HOSEA 1 - Pathien Lekhabu Inthieng (BSI)

Hosea nuhmei ringum naw le a nauhai

¹ Juda lalhai Uzzia, Jotham, Ahaz le Hezekia inlal lai le Israel lal Jeroboam, Joas naupa inlal laia Beeri naupa Hosea kuoma Lalpa thu hung tlung chu.

² Hosea hmanga Lalpa thu hril phutna chu. Lalpa chun Hosea kuomah, “Fe la, nawchizawr thla, nawchizawr mi, nuhmeiah va nei rawh, hi ram hin Lalpa chu a uiret hmangsan tah,” a ti a.

³ Chuongchun, a fe a, Diblaim naunu Gomer chu a nei ta a; chun, nau a vawn a, naupasal a neipêk a.

⁴ Chun, Lalpa chun a kuomah, “A hmingah Jezreel sak rawh; Jezreel thisen phuba chu Jehu sûnghai chungah lâng ka ta; Israel sûnghai ram chu suktâwp ka tih.

⁵ Chun, chu nia chun Jezreel ruomah Israelhai thalngul chu suktliek ka tih,” a ta.

⁶ Chun, nau a vawn nâwk a, naunuhmei a nei a. Chun, a kuomah, “A hmingah Lo-ruhama sak rawh; Israel sûnghai chu ka lainat ngai ta naw ding a nih, ka ngaidam vak ta âwm si naw a.

⁷ Juda sûnghai ruok chu lainat ka ta, thalngul amanih, kâwlhnâm amanih, indona amanih, sakawr amanih, sakawr chung chuong mi amania anni sandam lovin, Lalpa an Pathien chun sandam ka tih,” a ta.

⁸ Chun, Lo-ruhama chu nêne nêk ân bântir a, chun, nau a vawn nâwk a, naupasal a nei a.

⁹ Chun, Lalpa chun hieng hin a ti a, “A hmingah Lo-ammi sak rawh, nangni hi ka mihai in ni si naw a; chun, kei khawm in Pathien ni naw ning,” a ta.

¹⁰ Nisienlakhawm, Israel mipuihai chu tuipuia phaiphin, inkhi ruol lo le tiem ruol lo zât nîng an ta; chun, an kuomah, “Ka mihai in ni nawh” tina hmun ngeia chun “Pathien hring nauhai in nih,” ti nîng a tih.

¹¹ Chun, Juda mipuihai le Israel mipuihai chu pung khâwm an ta, an lu ding ruot an ta, chu rama inthawk chun hang fêng an ta, Jezreel ni chu a ropui ding a ni si a.