HOSEA 9 - Pathien Lekhabu Inthieng (BSI)

Israel a ringum naw zing zing leia hremna

¹ Aw Israel, lâwm naw ta, Hnam danghai angin hlim so luom naw rawh; I Pathien chu nawchi i zawr san a, Hrizâwl tina chun nawchizawr ruoi man chu i ngaina si a.

² Hrizâwl le grêp sâwrna khurhai chun anni suktlai naw ni a, Uoin thar ding hlawsam a tih.

³ Lalpa rama chun chêng naw ni hai a, Ephraim chu Aigupta tieng kîr lem a tih; Assuria rama chun bu thieng naw fâng an tih.

⁴ Lalpa kuomah uoin chu bun suok nâwng an ta, An thilinhlânhai chu a ta dingin lâwmum ni bawk nâwng a tih; An bei chu lusûnhai bu ang nîng a ta, A fa taphawthai chu sukpawrche nîng an tih. An bei chu an hringna ta ding chau nîng a ta, Lalpa inah hunglût naw nih.

⁵ Inkhâwmpui ursûntak nia le, Lalpa ruoiṭhe nia chun ieng am thaw tâng in ta?

⁶ Ngai ta u, sietna chu an mâksan a, Aigupta chun anni chu lo kei khâwm lem a tih, Memphis chun lo phûm a tih; An tangkaruo thil ditumhai chu zakthlaiin bâwm a ta, An puon inhaia chun hlo hlingnei um a tih,

⁷ Hremna nihai chu a hung tlung a, Thungna nihai chu a hung tlung ie! Israel chun chu chu hrieng a ta; I rîtlona chu a tamin intaina a tam leiin. Zâwlnei chu ân vêt a, thlarau mi chu ân hâi a nih.

⁸ Ephraim râl vêngtu chu ka Pathien kuoma um a na, Zâwlnei hlak chu a lampui intluonin chângkamtu châng kam a um a; A Pathien ina khawm intaina a um.

⁹ Gibea khuoa umlai nihai ang khan, Nasatakin anni le anni an insukkhawhlo a; An rîtlona chu hre zing a ta, An suolnahai chu thung a tih.

¹⁰ Israel chu thlalêra grêp ra ang elin ka hmu a, In pahai chu, theichang hun hmasaa a hmin hmasa angin ka hmu. Nisienlakhawm, anni chu Baalpeor hmunah an hung a. Thil inzakumtaka chun an inpumpêk ta a; An ingainat tak ang bawk chun tirdak an um ve ta a nih.

¹¹ Ephraim ropuina chu vate angin vuong hmang a ta, Nau nei dâm, nau vawn dâm, inrai dâm um naw ni hai.

¹² An nauhai hung sukpuitling hai sien khawm, pasal hrim um lo dingin, Insûntir tho tho ka tih; Anih, anni ka nghatsan pha chun, An chung a va rik zuol âwm de!

¹³ Tura ka hmu ang bawkin, Ephraim chu hmun inhawitaka siein a um a, Nisienlakhawm, Ephraim chun a nauhai chu thattu kuomah la ṭhuoi a tih.

¹⁴ Aw Lalpa, inneitir rawh. Ieng am inneitir i ta? Sul nau insiet hlak le, nêne vuoihai chu inneitir rawh.

¹⁵ An rîtlona po po chu Gilgal khuoah a um a; Chutaka chun anni chu ka theida si a. An thilthaw rîtlona lei chun ka ina inthawkin hnawt suok ka tih; Annirawi hi hmangai ta naw ning; An hotuhai po po chu hel hmang an ni si a.

¹⁶ Ephraim chu vuokin a um a, an zung chu a vuoi zo tah, Ra insuo naw ni hai; Anih, insuo hai sien khawm, an sul ra ditumtak chu That tho tho ka tih.

¹⁷ Ka Pathien chun anni chu peihâwn a tih. Ama an ngaisak naw leiin; Chuongchun, hnam danghai lai chun invâiin um an tih.