FESUOKNA 9 - Pathien Lekhabu Inthieng (BSI)

Ran hripuiin ân lêng

¹ Chun, Lalpa chun Mosie kuomah, “Pharao kuomah fe la, ‘Lalpa, Hebraihai Pathien chun hieng hin a tih: ka rawng an bâwl theina dingin ka mihai infetir rawh.

² Anni chu infetir i phal naw a, i khuokhir zing chun,

³ ngai rawh, loa i ran ruol umhai, sakawrhai, sabengtunghai, sanghâwngseihai, bâwng ruolhai le, berâm ruolhai chungah Lalpa kut chu hri râpthlâktak leh tlâng a tih.

⁴ Chun, Lalpa chun, Aigupta mihai le Israelhai ran ruolhai thlier a ta, Israelhai ta taphawt chu iengkhawm thi naw tawp an tih, a tih,’ tiin hril rawh,” a ti a.

⁵ Lalpa chun hun bîk a ruot a, “Hi thil hi, hi rama hin zîngah Lalpain thâwng a tih,” a ti a.

⁶ A zînga chun chu thil chu Lalpa chun a thaw ta a. Aigupta mihai ran ruol po po chu an thi vawng a, Israel mihai ran ruol ruok chu pakhat khawm an thi naw a.

⁷ Pharao chun mi a tir a, Israel mihai ran ruol chu pakhat khawm an thi dêr nawh ti a hriet a. Nisienlakhawm, Pharao lungril chu a ngar a, mihai chu ân fetir chuong nawh.

Khuoihli hripuiin ân lêng

⁸ Lalpa chun Mosie le Aron kuoma chun, “Thuka vut kut sipin chawi unla, Pharao mithmu ngeiah Mosiein vân tieng vawr raw se.

⁹ Chun, Aigupta ram chung po poah pilvut indi takah inchang a ta, Aigupta ram sûng po povah mihriem le ran chungah khuoihli invûngin inchang a tih,” a ti a.

¹⁰ Chun, thuka vut chu an lâk a, Pharao hmaa chun an ngir a; Mosie chun vân tieng chun a vawr ta a, chuongchun, mihriem le ran chunga chun khuoihli invûngah ân chang ta a.

¹¹ Chun, khuoihlihai lei chun aisânthiemhai chu Mosie hmaa chun an ngîr thei ta naw a; chu khuoihli chu Aigupta mihai po po le aisânthiemhai chunga khawm a um seng si a.

¹² Chun, Lalpain Pharao lungril chu a sukngar a, Lalpain Mosie kuoma a hril ta angin an thu hril chu a ngai chuong naw a.

Riel hripuiin ân lêng

¹³ Lalpa chun Mosie kuomah, “Zîngkâr inhmatakin tho la, Pharao hmaah ngîr la, a kuomah, ‘Hebraihai Pathien Lalpa chun hieng hin a tih: ka rawng an bâwl theina dingin ka mihai infetir rawh.

¹⁴ Hnuoi chung po poah keima ang tukhawm an um nawh ti i hriet theina dingin, tuta ṭum hin chu, i mihai le i siehlawhai le nangma chunga ngei ka hri po po ka hung tir ding a ni si a.

¹⁵ Tuhin ka kut inlet ka ta, i mihai le nang ngei chu hripuiin hrem ka ti cheu a, hnuoia inthawka sât thlâk ni tâng i tih:

¹⁶ nisienlakhawm, hi thilthaw kawng ngeihaia hin ka thilthawtheinahai chu nangmaa inentir a ni theina ding le khawvêl po poa ka hming chu puongdar a ni theina dingin ka la dawmngir zing che a ni hi.

¹⁷ Ka mihai chunga hin nang le nang inchawimawiin, anni chu i lân fetir naw rawp ding a ni maw?

¹⁸ Ngai rawh, zîngah tu pha ngei hin riel nasa râpthlâk insûrtir ka ta; chuong ang hrim hrim chu Aiguptaah, hi ram um hlima inthawk tu chen hin a la um ngai dêr nawh.

¹⁹ Chuleiin, tuhin mi tir la, i ran ruol le loa i thil nei po po chu inhulah hung la lût vak raw hai se; mi tin le ran loa um taphawthai, ina hung lâk lût nawhai chungah riel chu a hung sûr ding a ni si a, an thi vawng ding a nih, a tih,’ tiin hril rawh,” a ti a.

²⁰ Pharao siehlawhai laia Lalpa thu ṭitu chun a siehlawhai le a ran ruol chu inahai ân tlân lûttir a;

²¹ Lalpa thu ngaisaknawtu ruok chun a siehlawhai le ran ruol chu loah ân umtir a.

²² Chun, Lalpain Mosie kuomah, “Aigupta ram sûng po poa, mihriem le ran le loa thlai tinrêng chungah, Aigupta ram po poah riel nasatak a hung sûr theina dingin, vân tieng i kut phar rawh,” a ti a.

²³ Chun, Mosie chun a hmawl chu vân tieng ân let a; chuongchun, Lalpa chun vâninrûm le riel chu a hung tir ta a, hnuoia chun mei dâm a zuk tla a, Lalpa chun Aigupta ram chunga chun riel ân sûrtir ta a.

²⁴ Chuongchun, riel, ṭêktla le riel inpawl, râpthlâktak el, Aigupta ram po poah, hnam a hung ni chena inthawka la hmu ngai dêr lo chu a hung tlung ta a.

²⁵ Aigupta ram po poa, loa thil um taphawt chu mihriem le ran khawm a dêng hlum ta vawng a; riel chun loa thlaihna tinrêng chu a dêng hlumin, rama thinghai khawm chu a dêng thliek bawk a.

²⁶ Israel mihai chêngna Gosen rama bak chun riel chu a tla ve naw a.

²⁷ Chun, Pharao chun mi a tir a, Aron le Mosie chu ân kotir a, an kuomah, “Tuta ṭum chu ka lo suol takzet a nih, ka mihai le kei chu kan khawhlo a, Lalpa ruok chu a fel a nih.

²⁸ Hun ta raw se, riel le vâninrûm ri nasatakhai hi a bona dingin Lalpa chu hni la, chuongchun, infetir ka ti cheu, um ta hrim hrim naw ti niu,” a ti a.

²⁹ Mosie chun a kuomah, “Khawpui hi ka suoksan phingleh, Lalpa tieng ka kut phar ka ta, hnuoi hi Lalpa ta a nih ti i hriet theina dingin, vâninrûmhai chu mâng a ta; riel hrim khawm um nâwk ta dêr naw nih.

³⁰ Nisienlakhawm, nang le i siehlawhai chun, Lalpa Pathien chu la ṭi chuong naw ti niu ti ka hriet a nih,” a ti a.

³¹ Buṭei chu a vui lai a ni a, ziza khawm chu a pâr lai a ni a, buṭei le ziza chu an se vawng a.

³² Bupui le mîm ruok chu dêng siet an ni ve naw a, an puitling inhnu leiin.

³³ Mosie chu Pharao kuoma inthawka khawpui puoah a suok chun, Lalpa kuom tieng a kut chu a phar ta a; chun, vâninrûmhai le riel chu a ma ta a, hnuoi chunga chun ruo khawm a sûr ta naw a.

³⁴ Pharao chun ruo le riel le vâninrûmhai chu a ma tah ti a hmu chun, a la suksuol ta rawp a, ama le a siehlawhai khawm chun an lungril chu an la sukngar ta rawp a.

³⁵ Pharao lungril chu sukngarin a um a, Mosie baua Lalpain a lo hril ta angin, ama chun Israel mihai chu ân fetir nuom naw a.