HOSEA 3 - Pathien Lekhabu Inthieng (BSI)

Hosea le uirenu

¹ Chun, Lalpa chun ka kuomah, “Fe nâwk ta la, nuhmei, mi dangin an idit lai, uirenu chu va hmangai rawh, Israel mipuihai chu pathien dang tieng nghain grêp bei thlum chu ngaina hai sien khawm Lalpain a hmangai zing ang bawk hin,” a ti a.

² Chuongchun, tangka sâwmpanga le buṭei homer khat le a chenvein ama chu kân châwk a;

³ chun, a kuomah, “Ni tamtak sûng chu ka ta dingin i um ding a nih, nawchi i zawr ding a ni naw a, tu nuhmei khawm i ni bawk ding a ni nawh; chuong ang bawk chun kei khawm i kuoma chun um ka tih,” ka ta.

⁴ Israel mipuihai chu ni tamtak laltak le mi lien le, inthawina le lungphun inser, thiempu zakuo amanih, milimhai amanih, nei lovin an um ding a ni si a.

⁵ Chu hnunga chun Israel mipuihai chu hnungkîr an ta, Lalpa an Pathien le an laltak David chu zawng an ta; ni nuhnunghaia chun Lalpa le a ṭhatna chu inthin pumin pan an tih.