HLAHAI HLA 2 - Pathien Lekhabu Inthieng (BSI)

¹ Sharon rose pâr, Phairuom lili ka nih.

Tlangvâl

² Hling laia lili ang hi A nih ka hmangaitak chu, nunghâkhai laia chun.

Nunghâk

³ Ramhnuoi thinghai laia apple thing ang el A nih ka hmangaitak chu, tlangvâlhai laia chun. Inhawi titakin a hlima chun ka ṭhung a, A ra chu ka baua chun a thlum a nih.

⁴ Bu fâkna ina chun a mi ṭhuoi a, Ka chunga a puonzâr chu hmangaina a nih.

⁵ Grêp ra ṭâwl bâwrhai le chun mîn umtir la Apple chun mi sukhlim rawh. Hmangainain ka na si a.

⁶ A kut vawitieng chu ka lu hnuoiah a um a, A kut changtieng chun a mi kuo a.

⁷ Aw Jerusalem naunuhai, ka ngên cheu, Phûla sazukpuihai le sakhihaiin, Ka hmangai chu sukṭhangin suktho naw ro, Ama a nuom hmakhat chun.

Nunghâk

⁸ Ka hmangaitak râwl chu, ngai ta, a hung ie, Tlânghai chunga hung inchâwmin, muolhai chunga hung inhnelin.

⁹ Ka hmangaitak chu sakhi amanih, sazuk la amanih ang a na, Ngai ta, ei bang phênah a ngîr zing. A hung bi khu tukvera chun, Zâwngdaikal âwngah ân lang.

¹⁰ Ka hmangaitak chun a hril a, ka kuomah, “Ka hmangai, ka enchimlo, tho la, hung rawh.

Tlangvâl

¹¹ En ta, phalbi a liem ta a, Raw sûr khawm ân khêl ta a, a fe liem tah;

¹² Hnuoi chunga chun pârhai an hung inlang a, Vatehai hlasak hun a hung tlung ta a, Ei ramah vaṭhu râwl chu hriet a ni tah.

¹³ Theichang thinghai chun ra a hung insuo a; Grêp hruihai khawm chu a kumûm ta a, An riminhnik chu an tirsuok a, Tho la, ka hmangai, ka hmêlṭha, hung rawh,” tiin.

¹⁴ Aw ka vaṭhu, lungpui kawi kârahai chun chêng a, Ṭênbaram kuokârhaia um, I hmêl mîn hmutir la, i râwl mîn hriettir rawh; I râwl chu ân nêm a, i hmêl hlak ngaino a bei si a.

¹⁵ Sihalhai, sihal chînhai chu mi manpêk la, Grêp huon suksetuhai chu, Ei grêp huon chu a pâr lai tak a ni si a.

¹⁶ Ka hmangaitak chu ka ta a na, kei khawm a ta ka nih; Ama chun a ran ruol chu lilihai lai chun ân tlattir hlak.

¹⁷ Sûnni chu a hung dei a, hlimhai chu a fe hmang chenin, Ka hmangaitak, kîr la, sakhi amanih, Sazuk lâ amanih ang ni rawh, Bether tlâng chunga chun.