HEBRAIHAI 3 - Pathien Lekhabu Inthieng (BSI)

Isu chu Mosie nêkin a chunghnung lem

¹ Chuongchun, unau inthieng vân kona chang vehai, ei thuringa Tirko le Thiempu Laltak, Isu chu ngaituo ro;

² Pathien sûngkuo po po laiah Mosie a ringum ang bawk khan, Ama chu a ruottu kuoma chun ring a um a nih.

³ Sûng khata a puipa chu a sûnghai nêkin an chawimawi ang ngeiin, Ama chu Mosie nêkin ropuina nasa lem hmu tlâka ruot a ni si a.

⁴ Sûng tin hin a puipa tu amanih bêk an nei seng hlak a, iengkima a puipa ruok chu Pathien a nih.

⁵ Chun, chu hnunga thu la hril dinghai inhriettirna dingin, Mosie chu Pathien sûnghai po po laia rawngbâwltua chun ring a um ngei a;

⁶ Krista ruok chu Pathien sûnghai chungah Naupaah ring a um a nih. A sûnghai chu eini hi ei nih, a tâwp chenin ei huoina le, ei beiseina suongum hi dettaka ei chel phawt chun.

Lungril sukngar lo ding thu le ringtuhai châwlna

⁷ Chuongchun, Thlarau Inthieng hril ang bawkin, “Vawisûn hin a râwl in hriet chun,

⁸ Thlalêra thlêmna nia, An suknuor lai ang khan, In lungril sukngar naw ro;

⁹ Chutaka chun in thlâtuhai chun An mi fiein an mi thlêm a, Kum sâwmli sûnga Ka thilthawhai an hmu a;

¹⁰ Chuongchun, chu thlâhai chunga chun ka lungni naw a, ‘An lungrilin an ngai suol rawp hlak a, Ka lampuihai khawm an hriet nawh,’ ka ti a,

¹¹ Ka lungsena kân khâm ang khan, Ka châwlnaa chun lût naw nihai,” tiin.

¹² Unauhai, fimkhur ro, chuong naw chun, Pathien hring chu bânsan dingin nangni laiah tu sûnga khawm awi nawna lungril suol hung um rawi a tih.

¹³ “Vawisûn,” an ti sûng hin ni tinin infui tuo lem ro; chuong naw chun, nangni laia mi tûkhawm hi suol hlêmnaa sukngarin um rawi in tih.

¹⁴ Krista changtuhai ei lo ni ta si a, ei ring san phutna kha a tâwp chena dettaka ei chel tlat phawt chun,

¹⁵ “Vawisûn hin a râwl in hriet chun, An suknuor lai ang khan, In lungril sukngar naw ro,” an ti sûng po hin.

¹⁶ Anleh, tuhai am an na hre zing sia suknuor kha? Aigupta rama inthawka Mosie ṭhuoia suok po pohai kha an ni naw am a nih?

¹⁷ Chun, tuhai chung âm a na kum sâwmli sûng a lungni naw kha? Suksuoltu, an ruong thlalêra tlu tahai chunga khan a ni naw am a nih?

¹⁸ Chun, thuawi nawhai kuoma chau naw chun tu kuom âm a châwlnaa lût naw dingin inkhâmin a tiem a?

¹⁹ Chuongchun, ring nâwna leiin an lût thei ta nawh ti ei hriet a nih.