INPÂKNA HLABU 5 - Pathien Lekhabu Inthieng (BSI)

Vênghimna dinga ṭawngṭâina

Hla ṭhuoitu ta ding: Nehiloth le sak mi, David Inpâkna Hla.

¹ Aw Lalpa, ka thua hin na lo sit la, Ka ngaituona hi lo ngaituo ta:

² Ka Lal le ka Pathien, ka khêkri hi lo ngai la, I kuoma ṭawngṭâi ka ni si a.

³ Aw Lalpa, zîngkâr chun ka râwl hi lo hre hlak i ta, Zîngkâr chun ka ṭawngṭâina chu i hmaa chun rêl fel diem ka ta, lo ngaiven hlak ka tih.

⁴ Rîtlonaa lâwm hlak Pathien i ni si naw a. Mi suol chu i kuom tlung naw ni hai.

⁵ Mi uonghai chu i mithmuah ngîr thei naw ni hai a, Thil suol thawtuhai po po chu i theida hlak.

⁶ Khêl hril hmanghai chu sukbohmang i ta, Lalpain thisen insuo hmang le hlêm hmang mi chu a tirdak rieu hlak.

⁷ Nisienlakhawm, kei chu, i ngilneina nasatak lei chun i inah hung lût ka ta, Ṭi pum chein i biekin inthieng tieng nghain chibai bûk hlak ka ti che.

⁸ Aw Lalpa, ka hmêlmahai leiin, i felnain mi ṭhuoi la, I lampui chu ka hmaa hin suktluong rawh.

⁹ An baua chun ringumna hrim hrim a um naw a; An sûngril chu rîtlona ruok el a nih: An hnuk chu thlân inhawng a na; An leiin an inpâk tehlêm hlak.

¹⁰ Aw Pathien, annirawi hi thiemnaw inchangtir la. Anni remruotnahai ngei chu tlûk phâna dingin hmang raw hai se; An bawsietna tamtakhai lei hin nam suok la. I chungah an hel si a.

¹¹ Nangmaa ringna innghattuhai po po chu nangmaa chun lâwm hai sienla, I humhim leiin kumkhuoin lâwmin khêk tâwl raw hai se: I hming ngainatuhai khawm chu nangmaa chun lâwmtakin um raw hai se.

¹² Mi fel chu mal i sâwm ding a ni si a, Aw Lalpa, ama chu phâw angin ditsaknain în huol vêl ding a nih.