HLAHAI HLA 7 - Pathien Lekhabu Inthieng (BSI)

Tlangvâl

¹ Aw lal naunu, I kehai chu hawlrawk kekawk le chun a va mawi de! I maltê mûmhai dâm chu lunghlu ang a nih, Mi themthiemtak kut sinthaw ang chu.

² I laibu chu berbu ang a na, Uoin inchawkpawla tlasam ngai naw ang chu. I phîng chu buhlûm, Lilihai ihuol vêl ang chu a nih.

³ I nênehai chu sakhite pahni, Sakhipui tê ṭhienghai ang chu a nih.

⁴ I rîng chu saiha in insâng ang a na, I mithai chu Bath-rabbim dai kawtkhâr bula, Hesbona dîlhai ang chu a nih; I hnâr chu Lebanona in insâng, Damaska tienga ngha ang chu a nih.

⁵ I lu chu i chunga chun Karmel ang a na, I lua sam chu a sen êm hieu a, I samtlai ṭhatzie hi lalin a tuor zo nawh.

⁶ Aw hmangai, lâwm i umin, I hmêl a ṭhain, lung i sukâwi ngei de aw!

⁷ I dung insângzie hi intûm thing ang i na, I nênehai chu grep ra bâwr ang.

⁸ “Intûm thinga hin hang lâwn ka ta, Chutaka a kauhai chu chel ka tih,” ka ti a. I nênehai chu grêp hrui bâwr ang chu ni sienla, I thuok rim chu apple rim ang ni raw se.

Nunghâk

⁹ I bau chu uoin thlumtak ang hi nih, Ka hmangaitak ta dinga luong thla ziei ziei a, A hmûrhai le a hahai chu luongkhum ang hi a nih.

¹⁰ Ka hmangaitak ta chu ka na, Chun, a châk zâwng khawm keia tieng a nih.

¹¹ Hung rawh, ka hmangaitak, phûlah fe suok ei ta, Khuoahai khin riek ei tih.

¹² Grêp huonahai chun zîngkâr fêng ei ta, Grêphruihai chu a kumûm tahin, a pârhai chu a pâr ta am, Theibufaihai khawm chu a pâr ta am ti en ei tih; Chutaka chun ka hmangaina chu pêng ka ti che.

¹³ Zâwldiai chun a riminhnik a suksuok a, Chun, ei kawtkhâr bula chun theira hlutaktakhai chi tinrêng, A hlui le a thar a um ṭeu a, Chuong chu i ta dinga ka siekhâwl a nih, aw ka hmangaitak.