FESUOKNA 5 - Pathien Lekhabu Inthieng (BSI)

Pharao hmaah Mosie le Aron an ngîr

¹ Chun, chu hnunga chun Mosie le Aron chu an va fe a, Pharao kuomah, “Hieng ang hin Lalpa, Israel Pathien chun a tih, ‘Thlalêra ka kuoma ruoi an ṭhe theina dingin ka mihai chu infetir rawh,’ a tih,” an ti a.

² Pharao chun, “Israelhai infetir dinga a râwl ka ngai ding Lalpa chu tûm a na? Lalpa chu ka hriet ngai naw a, chu nawa khawm, Israelhai chu infetir naw bawk ka tih,” a ti a.

³ Anni chun, “Hebraihai Pathien chun a mîn tuokpui ta a, kan ngên che, Lalpa kan Pathien kuoma inthâwi dingin thlalêra ni thum lam chenah mîn fetir rawh; chuong naw chun kan chungah kâwlhnâmin amanih, hriin amanih tla rawi a tih,” an ti a.

⁴ Aigupta lal chun an kuomah, “Mosie le Aron hin iengtiziea mipuihai hi an sinthawhaia inthawkin inṭhuoihmang am a na? In sin chu va thaw ṭawk ṭawk unla a ni el,” a ti a.

⁵ Pharao bawk chun, “Ngai ta, tuhin hi rama mihai hi an tam ta hle a; an sinhaia inthawk in inchawltir el a!” a ti a.

⁶ Chu ni ma chun mipuihai sinthaw hotuhai le an hotuhai chu Pharao chun thu a pêk a,

⁷ “Kha hma ang khan mipuihai chu ṭêklei siem dingin bupâwl pe ngai ta naw unla, fe hai sienla, an bupâwl ding chu annîn inkhâwm lem raw hai se.

⁸ Chun, kha hmaa ṭêklei an siem zât tho kha siem dingin phût unla, ieng kawng khawmin suktlâwm naw ro: an tha a bo si a; chuleiin annâwm, ‘Mîn fetir la, kan Pathien kuomah mîn thâwitir rawh,’ tia an khêk hi.

⁹ Chuong mihai chunga chun sin rik lem chu innghat ni raw se; inrimtaka an thaw theina dingin; chun, thu teplo mei mei chu ngaisak naw bawk raw hai se,” a ti a.

¹⁰ Chun, mipuihai sinthaw hotuhai le an hotuhai chu an fe suok a, mipuihai kuoma chun, “Pharao chun hieng hin a tih, ‘Bupâwl chu pe naw ning cheu ah.

¹¹ Fe unla, in hmu theina naah va la ro: anachu in sinthaw chu suktlâwm ni chuong naw nih,’ tiin” an ti a.

¹² Chuongchun, mipuihai chu Aigupta ram sûng po poa chun bupâwl aiah bu kûng la khâwm ding chun an indar ta sup sup a.

¹³ Sinthaw hotuhai chu, “Bupâwl umsa laia in sinthawhai, in ni tin sinthawhai ang kha tlingtla ro,” tia nawr sênin ṭul namên lovin an ṭûl a.

¹⁴ Pharao sinthaw hotuhaiin mipui chunga Israel mi, sinthaw hotua an ruothai chu, “Vawisûn le zâni khawm, kha hma anga ṭêklei siema in sinthawhai chu iengdinga in tlingtla naw am a na?” tia suosal le vuokin an um ta a.

¹⁵ Chun, Israel laia sinthaw hotua ruothai chu Pharao kuomah an hung a, an khêk a, “I siehlawhai hi iengdinga hienga i mi thaw am a na?

¹⁶ I siehlawhai hi bupâwl pêk kan ni naw a, kan kuomah, ‘Ṭêklei siem ro,’ an ti si a! Chun, ngai ta, i siehlawhai hi vuokin kan um a; nisienlakhawm, ân diknawna chu nangma mihai ngeiah a ni lem,” an ti a.

¹⁷ Pharao ruok chun, “In tha a bo, in thabo suonlamin, ‘Mîn fe tir la, Lalpa kuomah vân thâwi kan tih’ in ti a nih.

¹⁸ Tuhin fe unla, sin va thaw el ro; bupâwl chu pêk ni hliek naw ti niu a, ṭêklei ruok chu siem ding zât pângngai chu in pêk suok ngei ding a nih,” a ti a.

¹⁹ Israel laia sinthaw hotua ruothai chun, “Ieng kawng khawmin, in ni tin sinthawa ṭêklei siem ding zât chu in suktlâwm ding a ni nawh,” ti hril an ni chun ngîrhmun ṭha nawtaka um an nih ti an inhriet ta a.

²⁰ Pharao ina inthawka an hung suok chun, anni lo nghâk zingtu Mosie le Aron chu an va hmu a,

²¹ an kuomah, “Lalpain en cheuin in chungthu chu rêl raw se, keini mi thatna dinga an kuta kâwlhnâm chawi dingin, Pharao le a siehlawhai mithmuah theidaumah in mi siem ta lei hin,” an ti a.

Mosie ṭawngṭaina

²² Chun, Mosie chu Lalpa kuom tieng a ngha nâwk a, “Lalpa, iengdinga hi mihai chunga hin thil ṭhanaw thaw am i ni a? Iengdinga i mi tir hrim am?

²³ Pharao kuoma i hminga thu hril dinga ka hung chinah, hi mihai chungah tlatsiet a thaw a, nangin i sansuok dêr si naw a,” a ti a.