnungin ka pu ta dingin naupasal a nei a; ama kuoma chun a nei po po a pêk vawng a.

³⁷ Ka pu chun, ‘Ka umna rama Kanaan mihai nunghâk laia mi hi ka naupa nuhmeiah i neipêk ding a ni nawh:

³⁸ ka pa in tieng, ka laibunghai laia fein, ka naupa ta dingin nuhmei i neipêk lem ding a nih,’ tiin ṭawng a mîn khâmtir a.

³⁹ Keiin ka pu kuoma chun, ‘Nuhmei chun a mi zui nuom da el rawi mawh,’ ka ti a.

⁴⁰ Nisienlakhawm, ama chun ka kuomah, ‘Lalpa a hmaa ka um hlakna chun a vântirko chu i kuomah tir a ta, i fena dinga chun inhlâwtlingtir a ti che; chuongchun, ka naupa ta dingin ka laibunghai le ka pa sûnghai laia mi nuhmeiah i neipêk ding a nih;

⁴¹ ka laibunghai kuom ngei i tlung pha chun în khâmnaa inthawk hin inthieng i tih, nunghâk chu an pêk naw che chun, ka kuoma în khâmnaa inthawk hin inthieng i tih,’ a ti a.

⁴² Chuongchun, vawisûn hin tuikhur chu ka hung tlung a, ‘Aw Lalpa, ka pu Abraham Pathien, ka fenaa hin i mîn hlâwtlingtir ding chun,

⁴³ en ta, tuikhur kâwlah ka ngîr hi: chun, hieng ang hin ni raw se, nunghâk tui chawi dinga hung suok tu kuoma khawm, “Lunginsiettakin dâwn dingin i tuibêla tui kha tlâwmte mi pe ta,” ka ti a:

⁴⁴ Chun, amân, “Dâwn rawh, i sanghâwngseihai ta ding khawm hin chawi ka tih,” titu taphawt chu, chu ngei chu ka pu naupa ta dinga Lalpa nuhmei ruot chu ni raw se,’ ka ti a.

⁴⁵ Chun, ka lungrila ka hril zo hma chun, ngai ta, Rebeka hi a tuibêl putin a hung suok a; chun, tuikhura chun a zu fe a, tui a zu chawi a; chun, a kuomah, ‘Lunginsiettakin tui mîn dâwntir ta khai,’ ka ti a.

⁴⁶ Ama hin inhmawtakin a liengkoa inthawk chun a tuibêl chu a dawm thlâk a, ‘Dâwn rawh, i sanghâwngseihai khawm hi dâwn ding pêng ka tih,’ a ta: chuongchun, ka dâwn a, sanghâwngseihai khawm ân dâwntir bawk a.

⁴⁷ Chun, keiin, ‘Tu naunu am i ni a?’ tiin kân dawn a. Ama chun, ‘Milka ineipêk Nahor naupa Bethuel naunu ka nih,’ a ti a; chun, hnâra inbûk chu a hnârah kân bûk a, bânbunhai chu a kutah kân buntir bawk a.

⁴⁸ Chun, ka lu ka kûn a, Lalpa chu chibai ka bûk a, Lalpa, ka pu Abraham Pathien, ka pu laibungpa naunu hi a naupa ta dinga nuhmeia neipêk dinga lampui indiktaka mi ṭhuoitu chu kân pâk bawk a.

⁴⁹ Chuongchun, tuhin, ka pu in lunginsiet a, a chungah thaw tak taka in thaw ding chun mi hril ro; in thaw naw ding khawmin mi hril bawk ro; chuongchun, ka thaw dân ding hre thei ka tih,” a ta.

Rebekain Siehlaw a zui

⁵⁰ Chun, Laban le Bethuel chun an dawn a, “Hi thil hi Lalpaa inthawka suok a ni hi, a sie a ṭha khawm i kuomah kan hril thei nawh.

⁵¹ En ta, Rebeka chu i hmaa hi a um annâwm, ṭhuoi la fe el rawh, Lalpain a hril angin i pu naupa nuhmeiin um raw se,” an ti a.

⁵² Abraham siehlaw chun an thu chu a hriet phingleh hnuoi sikin Lalpa chibai a bûk ta a.

⁵³ Chun, Abraham siehlaw chun tangkaruo incheinahai le, rângkachak incheinahai le silfênhai a lâk suok a, Rebeka kuoma chun a pêk a; a ṭapa le a nu kuoma khawm chun thil hlutak takhai a pêk bawk a.

⁵⁴ Chun, ama le a ruolhai chun an fâkin an dâwn a, an riek ta a. Zîngkâra an tho chun, “Ka pu kuomah mîn fetir ta ro,” a ti a.

⁵⁵ A ṭapa le a nu chun, “Tawinu hi ni sâwt nawte, ni sâwm bêk kan kuomah um hri raw se; chu hnunga chun fe de nih,” an ti a.

⁵⁶ Ama chun an kuomah, “Mi sukhnu naw ro khai, Lalpa chun ka fenaa hin a mîn hlâwtlingtir ta si a: ka pu kuoma ka fe theina dingin mîn fetir el lem ro khai,” a ta.

⁵⁷ Anni chun, “Tawinu chu ko kan ta, ama bau ngeiah bieng kan tih,” an ta.

⁵⁸ Chuongchun, Rebeka chu an ko a, a kuomah, “Hi mipa kuoma hin fe nuom i ti?” an ti a. Ama chun, “Nuom e,” a ta.

⁵⁹ Chuongchun, an farnu Rebeka le, a dawntu le, Abraham siehlaw le a rawihai chu an infetir ta a.

⁶⁰ Chun, Rebeka chu mal an sâwm a, a kuomah, “Kan farnu, nang chu sîng ruoka sâng tamtak nu hung ni la, i thlahai chun anni theidatuhai kul kawtkhâr chu neipêk raw hai se,” an ta.

⁶¹ Chuongchun, Rebeka chu a tho a, a suoknuhai leh sanghâwngseihai chunga chun an chuong a, mi chu an zui ta a; chuongchun, siehlaw chun Rebeka chu a ṭhuoi a, a fe ta a.

⁶² Chun, Isak chu Beer-lahai-roi tienga inthawk chun a hung a, Sim rama um a ni si a.

⁶³ Chun, Isak chu zântieng hin inngaituo dingin phûlah a va lêng suok a: chun, a hei ngha a, a en a; chun, ngai ta, sanghâwngseihai an hung a.

⁶⁴ Chun, Rebeka chu a hang ngha a, Isak chu a hmu phingleh sanghâwngsei chunga inthawk chun a ṭum ta a.

⁶⁵ Abraham siehlaw kuoma chun, “Phûla a mi tuok dinga hung saw tu am a na?” a ti a. Siehlaw chun, “Ka pu a ni saw,” a ta: chuongchun, ân khumna puon a lâk a, ân khum ta a.

⁶⁶ Chun, siehlaw chun a thilthaw po po chu Isak a hril a.

⁶⁷ Isak chun Rebeka chu a nu Sara puon ina chun a ṭhuoi lût a; chun, Rebeka chu a nei a, a nuhmei a hung ni ta a; chun, ama chu a hmangai hle a, chuongchun, Isak chu a nu thi thua khawm chun a hung thlamuong thei ta a.