HEBRAIHAI 11 - Pathien Lekhabu Inthieng (BSI)

Ringnaa huoisenhai

¹ Chun, ringna hi thil beiseihai um ngeia hrietna, thil hmu lohai hrietchiengna a nih.

² Chutaka chun upahai khan inpâk an hlaw si a.

³ Ringnain khawvêlhai hi Pathien thua siem fel diem a ni ta ti ei hriet, chuongchun, thil hmu theihai hi thil inlang theihaia siem a ni nawh.

⁴ Ringnain Abel chun Kaina nêkin inthâwina ṭha lem Pathien kuomah ân hlân a, chu lei chun mi fel a nih ti inhriettirna a hlaw a, Pathienin a thilpêkhai kawnga chun thu ân hriettir a, chun, chu ringna lei chun ama chun thi ta hnungin thu a la hril ta rawp a nih.

⁵ Ringnain Enok kha thina hre lo dinga lâk hmangin a lo um a. Chun, Pathienin a lâk hmang ta leiin hmu thei a ni ta naw a. Lâk hmanga a um hmain Pathien lâwm zâwng mi a ni ti inhriettir a ni ta hrim a.

⁶ Nisienlakhawm, ringna naw chun ama lâwm zâwng mi ni ruol a ni nawh; Pathien kuoma hung chun ama chu a um ti le, a zawngtuhai kuomah lâwmman pe hmang a nih, ti ring ding a nih.

⁷ Ringnain Noa chu thil la hung inlang lohai kawng thuah Pathien hrila lo umin Pathien ṭidêkin, ama sûngkuo sandamna dingin lawng a tuk a; chu chun khawvêl chu thiemnaw ân changtir ta a, ringna leia felna um ro chu hluotu a lo ni ta a.

⁸ Ringnain Abraham chu koa a um lai khan, a rohluo ding hmuna lût dingin fe suok thu chu a pawm ta a; chun, a fena ding tieng khawm hre lovin a fe suok ta a.

⁹ Ringnain ram tiema khan mi rama châm ang elin a lo châm ta zing a, thutiem hmunkhat, ro a ihluopui ding Isak le Jakob hai angin puon inahai a lo um a;

¹⁰ khuo, lungphûmhai nei mi, Pathien ibâwl le siem chu a nghâk zing leiin.

¹¹ Ringnain Sara ngei khawmin, a tiemtu chu ringuma a ruot leiin tar ta hnungin chi pai theina a hmu a.

¹² Chuongchun, pasal pakhat, mithi ang el ni tahnunga inthawkin, vâna arasihai anga tam, tuisuoriet panga phaiphin anga tiem sêng naw an hung suok ta a.

¹³ Chuong po po chu ringna neiin an thi ta a, thiltiemhai chu chang lovin; nisienlakhawm, chuong chu hlataka inthawka hmuin chibai an lo bûk ta a, hnuoia hin mikhuol le khuolfe el an ni ti an inhriettir ta bawk a.

¹⁴ Chuong ang thu hriltuhai chun anni ram ding an zawng ti a suklang si a.

¹⁵ Chun, an suokna ram chu lungkham hai sien chu fena remchâng an hmu ngei ta ding a nih.

¹⁶ Nisienlakhawm, tuhin chu ram ṭha nâwkzuol châk an na, chu chu vâna um a nih. Chuongchun, Pathienin an Pathien tia um chu ân zak nawh, an ta dingin khuo chen a lo buotsaipêk ta si a.

¹⁷ Ringnain Abraham chu fiea a um khan Isak ân hlân a; anih, thutiemhai lâwmtaka changtu chun, a naupa khât nei sun chu ân hlân a,

¹⁸ “Isaka hin i thlahai tîng an tih,” a ti ang ngei khan;

¹⁹ Pathienin mithi laia inthawkin a keitho thei ti hrein chutaka chun thi ta hnung keitho angin a hmu nâwk ta ngei bawk a.

