INṬANNA 16 - Pathien Lekhabu Inthieng (BSI)

Hagar le Ismael

¹ Chun, Sarai, Abram nuhmei chun, nau hrim hrim a neipêk dêr naw a, Sarai chun Aigupta mi suoknu pakhat a nei a, a hming chu Hagar a nih.

² Chun, Sarai chun Abram kuomah, “Ngai ta khai, Lalpain nau a mîn neitir phal naw hi, lunginsiettakin ka suoknu hi pâwl el rawh; amaa inthawk chun nauhai ka nei duoiin,” a ti a. Chuongchun, Abram chun Sarai thu chu a zâwm ta a.

³ Chun, Abram chu Kanaana kum sâwm a um hnung chun, Abram nuhmei Sarai chun a suoknu Aigupta mi Hagar chu a ṭhuoi a, a pasal Abram kuoma chun a nuhmeia um dingin a pêk a.

⁴ Ama chun Hagar chu a lo pâwl a: amanu chu ân rai ta a; chun ân rai ti ân hriet phingleh a pi chu a hung hmusit el ta a.

⁵ Chun, Sarai chun Abram kuomah, “Ka thil tuor hi nangin a maw phur rawh: ka suoknu chu i pawm dingin ka pêk che a; chun ân rai ti ân hriet phingleh a mi hmusit el ta a; Lalpa chun kei le nanga thu hi ngaituo raw se,” a ti a.

⁶ Abram ruok chun Sarai kuomah, “Ngai ta, i suoknu chu i kuta um annâwm, nanga remti ang ang chu a chungah thaw ta la,” a ti a. Chuongchun, Sarai chun a sukrimsi ta hle a, chuleiin, a tlânhmangsan ta a.

⁷ Chun, Lalpa Vântirko chun thlalêra tuikhur kâwl, Sur panna lampuia tuikhur kâwla chun a lo hmu a.

⁸ Chun, a kuomah, “Hagar, Sarai suoknu, khawlaia inthawka hunga khawlaia fe ding am i na?” a ta. Ama chun, “Ka pi Sarai kuoma inthawkin ka tlânhmang a nih,” a ta.

⁹ Lalpa vântirko chun a kuomah, “I pi kuomah kîr nâwk la, a thu thuin um rawh,” a ta.

¹⁰ Lalpa vântirko chun a kuomah, “I thlahai chu tiem sênglo khawp hiela tamin la sukpung ka tih,” a ti bawk a.

¹¹ Lalpa vântirko bawk chun a kuomah, “Ngai ta, nau i vawn ta a, naupasal nei i ta, Lalpa chun i rimsikzie hi a hriet ta leiin a hminga chun Ismael i sak ding a nih.

¹² Ama chu mihriem laia ram sabengtung ang nîng a ta, ama chun mi tin do a ta, mi tinin ama khawm do bawk an tih; a unau po po hnaiah um bawk a tih,” a ti nâwk bawk a.

¹³ Chun, Hagarin ama betu Lalpa hming chu, “Nang hi hmu theitu Pathien i nih,” tiin ân bûk a. “Hitaka ngei hin a mi hmutu chu ka hmu takzet am a ni aw?” a ti a nih.

¹⁴ Chuleichun, tuisunsuo chu “Beer-lahai-roi” inbûk a ni ta a; Kades le Bered khaw inkârah a um.

¹⁵ Chun, Hagar chun Abram chu naupasal a neipêk a; chun, Abram chun a naupa Hagarin a nei chu a hmingah Ismael a sak ta a.

¹⁶ Chun, Hagarin Abram ta dinga Ismael a nei pêk lai chun Abram chu kum sawmriet le kum ruk mi a nih.