INPÂKNA HLABU 148 - Pathien Lekhabu Inthieng (BSI)

Lalpa chu inpâk dingin thilsiem po po infui an nih

¹ Lalpa chu inpâk ro, Vâna inthawk dâm khin Lalpa chu inpâk unla, Chungtienghaia khin ama inpâk ro.

² A vântirko po pohai, ama chu inpâk unla, A sipai po pohai, ama chu inpâk ro.

³ Nisa le thla hai, ama chu inpâk unla, Arasi var po pohai, ama chu inpâk ro.

⁴ Vânhai vânhai, ama chu inpâk unla, Vân chunga tui umhai, ama chu inpâk ve ro.

⁵ Chuonghai chun Lalpa hming chu inpâk raw se, Ama chun thu a pêk a, siemin an hung um ta si a.

⁶ Ama chun chuonghai chu kumkhawtluonga dingin a sukdet a; Thuruot, bohmang lo ding chu, a pêk a.

⁷ Hnuoia inthawk hin, Nangni drakon le tui inthûk po pohai;

⁸ Mei le riel dâm, vûr sûr le sûmhai, A thu zâwm hlak thlipuihai;

⁹ Tlâng lien le tlâng chîn po pohai, Thing ra nuom hai le, sidar thing po pohai;

¹⁰ Ram sa le ran po pohai, Thilhring le chunglêng vatehai;

¹¹ Hnuoia lalhai le mi tinrênghai, Mi lien hai le, hnuoia rorêltuhai po po;

¹² Nunghâk le tlangvâlhai, Putar le naupanghai; Lalpa chu inpâk ro.

¹³ Chuonghai chun Lalpa hming chu inpâk raw se, A hming chau chu chawisângin a um sih a; A ropuina chun hnuoi le vân a khûm dai a.

¹⁴ A mihai ki chu a chawimawi bawk a, A mi inthieng po po inpâkna chu: Israel nau, ama hnaituhai inpâkna chu. Lalpa chu inpâk ro.