HOSEA 6 - Pathien Lekhabu Inthieng (BSI)

¹ “Hung ta u, Lalpa kuomah kîr ei tiu, A mi kei nâwi taa chu a mi lo sukdam nâwk ding a ni si a, A mi lo vuok ta nâka chu a mi tuom nâwk ding a ni si a;

² Ni hni hnungah mi sukhring a ta, Ni thum nia chun mi keitho a ta, a hmaah um ei tih.

³ Lalpa hrietna chu hnawt pei ei tiu khai, hrieng ei tiu; Zîng khawvar anga inkhêl ruol lovin ân thawk suok ngei hlak; Ei kuomah ruo angin, ruo nuhnung, hnuoi sukhûtu ang elin hung tlung a tih,” tiin.

⁴ Aw Ephraim, iengtin am ka thaw ding che a na? Aw Juda, iengtin am ka thaw ding che a na? In ṭhatna chu zîngkâr ṭieusûm le daidaw hung bo vak hlak ang hi a ni si a.

⁵ Chuleiin, zâwlneihai hmangin anni ka râwt a, Ka baua thuhaiin anni ka sukhlum a nih. I chunga rorêlnahai chu var fe suok pup pup ang hi a nih.

⁶ Inthâwina dit lovin lunginsietna ka dit si a; Pumrawhmang thilinhlân nêk chun Pathien hrietna ka dit lem a nih.

⁷ Nisienlakhawm, Adam angin thuthlung chu an bawsiet a, Chutaka chun vervêktakin ka chungah an thaw a nih:

⁸ Gilead chu khawhlona thawtuhai khawpui a na; Thisen a kai pheng phung a nih.

⁹ Suomhmang ruolin mi an inchân hlak angin, Thiempu pâwlhai chun Sekem lampuiah mi an that hlak; Anih, thil suol an thaw ta a nih.

¹⁰ Israel sûngkuoa chun thil râpthlâktak ka hmu a, Ephraima chun nawchizawrna a um a, Israel chu sukpawrchein a um a nih.

¹¹ Ka mihai sal intângnaa inthawka ka ṭhuoi kîr pha chun, Aw Juda, i ta ding khawma ra sîk ding ruot a nih.