INṬANNA 23 - Pathien Lekhabu Inthieng (BSI)

Sara thi thu Abrahamin thlân hmun ân châwk

¹ Sara dam sûng chu kum za le sâwmhni le pasari a nih: chu chu Sara dam sûng kum chu a nih.

² Sara chu Kanaan rama Kiriath-arbaa chun a thi a (chu chu Hebron khuo a nih): chun Abraham chu Sara chunga ṭap ding le sûn dingin a hung a.

³ Chun, a mithi ruong hmaa chu a tho a, Heth thlahai kuoma chun,

⁴ “Nangni lai mikhuol le inpêm el ka ni a; ka mithi ruong hi ka phûm hmang theina dingin nangni lai hin inphûmna hmun ding ram mi pe ro,” a ti a.

⁵ Hit mihai chun Abraham chu an dawn a, a kuomah,

⁶ “Pu, lo ngai ta, nang chu keini lai hin lal ropuitak i ni a, kan thlânhaia hin i nuomna takah i mithi chu phûm el rawh, i mithi i phûmna dingin keini lai tukhawmin kan thlânhai pêk che inro naw ning ungah,” an ti a.

⁷ Chuongchun, Abraham chu a tho a, chu rama mi, Hit mihai chu chibai a bûk a.

⁸ Chun, “Ka mithi chu ka phûm hmang in remti chun, mi lo ngai unla, Zohar naupa Ephron kuomah mi hnipêk unla,

⁹ a lo mawnga um amân a inei, Makpelaa pûk kha mi pe dingin. Inphûmna hmuna nei sawng dingin a man âwm tâwk intêlin nangni hrietah mi pe raw se,” a ti a.

¹⁰ Ephron chu Hit mihai lai chun a ṭhung ve zing a: chuongchun, Hit mi Ephron chun Hit mihai hrietah, a khaw kul kawtkhâra lût taphawt hriet ngeia chun Abraham chu a dawn a,

¹¹ “Ni lo e, pu, mi lo ngai ta, lo chu ka pêk che a, a sûnga pûk um khawm chu ka pêk bawk che; ka chipuihai nauhai mithmua hin ka pêk che a nih, i mithi chu phûm el rawh,” tiin.

¹² Chun, Abraham chu chu rama mihai hmaa chun a kûn a, chibai a bûk a.

¹³ Chun, chu rama mihai hrieta chun Ephron kuomah, “Rem i ti chun, lunginsiettakin mi lo ngai la, lo man chu pe el lem ka ti che: ka kuoma inthawkin la la, chuongchun, ka mithi chu phûm ka tih,” a ti a.

¹⁴ Ephron chun Abraham chu a dawn a, a kuomah,

¹⁵ “Pu, mi lo ngai ta, hnuoi tangka sekel za li man dâm chu nang le keia ta dingin hril khawp am nîng a ti? I mithi chu phûm el rawh,” a ta.

¹⁶ Abraham chun Ephron thu chu a zâwm ta a; Hit mihai hrietah, tangka a ihril zât, chu hun laia sumdâwnghaiin an ibûk hlak anga, tangka sekel za li, Ephron ta dingin a bûk ta a.

¹⁷ Chuongchun, Mamre zâwna Makpelaa Ephron lo chu, a lo, a sûnga pûk um, loa thing um po po le a lo ri vêla thing um po po le chun,

¹⁸ Hit mihai mithmua le a khaw kul kawtkhâra lût taphawthai mithmua chun nei sawng dingin Abraham kuomah pêkin a um ta a.

¹⁹ Chu hnunga chun Abraham chun a nuhmei Sara chu Kanaan rama Mamre (chu chu, Hebron) zâwna Makpelaa loa pûka chun a phûm ta a.

²⁰ Chuongchun, lo le a sûnga um pûk chu inphûmna hmuna nei sawng dingin Abraham kuomah Hit mihai chun an pêk suok ta a.