HOSEA 10 - Pathien Lekhabu Inthieng (BSI)

¹ Israel chu grêp hrui inbuktak, ra hautak a nih; A ra tam hu ang peiin a maichâm a sukpung a, A ram ṭhatzie ang peiin lung inser phun ṭhatak tak a siem a,

² A lungril chu sukṭhein a um a, Tuhin chu thiemnaw changin um tâng an tih. An maichâmhai chu amân vaw chim a ta, An lung inser phunhai chu suksieng a tih.

³ “Lal tak tak chu ei nei nawh, Lalpa chu ei ṭi si naw a; Chu lal chun ieng am mi thawpêk thei a ta?” tiin, tuhin chu hril ta ngei an tih.

⁴ Thuthlung an siemna tienga chun khêla inkhâmin. Thu teplo an hril a; Chuleiin, leilet changkuong thlûra hlo tûr nei ang elin Inkhingna a hung inder suok a nih.

⁵ Samaria rama chênghai chu Beth-aven bâwngtê lei chun thlaphângin um an tih; A kuoma inthawka a bo ta leiin chutaka mihai chu lungngai an ta; Chutaka thiempuhai a ropuina chunga lo lâwm hlakhai khawm.

⁶ Ama ngei khawm chu Laltak Jareb kuoma pêk dingin, Assuria rama fe hmangpui nîng a tih. Ephraim chun inzakna hmûng a ta. Israel khawm chun ama thurawt ngei chu inzâpui a tih.

⁷ Samaria ram hlak chu tui chunga thing hlek nawi ang el hin, A lal chu sukbohmang a na.

⁸ Israel suolna Aven hmun insânghai khawm chu suksiet nîng a tih, An maichâmahai chun hling le hlohlingnei hung ṭo a tih. Tlâng kuoma chun, “Mîn khum rawh,” tîng an ta; Muol kuoma chun, “Mi del rawh,” tîng an tih.

⁹ Aw Israel, Gibea nihaia inthawk ta khan i suol ta a; Chutaka chun an la ngîr zing a; Rîtlona nauhai dona chun Gibea ngeiah chun a hnawtphâk tâwl naw ding maw?

¹⁰ Ka nuom pha chun anni chu hrem ka ta, Chun, an bawsietna pahnia an intâng pha chun, An chungah mipuihai chu pungkhâwm an tih.

¹¹ Ephraim chu bâwngla inchûktir tah, Bu chîl hrâttak a nih; Nisienlakhawm, kei ngei hin a rîng mawitaka chun Rîngkawl inbâttir tâng ka ta; Ephraim chunga chun mi inchuongtir ka tih; Juda khawm chun hnuoi inlet a ta, Jakob chun a pil tlanghai chu suknâwi a tih.

¹² Mâni ta dingin felnain tu unla, Chuongchun, lunginsietna ang peiin sîk ro; In hnuoi chuongtlâihai chu inlet ro, Lalpa chu a hunga in chunga felna ân sûrtir chenin Ama chu zawng hun a ni si a.

¹³ Rîtlona hnuoi in inlet a, khawhlona in sîk a, Khêlhlip ra in fâk a nih. I tawlailîrhai le i mi hrâthai tam hi i ring vei a.

¹⁴ Chuleiin, i mihai laia chun indo buoi mup mupna hung suok a ta, I kulhai po po chu suksiet nîng a tih; Salman chun indona nia Beth-arbel a suksiet a, Nu chu a nauhai leh peinawia an um lai ang khan.

¹⁵ I rîtlona nasatak leiin, Chuong ang chun Bethel chun thâwng a ti che; Israel lal chu vârṭien laiin sukbohmangdêr nîng a tih.