HOSEA 8 - Pathien Lekhabu Inthieng (BSI)

Israel milim biekna leia kâwkna

¹ Tawtawrâwt chu i hmûrah inbûk rawh; Lalpa sûnghai chungah mupui angin a hung ie; Ka thuthlung an bawsiet a, Ka dân an helsan leiin.

² “Ka Pathien, keini Israelhai hin chu kan hriet che,” Tiin ka kuomah an khêk a.

³ Israelhai chun thil ṭha chu an hnâwl a; Hmêlma chun anni hnawt a tih.

⁴ Ka thaw ni lovin, annîn lal an siem a, Ka hriet lovin hotuhai an siem a; An bohmangna dingin an tangkaruo le an rângkachakin milim an siem a.

⁵ Aw Samaria, i sebâwngte lim chu a hnâwl ie; An chungah ka lunginsen êm êm a nih. Nun tluongtlama an um thei hma chu ieng chen tak am a ni ding chu.

⁶ Israela inthawk chun hi hi a ni si a, Sinthawtu siem a na, Pathien a ni nawh; Anih, Samaria sebâwngte lim chu suknâwi vawng nîng a tih.

⁷ Thli an chîng a, thli sie an sîk ding a ni si a, Kûng ngîr a nei naw a, a zîk khawm chun ra insuo naw ni; Insuo khawm ni sienla, mikhuolhaiin fa zo an tih.

⁸ Israelhai chu lem zoin an um a nih, Bêl, a sûnga lâwmna um lo angin tuhin hnam dang laia chun an um a nih.

⁹ Ram sabengtung khât tla angin Assuria ramah an hang fe si a; Ephraim chun a dit zâwnghai a tlawn ie!

¹⁰ Anih, hnam danghai laia chun intlawn chîng sienla khawm, Tuhin anni chu kei khâwm ka tih, Lal le hotuhai rikphur leiin an kiem ṭan a nih.

¹¹ Ephraim chun maichâm a sukpung hi an thil suksuolna chau a na, An ta dingin maichâm hrim hrim chu suolna el a nih.

¹² Ka dânhai chu ziekpêk ṭeu lang khawm, chuonghai chu thil danglam tak angin an ngai a nih.

¹³ Ka ta dingin inthawinahai inhlânin, inthawina sahai fa hai sien khawm, Lalpa chun a pawm nawh. Chuongchun, an rîtlona hre zing a ta, an suol hrem a ta, Aigupta ramah kîr nâwk an tih.

¹⁴ Israel chun a siemtu a theinghil a, In ropuihai a bâwl a; Juda chun khawpui kul neihai a sukpung a; Nisienlakhawm, a khawpuihaia chun mei tir ka ta, A in ropuihai chu kâng zo a tih.