INPÂKNA HLABU 139 - Pathien Lekhabu Inthieng (BSI)

Pathien chu hmun tina um le iengkim hrie a nih

Hla ṭhuoitu ta dingin: David Inpâkna Hla.

¹ Aw Lalpa, nangin nguntakin i mi en suok a, i mi hriet tah;

² Nangin ka ṭhung le ka ngîr hi i hriet hlak a, Ka ngaituona hi hlataka inthawk khawmin i hriet thiem hlak.

³ Ka fe le ka zâl hi i mi en ngun hlak a, Ka um dân po po hi i hriet vawng a.

⁴ Ngai ta, aw Lalpa nangin i hriet fai vawng naw chu, Ka leia hin thu hrim hrim a um nawh.

⁵ Nangin ka hnungtieng le ka hmatieng i mîn huol a, Ka chungah i kut în nghat bawk a.

⁶ Chuong ang lâwma hrietna chu ka ta dingin a mak taluo a, Ân sâng bêk a, ka phâk naw a nih.

⁷ I thlarau kuoma inthawk hi khâwlai am fêng ka ta? I hmaa inthawk hi khâwlai am tlân hmang ka ta?

⁸ Vânah hang lâwn lang, chutaka chun i um si a! Seolah zâlna siem lang, ngai ta, chutaka chun i um bawk si a!

⁹ Zîngkâr thlahai zârin Tuisuoriet tâwp daiah va um lang;

¹⁰ Chutaka khawm chun i kutin mi ṭhuoi a ta, I kut changtiengin a mi chel âwm si a.

¹¹ “Matheilovin, inthimin mîn khum zo a ta, Ka vêla var hi zân nîng a tih,” ti ding ni lang,

¹² Inthim khawma nangma kuoma chun iengkhawm a hlie naw a, Zân hi sûn angin a var lem a nih: I ta ding chun inthim le var hi thuhmun zing a nih.

¹³ Nangma ngeiin ka lungril i nei a, Ka nu phîng sûngah i mîn khum a.

¹⁴ I kuomah lâwmthu hril ka ti che, ṭiumtak le maktaka siem ka ni si a, I thilthawhai hi maktak a na, Chu chu ka hringna hin a hriet chieng hle a nih.

¹⁵ Arûka siema ka um a, Hnuoi hmun inhnuoitaka mawitaka siema ka um lai khan, Ka rurêl chu i kuomah thupin a um naw a,

¹⁶ Ka riruong la famkim lo chu i mitin a hmu a, I lekhabua chun ka pênghai hi ziek vawng a nih: A ni têla siemin a um pei a, A pakhat khawm a la um hmain.

¹⁷ Aw Pathien, i ngaituonahai chu ka ta dingin a va hlu de! A hung insukkhâwm chu a va nasa âwm de!

¹⁸ Tiem ding ni lang, a tam tieng chu phaiphin nêkin tam lem a tih: Ka hang meng chun, i kuomah ka la um ta rawp hlak a nih.

¹⁹ Aw Pathien, mi rilohai chu that ngei i tih, Chuongchun, nangni thisen insuo inhâwkhai, mi mâksan ro.

²⁰ Anni chun suoltakin an hrilsiet si che a, Nangma dotuhai chun i hming chu an hril nawmna hlak.

²¹ Aw Lalpa, nangma theidatuhai chu ka theida naw am a nih? Nangma thawtuhai chunga chun ka lungninaw naw am a nih?

²² Anni chu theida taktêin ka theida a, A mi dotuhaiah ka ruot tâwl a.

²³ Aw Pathien, nguntakin mi en suok la, ka lungril hi hre rawh, Mi fie la, ka ngaituonahai hi hre rawh.

²⁴ Chun, keimaa hin rîtlona kawng hrim hrim a um le a um naw en la, Chatuon lampuia chun mi ṭhuoi rawh.