HEBRAIHAI 13 - Pathien Lekhabu Inthieng (BSI)

Pathien mithmua rawngbâwlna lâwmum

¹ Unau inhmangaina hi um pei raw se.

² Mikhuolhai chunga hmangai insuo theinghil naw ro; chuong anga thawin mi ṭhenkhatin hre lovin vântirkohai an lo intlungtir si a.

³ Intânghai chu anni le khuopa um ve angin hre zing unla; rinum tuorhai chu taksaa um ve bawk in ni leiin hre zing ro.

⁴ Inneina hi mi po poin inzâ hai sienla, nupa khum khawm sukpawrche lovin um raw se; inditna suola tluhai le uirehai chu Pathienin an chungthu a ngaituo ding a ni si a.

⁵ In lungril putzie chu tangka ngainatna ṭhang naw ni raw se, in thil nei sunhaia chun lungawi ro; ama ngeiin, “Iengtika khawm thlâthlam naw tawp ka ti che a, mâksan ngai naw bawk ka ti che,” a ti si a.

⁶ Chuongchun, huoitakin; “Lalpa chu a mi ṭhangpuitu a nih, Ṭi naw ning; Mihriemin ieng am mi law thei an ta?” ei ti hlak a nih.

⁷ In hotu, Pathien thu lo hriltuhai cheu chu, hre zing unla, an um dâna thil suok chu ngaituoin an ring dân inchûk ro.

⁸ Isu Krista chu zâni leh, vawisûn leh kumkhuo khawmin a pângngaiin um rawp a tih.

⁹ Inchûktirna tinrêng le inchûktirna maktak lên hmangin um naw ro; lungril hi lunginsietnaa sukdet chu a ṭha si a, fâk dinghaia sukdeta um lovin, chuong ang kawng lungkhamhai chun chuonga chun ṭhathnemna an hmu chuong nawh.

¹⁰ Eini chun maichâm ei nei a, chutaka chun biekbûk rawngbâwltuhai chun an fâk ding a ni nawh.

¹¹ Ran, a thisen Thiempu Laltakin Hmun Inthienga suol ta dinga inhlân dinga a lûtpui hlak ruonghai khawhnâwmah an raw hlak si a.

¹² Chuongchun, Isu khawmin ama thisen ngeia mihai a sukthieng theina dingin, kul kawtkhâr puotieng chun a lo tuor ta a.

¹³ Chuongchun, ama an hmusitna chu phurin khawhnâwmah a kuom tieng fe suok vêng ei tiu.

¹⁴ Hitaka hin khaw hmun hlun ei nei si naw a, khuo la hung um ding chu ei zawng lem a nih.

¹⁵ Chuongchun, ama zâra chun inpâka inthawina hi Pathien kuomah inhlân rawp ei tiu; chu chu a hming ṭanna hmûr rahai chu a nih.

¹⁶ Nisienlakhawm, thil sukṭhat le tiktlai hi theinghil naw ro; chuong ang inthawina chunga chun Pathien a lungni bêk bêk si a.

¹⁷ In hotuhai thu awi unla, an thu thuin um ro; chanchin hril ding an ni leiin, lungngai puma hril lova, hlim puma an hril theina dingin, in thlarau an vêng pêk hlak cheu a nih; lungngai puma hril chu in ta dingin a pawi ding a ni si a.

¹⁸ Kan ta dingin mi ṭawngṭaipêk ro, iengkimah feltaka um tumin, sie le ṭha hrietna inthiengtak kan nei ti indiktakin kan inhriet si a.

¹⁹ Chun, in kuoma inhmaw deua tir nâwka ka um theina dingin, chu chu thaw dingin ka ngên nâwkzuol sau cheu a nih.

Malsâwmpêkna le inthlâna

²⁰ Chun, berâm Vêngtu ropuitak, ei Lalpa Isu chu, chatuona thuthlungna thisen zâra mithi laia inthawka ṭhuoi suok nâwktu inremna Pathien khan,

²¹ a mithmua a lâwm zâwng ang taphawt Isu Krista zârah keinia thâwin, a dit zâwng thaw dingin thil ṭha tinrêng kawngah sukfamkim raw se cheu; Isu Krista kuoma chun ropuina chatuonin um raw se. Amen.

²² Nisienlakhawm, unauhai, ka ngên cheu, infuina thu hi ngai thei hrâm ro; in kuomah thu tlâwmtê ka ziek si a.

²³ Ei unaupa Timothe kha an insuoktir tah ti lo hre ve ro, a hung inhma deu chun, ama leh hung hmûng kan ti cheu.

²⁴ In hotuhai po po le mi inthienghai po po kha chibai mi bûkpêk ro. Itali rama mihai hin chibai an bûk cheu.

²⁵ In rênga kuomah lunginsietna um raw se. Amen.