HLAHAI HLA 8 - Pathien Lekhabu Inthieng (BSI)

¹ Aw nang chu ka ṭapa, Ka nu nênehai netu ngei ni la chu aw! Tuola ka hmu che khawmin, fâwp ka ti che; Anih, tukhawma mîn zâpui naw nih.

² Ṭhuoi ka ti che a, ka nu Mi lo inchûktirtu ding ina chun ṭhuoi ka ti che, Uoin rim inhnik indâwntir ka ti che a, Ka theibufai tui chu.

³ A kut vawitieng chu ka lu hnuoiah siein, Chun, a kut changtieng chun kei mi hang kuo sien chu aw!

⁴ Aw Jerusalem naunuhai, ka ngên cheu hi, Ka hmangai chu sukṭhang naw unla, suktho bawk naw ro, a nuom hmakhat chu.

Hmangaina chu thina anga hrât a nih Nunghâkhai

⁵ Thlalêra inthawka a hmangaitak ringsana Hungnu saw tu am a na? Apple thing hnuoia chun ka keiṭhang che a, Chutaka chun i nu chu nanga leia nauhase nat chun a um a, Chutaka chun nanga neitu che chu nauhase nat tuorin a um tah.

Nunghâk

⁶ I lungril chunga chun inchikna ang le, I bân chunga chun inchikna angin mi sie la; Hmangaina chu thina ang elin a hrât si a; Itthîkna chu thlân ang ela rilo a na; A chawkhai chu meichawk a na, Lalpa meichawkhai ngei chu.

⁷ Tui tamtakin hmangaina chu a sukre thei naw a, Tuilien khawmin a chîm hmang thei nawh. Mîn a ina thuomhnaw po po chu hmangaina ta dingin pe sien khawm, Hmusit let dêr nîng a tih.

Nunghâk ṭahai

⁸ Farnu chitê kan nei a, Ama chun nênehai a nei naw a; Ei farnu ta ding chun ieng am thaw tâng ei ta, Ama chanchin chu hrila a um nia chun?

⁹ Ama chu kul ni sienla chu, Tangkaraw in ropui a chungah bâwl ei ta; Ama chu kawtkhâr ni ta sienla, Ama chu sidar thingphêkhaiin sukbit ei tih.

Nunghâk

¹⁰ Kei chu kul bang ang ka na, Ka nênehai chu chutaka in insâng ang; Chun, ama mithmua chun mi inremna hmutu ang chu ka nih.

Tlangvâl

¹¹ Solomon chun Baal-hamona chun grêp huon a nei a, Grêp huon chu a enkawltuhai kuomah ân umtir a; Mi tinin chutaka theira man ding chun tangka sâng khat an hung lâk hlak ding a nih.

¹² Ka grêp huon, ka ta chu, ka hmaa chun a um a; Nang aw Solomon, sâng khat chu nei i tih; Chun, chutaka a theira vêngtuhai chun za hnih.

¹³ Huonahai chun nang chu i chêng a, Ruolhai nangma râwl ngaituhai chun; Kei khawm an mîn ngaitir a.

Nunghâk

¹⁴ Ka hmangaitak, inhmaw rawh; Sakhipui amanih, sazuk tuoi amanih ang ni rawh, Riminhnik tlânghai chunga chun.