HOSEA 11 - Pathien Lekhabu Inthieng (BSI)

A mipuihai pêthmang leia Pathien pawitina

¹ Israel chu a naupang lai huna inthawk khan ka hmangai a, Aigupta rama inthawkin ka naupa dinga ka ko suok a nih.

² Ka ko râwn po leh an mi hlat zuol det a, Baalhai kuomah an inthâwi zing a. Mi lim siem fâwmhai kuomah riminhnik an raw lem a nih.

³ Kei ruok chun Ephraim chu ka kuta chelin lâwn kân chûktir a, Keiin ka sukdam a nih ti ruok chu an hriet nawh.

⁴ Mihriem hruihruol, hmangaina hruihai chun anni ka kei a, An ta ding chun an khâka kawl hlîppêktu ang chu ka na, Duottakin an hmaah fâk ding ka pêk a.

⁵ Aigupta rama chun kîr nâwk ta naw nih; Nisienlakhawm, hnungkîr an nuom naw leiin, Assuria chu a lal nîng a tih.

⁶ A khawpuihaia chun kâwlhnâm inletin um a ta, A kulhai chu sukbohmang a tih, Anni thu lo râwn ang ngeiin sukbohmang a tih.

⁷ Ka mihai chun mi nghatsan an tum zing a, Chuongchun, an ta dingin rîngkawl ruotpêk an nih, Chu chu tukhawma hlîppêk naw nih.

⁸ Aw Ephraim, iengtin am thlauthla thei ka ti che a? Aw Israel, iengtin am inthla thei ka ti che a? Iengtin am Adma angin siem thei ka ti che a? Iengtin am Zeboiim angin inumtir thei ka ti che a? Ka sûnga hin ka lung hi ân lêt a, Ka lunginsietnahai chu ân mûtâi nâwk ta lem a.

⁹ Ka lunginsen nasatak chu hlen naw ning a, Ephraim chu sukbohmang tum nâwk ta naw ning. Kei chu mihriem ni lovin, Pathien ka ni si a, Nangmaa um Mi Inthieng chu; Khawpui chu hung hlûkhum naw ning.

¹⁰ Lalpa chu zui an ta, Sakeibaknei anga inrûm ding chu; Anih, inrûm ngei a ta, Khaw thlang tienga inthawkin a nauhai chu Inthin pumin hung an tih.

¹¹ Aiguptaa inthawk chun chawngzawng angin, Assuriaa inthawk chun vaṭhu angin thla zâp sieu sieuin hung an tih; Chun, an in lum inhluotir ka ta, ti hi Lalpa thu suok a nih.

Ephraim a lepchie lei le a nunrâwng leiin kâwkin a um

¹² Ephraim chun khêl thuin a mîn huol vêl a, Israel sûnghai chun hlêmnain; Juda ruok chu Pathien ihriet zingin a um a, Mi Inthieng chunga chun ring a um a nih.