HEBRAIHAI 8 - Pathien Lekhabu Inthieng (BSI)

Isu thuthlung ṭha lem Thiempu Laltak

¹ Chuongchun, ei thu hrilhai laia a pawimaw tak chu hi hi a nih: Chuong ang, thiempu Laltak, vânahai khin Ropuitak lalṭhungpha chang tienga hang ṭhung chu ei nei a nih;

² Hmun Inthieng le biekbûk taktak, mihriem ibâwl ni lova, Lalpa ibâwl lema rawngbâwltu chu.

³ Thiempu Laltak taphawthai chu thilpêk le inthawinahai inhlân dinga ruot an ni si a; chuongchun, hi Thiempu Laltak khawm hin ieng amani bêk inhlân ding nei a ngai a nih.

⁴ Hnuoia hin hung um sien chu Thiempu hrim ni naw tawp a tih; Dân thu ang peia thilpêk inhlântuhai lo um sa an um leiin.

⁵ Chuonghai chun vân thilhai chu a lim le a hlim rawng an bâwl hlak a, Mosiein biekbûk a bâwl ding laia, “Tlânga enkhi ding i kuoma inentira um ang tak khan, iengkim siem dingin fimkhur rawh,” tia Pathienin a hril ang khan.

⁶ Tu ruok hin chu thuthlung ṭha nâwkzuol palai a nizie ang peiin rawngbâwl sin ṭha lem a lo chang ta a, chu thuthlung chu thutiem ṭha lem chungahai siem a nih.

⁷ Chu thuthlung hmasa chu demna um lo lo ni sien chu, a pahnina ta ding chun hmun a zawng naw ding bah.

⁸ Anni demin hieng hi a hril a nih: “Ngai ta, nihai a hung tlung ding a ni tah, Lalpain a tih, Chuong niahai chun Israel sûnghai le, Juda sûnghai lai chun thuthlung thar siem ka ta,

⁹ An thlatuhai Aigupta rama ṭhuoi suok dinga, An kuta ka chel nia, Ka thuthlung ang kha ni lovin; Ka thuthlunga chun an um zing si naw a, Chuongchun, anni chu ka ngaisak ta naw a nih, Lalpain a tih.

¹⁰ Chuong ni hnunga chun Israel sûnghai kuoma Thu ka thlung ding chu hieng hi a nih, Lalpain a tih; An lungrilah ka thupêkhai sieng ka ta, An lungrilah ziek bawk ka ta; Chun, anni ta dingin Pathien nîng ka ta, Keia ta dingin anni chu ka mihai ni bawk an tih:

¹¹ Chun, mi tinin, ‘Lalpa chu hre rawh,’ tiin Mâni tuolbâwm le, Mâni unau inchûktir ta naw ni hai a, A chîn taka inthawkin a lien tak chenin, An rêngin an mi hriet seng ta ding leiin.

¹² An bawsietnaahai zângai ka ta, An suolhai khawm hre zing ta naw ning,” tiin.

¹³ “Thuthlung thar,” tiin a hril lei khan a hmasa chu a sukhlui tah a nih. Chuongchun, hung hluia hung upa ta chu a bo vâng vâng ta a nih.