INPÂKNA HLABU 128 - Pathien Lekhabu Inthieng (BSI)

Lalpa ṭîtuhai hamṭhatna

Kai Hla

¹ Lalpa ṭî taphawt chu an hamṭha ie, A lampui hrawtuhai chu.

² I kut sininrim ra chu i fâk ding a ni si a, Lâwmtakin um i ta, thawvengin um bawk i tih.

³ I nuhmei chu i in sûng rila chun, grêp hrui ra nuomtak angin um a ta, I nauhai chu i dâwkân vêla chun oliv kakhai angin um an tih.

⁴ Ngai ta, Lalpa ṭî mi chu, Chuong ang chun malsâwmin um an tih.

⁵ Lalpa chun Ziona inthawkin malsâwm a ti che: Chuongchun, i dam sûng po chun Jerusalem ṭhatna chu hmûng i tih.

⁶ Anih, i tuhai chu la hmûng i ta; Israelhai chunga chun thlamuongna um raw se.