FESUOKNA 8 - Pathien Lekhabu Inthieng (BSI)

Uṭawk hripuiin ân lêng

¹ Chun, Lalpain Mosie kuomah, “Pharao kuomah va fe la, a kuomah, ‘Hieng hin Lalpain a tih; Ka rawng an bâwl theina dingin ka mihai infetir rawh.

² Anni infetir i phal naw chun, ngai rawh, i ram sûng po po uṭawkhaiin ka hung hrem ding a nih.

³ Vadung chu uṭawkhaiin sip an ta, chuong chu hung suok an ta, i in sûnga dâm, i khum pindan sûnga dâm, i khum chunga dâm, i siehlawhai in sûnga dâm, i mihai chunga dâm, i thuk sûnga dâm, i bei siemna thuk sûnga dâm hung lût an tih.

⁴ Chuong uṭawkhai chu nanga chunga le i mihai chunga le, i siehlawhai chungah hung ṭuong seng an tih,’ tiin hril rawh,” a ti a.

⁵ Chun, Lalpain Mosie kuomah, “Aron kuoma chun, ‘Vadunghai, tuiluongnahai le dîlhai chungah i kuta i hmawl chu inlet la,Aigupta ram chungah uṭawkhai hung suok raw hai se,’ ti rawh,” a ta.

⁶ Chun, Aron chun Aiguptaa tuihai chunga chun a bân a phar a, uṭawkhai chu an hung suok a, Aigupta ram chu an dâp ta vawng a.

⁷ Chun, aisânthiemhai khawm chun an dawi hmangin chuong ang tak chun an thaw a, Aigupta ram chunga chun uṭawkhai chu an hung suok ve a.

⁸ Pharao chun Mosie le Aron a ko a, “Lalpa chu ngên ro, ka mihai le ka kuoma inthawkin uṭawkhai hi lahmang sienla; chun, Lalpa kuoma an inthâwi theina dingin mipui chu infetir ka tih,” a ti a.

⁹ Mosie chun Pharao kuomah, “Nangma le i ina uṭawkhai chu sukbohmanga vadunga bak chun um zing dingin i mihai le i siehlawhai le nanga ta dingin iengtik am ka ngên pêk ding cheu lunginsiettakin mi hril rawh,” a ti a.

¹⁰ Ama chun, “Zînga leh,” a ti a. Ama chun, “I thu ang peiin ni raw se: Lalpa kan Pathien ang hi mi tukhawm an um nawh ti i hriet theina dingin.

¹¹ Uṭawkhai chu i mihai le i siehlawhai le i in le nangmaa inthawkin fe hmang an ta, vadunga bak um tâng an tih,” a ti a.

¹² Chun, Mosie le Aron chu Pharao kuoma inthawk chu an fe suok ta a: chun, Mosie chun Pharao chunga uṭawkhai a hung suksuok thua chun Lalpa chu a ko ta a.

¹³ Lalpa chun Mosie thu ang ngei chun a hung thaw a; lohai, khuohai le, inhaia uṭawkhai chu an thi hmang vawng ta a.

¹⁴ A bûm bûmin an inkhâwm a, ram chu a thûkin a thu a.

¹⁵ Nisienlakhawm, Pharao chun chuong chu a bo tah ti a hriet chun, a lungril a sukngar a; Lalpain a lo hril ta ang ngei khan an thu chu a ngai naw a.

Hrik hripuiin ân lêng

¹⁶ Lalpain Mosie kuomah, “Aron kuoma chun, ‘I hmawl kha inlet la, hnuoi chunga pilvut chu vaw rawh, Aigupta ram po poah hrikhai an hung ni theina dingin,’ ti rawh,” a ti a.

¹⁷ Chuong ang tak chun an thaw a, Aron chun a kuta hmawl chu ân let a, hnuoia pilvut chu a vuok a, sa le mihriem chunga chun hrikhai an hung um ta a; Aigupta ram po poa chun pilvut chu hrikin a hung inchang vawng ta a.

¹⁸ Aisânthiemhai chun an dâwi hmangin hrikhai suksuok dingin an thaw ve a, nisienlakhawm, an thei naw a. Chuongchun, sa le mihriem chunga chun hrikhai chu an um ta a.

¹⁹ Aisânthiemhai chun Pharao kuomah, “Hi hi Pathien kutpâr a nih,” an ti a. Pharao lungril ruok chu sukngarin a um a, Lalpain a lo hril ta ang ngei khan, an thu chu a ngai chuong nawh.

Tho hripuiin ân lêng

²⁰ Chun, Lalpa chun Mosie kuomah, “Zîngkâr tho la, Pharao chu tui tienga a fe lai chu lo nghâk la, a kuomah, ‘Lalpain hieng hin a tih, ka rawng an bawl theina dingin ka mihai infetir rawh.

²¹ Chuong ni lova, ka mihai în fetir naw chun nang le i siehlawhai le i mihai chunga le, i in sûnga le, Aigupta mihai inhai le an umna leihnuoi po poa chun tho ruolpui hung tir ka tih.

²² Chu ni chun ka mihai umna Gosen ram chu suktum ka ta, tho ruol hrim um der naw ni hai, hnuoi chunga hin kei Lalpa ka nih ti i hriet theina dingin.

²³ Chuong ang chun i mihai le ka mihai inkârah thlierhranna nei ka tih; chu inchikna chu zîngah hung tlung a tih,’ ti rawh,” a ti a.

²⁴ Chun, Lalpa chun chuong ang chun a hung thaw ta a. Pharao in sûnga le a siehlawhai inhai sûnga chun thohai râpthlâktakin an hung a: chuong thohai lei chun Aigupta ram sung po poah ram chu suksietin a um ta a.

²⁵ Chun, Pharao chun Mosie le Aron chu a ko a, “Fe unla, hi ram sûnga hin in Pathien kuoma chun inthâwi ro,” a ti a.

²⁶ Mosie chun, “Chuong anga thaw chu rem thei naw nih. Kan Pathien Lalpa kuoma kan inthâwinaa chun Aigupta mihai tirdak zâwng inhlân ding kan ni si a. Aigupta mihai tirdak zâwng chu an mithmu ngeia kan inhlân chun lungin an mi dêng naw ding am a nih?

²⁷ Thu a mi pêk angin, thlalêrah ni thum lama hlaah fêng kan ta, Lalpa kan Pathien kuoma chun inthâwi kan tih,” a ti a.

²⁸ Pharao chun, “Lalpa in Pathien kuoma chun thlalêra in inthâwi theina dingin infetir ka ti cheu, amiruokchu, hlatakah fe naw unla, ka ta ding khawmin mi ngênpêk rawh,”a ti a.

²⁹ Mosie chun, “I kuoma inthawkin fe suok ka ta, Pharao le a siehlawhai le a mihaia inthawka, thohai hi zînga inthawka an fe hmangna dingin Lalpa chu hnîng ka tih; amiruokchu, mipuihai chu Lalpa kuoma inthâwi dinga infetir lovin hmusittakin Pharao hin sawisa lep ta naw phawt raw se,” a ti a.

³⁰ Mosie chu Pharao kuoma inthawk chun a suok a, Lalpa chu a ngên ta a.

³¹ Lalpa chun Mosie thu ang pei chun a thaw a; Pharao le a siehlawhai le a mihaia inthawkin thohai chu a lâk hmang vawng a, pakhat khawm a um ta naw a.

³² Hi ṭum khawm hin Pharao chun a lungril a sukngar a, mipui chu ân fetir chuong nâwk naw a.