HOSEA 13 - Pathien Lekhabu Inthieng (BSI)

Ephraim sukram dêra a um ding thu hrillâwkna

¹ Ephraimin thu a hril chun inthinna khawp a tling hiel hlak, Israel mihai laia chun ngai ropui a ni mieu si a. Baal kuoma a tlûk china hin chu a thi ta a nih.

² Tu khawm hin an suol zuol ta deu deu a, An tangkaruoin milim a sunga sung an insiem fâwm a, Anni ngaidân ang peia milim chu: Chuonghai po po chu themthiemhai kutsuok a ni sa khawmin, Inthâwina inhlântu taphawthai chun Bâwngtê chu fâwp raw hai se, an ti hlak.

³ Chuleiin, zîngkâr ṭieusûm ang le, Dâidaw inhmataka bo nâwk el hlak ang, Hrizâwla bu si thlivirin a lâk hmang hlak ang, Meikhu suokna meikhu ang nîng an tih.

⁴ Kei ruok hi chu Aigupta rama inthawk ta a, Lalpa i Pathien chu ka na, Kei ti naw chu Pathien dang i hriet ngai naw a; Kei naw hi chu sandamtu dang an um nawh.

⁵ Ram ṭâwl nasatak, thlalêra inruolpui hlak che kha ka nih.

⁶ An fâk ding dawnga chun an tlai a, An tlai chu an lungrilin an chapo pha a, Chuongchun, an mi theinghil ta a nih.

⁷ Chuleiin, an ta dingin sakeibaknei ang nîng ka ta, Keitê angin lampuiah anni inchân ka tih.

⁸ Savawm a tê chân angin anni chu thâwng ka ta, An lung tuomtuhai chu keithlêr vawng ka ta, Chu hmuna chun sakeibaknei angin Anni fa zo ka tih; Ramsain a kei dar vawng ding angin.

⁹ Aw Israel, nangma ṭhangpuitu i mi do hi, I sietna a nih ie.

¹⁰ I khawpui po poa sanhim theitu ding che, I lal chu tuhin khâwlai am a um a? Lal le hotuhai mi pe rawh, i itihai, I rorêltuhai chu khâwlai am an um a?

¹¹ Ka lunginsenin lal ka pêk che a, Ka lunginsenin ka lâk hmang nâwk ta a nih.

¹² Ephraim rîtlona chu ka înkhâwl khâwm a na, A suolnahai chu inchik a nih.

¹³ Nuhmei nauha invawi lungngaina ang chu a chungah hung tlung a tih, Ama chu naupa varna nei lo a nih, A huntakah nau hung suokna hmunah a um si nawh.

¹⁴ Seol kuta inthawkin anni chu intlan ka ta, Thinaa inthawkin anni chu sansuok ka tih; Aw thina, i hripuihai chu khâwlai am? Aw Seol, i suksietna chu khâwlai am? Lunginsietna chu ka mita inthawkin thup nîng a tih.

¹⁵ A unauhai laia chun a tluongtlung tak ni sien khawm, Khaw sak thli hung inthawk a ta, Thlalêra inthawka Lalpa thuok ngei chu a hung mêk a nih; A tuihnârhai chu kang a ta, A tuikhurhai chu ṭâwl zo a tih; Bûr le bêl ṭhahai po po, a ro chu sukse vawng a tih.

¹⁶ Samaria chu sukrêmin um a tih, A Pathien chungah a hel si a; Kâwlhnâma sukthlûkin um an ta, An nautêhai chu peinawi nîng an tih, An nuhmei nau vawn laihai chu phirthlêr nîng an tih.