²⁰ Ringnain Isak chun thil la hung tlung dinghai thuah Jakob le Esau mal a sâwmpêk a.

²¹ Ringnain Jakob chun, a thi ding lai khan, Josef nauhai chu mal a sâwm ve ve a; a hmawl hmawr ring ringsanin Pathien a biek bawk a.

²² Ringnain Josef chun, a thi a hung hnai khan, Israel mihai suok ding thu a hril a, a ruong vui dân ding chungchângah thu ân cha bawk a.

²³ Ringnain Mosie a pieng lai khan, nautê hmêlṭha tak a ni leiin, thla thum sûng a nu le pa thuphmangin a um a; lal thupêk khawm an ṭi nawh.

²⁴ Ringnain Mosie chun, a hung puitling hnung khan, Pharao naunu naupaa inbûk chu a nuom naw a.

²⁵ Sâwt nawtê kâr suol inhawina hlimpui nêk chun Pathien mihai le suknawmnat tuor a thlang ta lem a;

²⁶ Krista an hmusitna chu Aigupta ram rohai nêk chun sum ropui lemah a ruot a, lâwmman pêk ding chu a thlîr hlak leiin.

²⁷ Ringnain lal lunginsenna chu ṭi lovin Aigupta ram a mâksan a, hmu thei naw Pathien chu a hmu leiin a tuor fan fan a nih.

²⁸ Ringnain Fekân Ruoiṭhe le thisen the kha a siem a, nau lutir sukbohmangtu chun anni a tâwk nâwna dingin.

²⁹ Ringnain khawmuola fe angin Tuipui Sena khan an fe kai a; Aiguptahaiin chu chu thaw an tum ve a, lem zoin an um ta a.

³⁰ Ringnain Jeriko kul kha ni sari an inhuol hnungin a chim ta a.

³¹ Ringnain Rahab nawchizawr kha awi nawhai lai a bohmang ve ta naw a, enthlatuhai chu tlangtaka a lâwm leiin.

³² Chun, ieng am la hril rawp ka ta? Gideon thu dâm, Barak thu dâm, Samson thu dâm, Jephtha thu dâm, David thu dâm, Samuel thu dâm, zâwlneihai thu dâm hril lang hunin mi dai si naw ni a.

³³ Chuonghai chun ringnain ramhai an lâk a, thil fel an thaw a, thutiemhai an chang a, sakeibaknei khâkhai an sukchîp a, mei thilthawtheina an sukmit a, kâwlhnâm ngei chenin an pumpel a.

³⁴ Hrât nawnaa inthawka hrâttaka siemin an um a, indonaa chun mi hrât khawkhêng an lo na, hnam dang indo pâwlhai an intlânsiettir a.

³⁵ Nuhmeihaiin an mithihai tho nâwk an hmu a, mi danghai khawm sawisakin an um a, thonâwkna ṭha nâwkzuol an chang theina dingin san suok an nuom nawh.

³⁶ Mi dang khawmin suknawmnat le vuokhai an tuor a, anih, chu naw khawm chu kawlbun le intângna ina khum dâm an tuok bawk a,

³⁷ lunga dêngin an um a, thingâtnaa ât bawngin an um a, thlêmna an tuok a, kâwlhnâma sât hlumin an um a, berâm vun le kêl vun silin an invai a; rimsitakin, rinumtakin, suknawmnatin an um a.

³⁸ Chuonghai ta ding chun khawvêl hi umna tlâk a ni nawh. Thlalêra dâm, tlânga dâm, pûka dâm, khura dâm an invâk an invâk hlak a.

³⁹ Chun chuonghai po po chun an ringna leiin inpâk an lo hlawh a, thiltiem chu an chang nawh.

⁴⁰ Eini ṭhang lova, anni chu sukfamkima an um nawna dingin Pathienin eini kawng thuah thil ieng amanih ṭha nâwkzuol a buotsai ta leiin.