INPÂKNA HLABU 2 - Pathien Lekhabu Inthieng (BSI)

Lalpa hrieknâl rorêlna

¹ Hnamhai chu iengdinga an lunginsen a, Mihai chun iengdinga thil teplo an ngaituo am a na?

² Hnuoia lalhaiin an ep huoi huoi a, Hotuhai khawm an inrâwn khâwm a, Lalpa le a hrieknâl chunga chun:

³ “An khuopnahai hi suktanin, An hruihruolhai hi ei kuoma inthawkin pei dai ei tiu,” tiin.

⁴ Vâna ṭhungpa chu innui a ta: Lalpa chun anni chu nuisan a tih.

⁵ Chu hnunga chun a lunginsenin an kuomah thu hril a ta, Lunginsentakin anni chu suklungzîng tâng a tih.

⁶ “Keima ngeiin ka tlâng inthieng Ziona chun, Ka lal siem chu kân ṭhungtir tah a nih” a ti a.

⁷ Thuruot chu ka hril ding a nih: Lalpa chun ka kuomah, “Nang chu ka naupa i nih; Vawisûn hin ka nei che a nih.

⁸ Mi hni rawh, chuongchun, i rohluo dingin hnam tin pêng ka ti che a: Kâwlkil tâwp chenin i ro dingin pe bawk ka ti che.

⁹ Anni chu thîr hmawlin sukkawi i ta, Bêlhemtu bêl angin anni chu pei nâwi i tih,” a ti a.

¹⁰ Chuongchun, aw lalhai, var ta unla, Hnuoia rorêltuhai inchûktirin um ro.

¹¹ Ṭi pumin Lalpa rawng bâwl unla, Inthin pumin lâwm ro;

¹² Naupa chu fâwp ro, chuong naw chun lunginsen a ta, lam kârah bohmang rawi in tih: A lungsen chu a hung inthawk phut ding a ni si a. Amaa an ringna innghattuhai po po chu an hamṭha.