INṬANNA 17 - Pathien Lekhabu Inthieng (BSI)

¹ Chun, Abram chu kum sawmkuo pakuo mi a niin Lalpa chu Abram kuomah a hung inlâr a, a kuomah, “Kei Pathien Iengkimthawthei ka nih, ka hmaah um la, ṭha famkimin um rawh.

² Chuongchun, nang le ei kârah thu thlung ka ta, nasatakin sukpung ka ti che,” a ta.

³ Chun, Abram chu a bawkkhup a; chun, Pathienin ama chu a biek a,

⁴ “Ngai ta, kei chun ka thuthlung chu i kuomah a nih ka thlung chu: chuongchun, chi tum tum, chi tamtak thlatu ni tâng i tih.

⁵ I hming khawm Abram ni ta naw ni a, i hming chu Abraham ni ta lem a tih, chi tamtak thlatu dingin ka siem ta che hi.

⁶ Nasatakin chi inthlatir ka ti che a, nangmaa chun chi ti khawp hiel dâm siem ka ta, nangmaa inthawkin lalhai hung suok bawk an tih.

⁷ Chun, kei le nang le i hnunga i thlahai an thla sâwng peihai chen inkârah kumkhaw thuthlung dingin ka thuthlung hi sukdet ka tih, i ta ding le i hnunga i thlahai ta dinga Pathien ka nina dingin.

⁸ Chun, i kuoma le i hnunga i thlahai kuoma chun, i khuolchâmna ram, Kanaan ram po po hi, kumkhaw ro dingin ka pêk ding cheu a nih; chun kei hi an Pathien nîng ka tih,” a ta.

⁹ Chun, Pathien bawkin Abraham kuoma chun, “Chun, nang chun chu, ka thuthlung hi i zâwm ding a nih; nang le i hnunga i thlahai an thla nâwksâwng pei chen khawmin in zâwm ding a nih.

¹⁰ Hi hi kei le nang le i hnunga i thlahai kâra ka thuthlung i zâwm ding chu a nih: nangni laia pasal taphawt chu ser tan ding a nih.

¹¹ Chuongchun, in ser hmawr vuna chun sertanin in um ding a nih; chu chu nang le ei inkâra thuthlung inchikna chu nîng a tih.

¹² Nangni laia ni riet mi chu in thla sâwng peihai chen khawmin, i thla ni kher lo, i ina pieng amani khawm, mikhuol kuoma tangka suma inchâwk amani khawm, pasal taphawt chu a ser i tan ding a nih.

¹³ I ina pieng le i tangka suma în châwk khawm a ser i tan ngei ding a nih: chuongchun, ka thuthlung chu kumkhaw thuthlung dingin in tisaa chun um tâng a tih.

¹⁴ Chun, pasal ser tan lo, a ser hmawr vun taksaa sertanna um naw chu, chu ngei chu a chipui laia sukbohmang nîng a ta: ama chun ka thuthlung chu a bawsiet a nih,” a ti nâwk a.

¹⁵ Chun, Pathien bawkin Abraham kuomah, “I nuhmei Sarai chu a hmingah Sarai ti ta naw ti ni a, a hming chu Sara ti ni ta lem a tih.

¹⁶ Ama chu mal sâwm ka ta, chu bâka khawm amaa inthawk naupasal pêng ka ti che: anih, ama chu mal sâwm ka ta, chi tum tum thlatunu ni tâng a tih, hnam tum tum lalhai amaa inthawk chun la hung suok an tih,” a ti nâwk a.

¹⁷ Chuongchun, Abraham chu a bawkkhup a, ân nui a, a lungrilin, “Kum za mi hin nau a nei ding am a nih? Sara kum sawmkuo mi chun nau a nei ding am a nih?” a ta.

¹⁸ Chun, Abraham bawk chun Pathien kuomah, “Ismael hi i hmaah um thei sienla aw!” a ti a.

¹⁹ Pathien chun, “Ni lo e, i nuhmei Sarain naupasal neipêk lem a ti che: a hmingah Isak i sak ding a nih: chun ka thuthlung chu ama hnunga a thlahai ta dinga kumkhaw thuthlung dingin a kuoma chun sukdet ka tih.

²⁰ Ismael chungthu khawm hi ka ngaipêk che a nih: ngai ta, ama chu mal ka sâwm ta a, chi tamtak inthlatir ka ta, nasatakin sukpung bawk ka tih; ama chun lal sâwmpahni thlâng a ta, ama chu chi ropuitakah la siem ka tih.

²¹ Ka thuthlung ruok chu, Sarain kum nâwk hieng ang huna a neipêk ding che, Isak chungah sukdet lem ka tih,” a ti a.

²² A kuoma thu a hril zo chun Pathien chun Abraham chu a kai tung san ta a.

²³ Chun, Abraham chun a naupa Ismael le a ina pieng po po le, a tangka suma a închâwk po pohai le Abraham sûnghai laia mi pasal taphawt chu a ṭhuoi a, Pathienin a kuoma a hril ta ang ngeiin, chu ni ngei chun an ser hmawr vun tisa chu a tanpêk tâwl a.

²⁴ Abraham chu a ser hmawr vun tisa an tan lai chun kum sawmkuo pakuo mi a nih.

²⁵ Chun, a naupa Ismael chu a ser hmawr vun an tan lai chun kum sâwmpathum mi a nih.

²⁶ Chu ni ngei chun Abraham le a naupa Ismael chu sertan an lo ni tah.

²⁷ A sûnghai laia pasal po po, a ina pienghai le ram dang mi tangka suma a în châwkhai khawm chu, ama ruol chun an ser tan a ni ta vawng a.