HOSEA 4 - Pathien Lekhabu Inthieng (BSI)

Israel le Lalpa inkalna

¹ Israel mipuihai, Lalpa thu chu ngai ta u; Hi rama hin thutak le lunginsietna le Pathien hrietna a um naw leiin, Lalpa chun ram hluotuhai hêkna ding a nei.

² Inkhâm dâm, inhlêm dâm, inthat dâm, inrûk dâm. Uiret chîng dâm a pung a, tuolthatna hlak chu ân phaman a.

³ Chuleiin, ram chun sûn a ta, A sûnga chêng tinrêng chu chau an tih, Ramsahai le chunglêng vatehai leh; Anih, tuipuia ngahai chenin lâk hmang nîng an tih.

⁴ Nisienlakhawm, tuhai khawm inhêk naw raw hai se, Tukhawm inkâwk bawk naw raw hai se; I mihai chu thiempu hêktuhai ang an ni si a, Aw thiempu, nanga chungah a nih ka lungni naw chu,

⁵ Sûna chun tlûng i ta, zâwlnei khawm chu i kuomah zânah tlûng a tih; I nu khawm sukbohmang ka tih.

⁶ Ka mihai chu hrietna tlâksam leiin sukbohmang an na, Hrietna chu i dit naw leiin kei khawma ka thiempu i ninaa inthawk chun dit naw ve tâng ka ti che. I Pathien dân chu i theinghil vei a, Kei khawmin i nauhai theinghil vêng ka tih.

⁷ An pung dep leh ka chungah an suol tul tul a, An ropuina chu muolphonaah inchangtir ka tih,

⁸ Ka mihai suolna an fâk a, An khawhlonaa chun an lungril an innghat a;

⁹ A mipui ni leh, a thiempu ni leh angkhat nîng an tih, An lampuihai lei chun anni chu hrem ka ta, An thilthawhai chu thung ka tih.

¹⁰ Fa chu fa dêng an ta, tlai si naw ni hai; Nawchizawr chîng an ta chu, pung chuong naw ni hai, Lalpa pawisakna an nei naw leiin.

¹¹ Nawchizawr dâm, uoin dâm, uoin thar dâm chun Hrietthiemna a lâk hmang hlak.

¹² Ka mihai chun an thing an râwn a. An hmawl chun a hril hlak. Nawchizawrna lungril chun a ṭhuoi hmang a, An Pathien chu tlânsanin nawchi an zawr ta a.

¹³ Tlâng sîphaia chun an inthâwi a, Muolhaia chun riminhnik an raw a; Thingsaisuo le beraw le tarpin thing hnuoia chun, A hlim chu ân hawi leiin. Chuleiin, in naunuhmeihai chun nawchizawr an chîng a, In mohai chun uiret an chîng a nih.

¹⁴ In naunuhmeihaiin nawchi an zawr a, In mohaiin uiret an chîng khawma hrem naw ning, Anni ngei khawm nawchizawrhai leh an fe pêt a, Nawchizawrhai leh an inthâwi hmunkhat si a; Chuong chun, hrietthiemna nei lo mipuihai chu tlusieng an tih..

¹⁵ Israel, nang chun nawchizawr chîng la khawm, Juda chu tlu ve lul naw raw se. Gilgala chun hung naw unla, Beth-avena khawm hang fe naw ro; “Lalpa a hring zing angin” tiin inkhâm bawk naw ro.

¹⁶ Bâwngla kâwmaw ang elin Israelhai chu an kâwmaw a, Tuhin Lalpain berâmte angin hmun lientakah châwm a tih.

¹⁷ Ephraim chun milim ân zawmpui ta a; A um umin um raw se.

¹⁸ An zu dâwn chu an ṭîn a, nawchizawrah an insiem a, An ropuina nêkin thil inzapuium chu an ngaina lem a.

¹⁹ Thli chun a thlahai chun a tuom khum ta a; An inthâwinahai lei chun lân zak ngei an tih.