HABAKKUK 2 - Pathien Lekhabu Inthieng (BSI)

Habakkuk kuoma Pathien dawnna

¹ Ka vêngbûk chunga chun ngîr ka ta, ka kulbîng chunga chun um ka ta, kâwk ka ni phaha ka dawnna ding le ka kuoma ieng am a hril ding ti hmu dingin nghâk zing ka tih.

² Chun, Lalpa chun a mi hung dawn a, “Inlârna thu chu ziek la, Lungphêkhai chunga chun fietak elin, A tiemtu chun tlân puma a tiem theina dingin.

³ Inlârna hi hun ruota hung tlung ding a la na, A tâwp chu a hnai mêk zing a, inkhêl bawk naw nih; A muong khawma nghâk zing la, A hung tlung ngei ding a ni leiin,” tiin.

⁴ En ta u, a lungril chu a chapo a, amaa chun ân dik naw a nih, Mi fel ruok chu a ringna lei chun hring a tih.

⁵ Anih, chu nawa khawm uoin he chu bawsetu, Mi chapo, a ina um ngailo chu a nih; Ama chun a châkna chu hremhmun angin a suklien a, Ama chu thina ang a na, suktlai ruol a ni nawh. Chi po pohai chu a kuoma chun a kei khâwmin, Hnam po pohai chu a kuomah a lâk khâwm lem a nih.

Mi fel nawhai chungrikna

⁶ Hieng po pohai hin ama chunga tekhina hung hrilin, ama chunga hrilinsîm thu hrilin, “Ama ta ni si lova insukpung chu ieng chen am nei a ta? Mâni le mâni inrûkthila insukpungtu chung chu a va rik de!” an ti naw dîm a nih?

⁷ Anni chun thâwklekhatin nang hung sêtu ding che chu suktho an ta, Hmatieng hnungtienga nawrtu ding chu hung sukharin, An ta dinga râllâk thil i ni el naw ding maw?

⁸ Hnam tamtak i suksiet ta leiin, mihriem thisen le Ram le khawpui le a sûnga chênghai chunga Mihriem thisen le inpâwngnêkna thil lo thaw ta po po lei khan, Nang khawm chi a la um sunhai po po chun sukse vêng an ti che.

⁹ Mi suol kuta inthawka sansuok a ni theina dinga, A bû insângtaka a sep theina dinga, A insûng ta dinga hlâwkna indik naw latu chu a chung a rik ie!

¹⁰ Mi tamtak chu sât thlain, I insûng ta ding chun inzakna în tlun ta a; I hringna chung ngeia khawm thil i suksuol ta a nih.

¹¹ Banga inthawk chun lung chuhung khêksuok a ta, Thing laia tlungpûm chun a hung dawn ding a ni si a.

¹² Khuo chu thisena indin a, Khawpui chu khawhlonaa inngîrtu chung chu a rik ie!

¹³ En ta u, hnamhai chu teploah anni an insuklungkham a, Chi tinhai chun mei ta dinga sin an inrim hi, Sipaihai Lalpaa inthawk ni lo am a nih?

¹⁴ tuipui chu tuihaiin ân khum angin, Lalpa ropuina hrietna chun hnuoi hi a suksip ding a ni si a.

¹⁵ A tuolbâwm kuoma dâwn ding pe a, Chutaka chun a tûr chu pawl a, An saruokna chu a hmu theina dinga Sukruitu chung chu a rik ie!

¹⁶ Ropuina dinga inzaknaa suksip i ni ta a, Nang khawma dâwn la, saruok chu ni el rawh! Lalpa kut changtienga no chu i kuomah pêk nîng a ta, I ropuina chunga chun inzakna tirdakum chu um a tih!

¹⁷ Lebanon chunga inpâwngnêkna le, Ramsahai chunga suksietna, anni sukṭi hlakna chun, Ram le khawpui le a sûnga chênghai chunga le, Mihriemhai thisen le thil lo thaw ta po po lei chun, Nang chu ân khum ding che a nih.

¹⁸ Milem a kera ker, a siemtuin a iker chun Ieng am ṭangkaina a nei? Milim a sunga sung le khêlhlip inchûktirtu, Milim ṭawng thei nawhai siem a, A siemtuin ama sinthaw nâk nâk a ringzoa hin, Ṭangkâina ieng am a um a?

¹⁹ Thing kuoma chun, “Har rawh,” ti a, Lung kuoma chun, “Tho rawh,” titu chu a chung a rik ie! Hi hin ân chûktir ding am a nih? En ta u, rângkachak le tangkaruo inluon khum a na, Amaa hin inthuokna hrim a um dêr nawh.

²⁰ Lalpa ruok chu a biekin inthienga chun a um a, Leihnuoi po po chu a hmaah to ṭhiep raw se.