HOSEA 14 - Pathien Lekhabu Inthieng (BSI)

Lalpa kuom tieng kîr nâwk dingin ngênin a um

¹ Aw Israel, Lalpa i Pathien tienga chun kîr nâwk rawh, I rîtlona lei ngei chun i tlu ta hi.

² Thu chawi pumin Lalpa kuom tieng kîr nâwk la, A kuoma chun hieng ang hin hril rawh, “Rîtlona po po chu la hmang la, A ṭha taphawt chu pawm la, Chuongchun, kan hmûr rahai chu, Bâwngchal aiah hung inhlân kan tih.

³ Assuria chun mi sandam naw ni a, Sakawr chunghaia chun chuong nâwng kan ta, Kan kutsuokhai kuoma chun, ‘Kan Pathien in nih,’ ti ngai ta nâwng kan tih, Fahrahai chun nangmaa hin Lunginsietna an lo hmu hlak a ni si a,” tiin.

⁴ An hnungtawlna hi sukdam ka ta, Annia inthawka ka lunginsenna chu ân kieng ta leiin, Anni chu ka hmangai hrim hrim ding a nih.

⁵ Israel kuoma chun daidaw ang nîng ka ta, Ama chu lili angin hung vul a ta, Lebanon tlânga thing zung angin a zung thlâk dar a tih.

⁶ A zârhai chu inbuk luoi a ta, A mawizie chu oliv thing ang el nîng a tih; Lebanon tlâng ang elin a rim inhnik a tih.

⁷ A hlima chênghai chu hung kîr an ta, Bu ang hring thar an tih, Grêp hrui angin hung inno an ta; A rim inhnikzie chu Lebanon uoin ang nîng a tih.

⁸ Aw Ephraim, milimhai leh inzâwlna ieng am ka nei a? Kei hi a suklâwmtu che ka na, A tungdingtu che khawm ka nih. Kei chu fâr thing hring dup ang ka na, I ra ṭhahai chu keima kuoma inthawk a nih.

⁹ Tu am vara hieng hi hrethiem thei ding? Tu am var hlea hre thei ding? Lalpa lampuihai chu an indik a; Mi indikhai chun an hraw ding a ni si a; Bawsetuhai ruok chu chutaka chun An insui thlu ding a nih.