FESUOKNA 4 - Pathien Lekhabu Inthieng (BSI)

¹ Mosie chun a dawn a, “Nisienlakhawm, ngai ta, kei chu mi ring naw ni hai, ka râwl khawm ngai naw bawk an tih, ‘I kuomah Lalpa ân lâr naw kha,’ an mi ti âwm si a,” a ti a.

² Lalpa chun a kuomah, “Kha i kuta kha ieng am a na?” a ti a. Ama chun “Hmawl,” a ti a.

³ Lalpa chun, “Hnuoi chungah pei thla rawh,” a ti a. Mosie chun hnuoia chun a pei thlâk a, rûlah a hung inchang ta a, Mosie chu a hmaa chun a tlânse ta a.

⁴ Chun, Lalpa chun Mosie kuomah, “I kut khan ban la, a meiah man rawh,” (chun, a kutin a ban a, a chel ta a, a kuta chun hmawl a ni nâwk ta a,)

⁵ “Lalpa, an thlatuhai Pathien, Abraham Pathien, Isak Pathien le Jakob Pathien i kuomah a hung inlâr ti an hriet theina dingin,” a ti a.

⁶ Lalpa chun a kuomah, “I ângsûnga khan i kut sie rawh,” a ti nâwk a. Chun, a ângsûnga chun a kut chu a sie a; chun a lâk suok nâwk chun, ngai ta, a kut chu vûr anga vârin a lo inphâr ta a.

⁷ Lalpa chun, “I kut kha i ângsûngah sie nâwk rawh,” a ti a; chun, a kut chu a ângsûngah a sie nâwk a, ngai ta, a ângsûnga inthawka a lâk suok phing chun a taksa dang ang bawkin a um nâwk ta a.

⁸ Lalpa chun, “Nang ring naw chein, inchikna pakhatna râwl khawm ngai naw hai sien khawm, inchikna nuhnung lem bêk chu ngai ngei an tih.

⁹ Chun hi inchiknahai pahni khawm hi an la ring naw a, i râwl khawm an la ngai naw rawp chun, vadung tui lâng i ta, hnuoi hul chungah buok i tih; chun, vadunga inthawka tui i lâk chu hnuoi hul chunga chun thisen hung nîng a tih,” a ti a.

¹⁰ Mosie chun Lalpa kuomah, “Tuhin le a hma khawmin, i siehlaw kuomah thu i hung hril chena khawm, mi danginnâl ka ni naw a, ṭawng muongtak le danginâwk ka ni si a,” a ti a.

¹¹ Lalpa chun a kuomah, “Mihriem bau chu tuin am a siem a? Tuin am mi chu ṭawngtheilo, nasêt, mitvar le mitdelin a siem? Kei, Lalpa hin ni lo am a nih?

¹² Chuongchun, tuhin fe la, kei i bauah um ka ta, i thuhril ding chu inchûktir ka ti che,” a ti a.

¹³ Ama ruok chun, “Aw Lalpa, ka hni che, mi dang tir lem el rawh,” a ti a.

¹⁴ Mosie chunga chun Lalpa lunginsenna chu a hung zuol ta a, “Levi mi, i unaupa Aron kha a um naw am a nih? Thu hriltheitak a nih ti ka hriet. Ngai rawh, nangma tuok dingin a hung suok mêk a; a hmu pha che chun a lungrilah lâwm a tih.

¹⁵ Ama kuoma chun thu hril i ta, thuhai chu ama bauah sieng i ta: i bau le ama baua chun um ka ta, ieng am in thaw ding chu inchûktir ka ti cheu.

¹⁶ Ama chu i ta dingin mipuihai kuoma thuhriltu nîng a tih; ama chu i ta dingin bau nîng a ta, nang chu a ta dingin Pathien ang nîng i tih.

¹⁷ Hi hmawl hi i kutin chawi pei i ta, chu chun inchiknahai chu thâwng i tih,” a ti a.

Aigupta tieng Mosie a kîr nâwk

¹⁸ Mosie chu a tarpupa Jethro kuomah a kîr nâwk ta a, a kuomah, “Ka hni che hi, mîn fetir la, ka unauhai Aiguptaa umhai kuoma chun mîn kîrtir nâwk la, damin am an um va hmûng ka tih,” a ti a. Jethro chun Mosie kuomah, “Thlamuongtakin fe rawh,” a ti a.

¹⁹ Lalpa chun Midian rama Mosie kuomah, “Fe la, Aiguptaah kîr nâwk rawh; nangma sukhlum tumtuhai po kha an thi ta si a,” a ti a.

²⁰ Mosie chun a naupasalhai le a nuhmei a ṭhuoi a, sabengtung chungah anni ân chuongtir a, Aigupta ramah a kîr nâwk ta a. Mosie chun Pathien hmawl chu a kutin a chawi pei a.

²¹ Lalpa chun Mosie kuomah, “Aiguptaa i kîr nâwk pha, i kuta thilmak ka sie po pohai kha Pharao hmaah thaw ngei i ta; nisienlakhawm, mihai chu ân fetir nawna dingin a lungril chu ka sukngar ding a nih.

²² Chun, nangin Pharao kuoma chun, ‘Hieng hin Lalpa chun a tih; Israel hi ka naupa, ka nau lutîr a nih;

²³ chuleiin, i kuomah, “Ka naupa hi ka rawng a bâwl theina dingin infetir rawh,” ka ti a nih; infetir chu i phal naw chun, ngai rawh, i naupa i nau lutîr ngei chu sukhlum ka tih, ti ka hril che hi a tih,’ tiin i hril ding a nih,” a ti a.

²⁴ Lam kâra an riekna hmuna chun Lalpa chun ân tuokpui a, ama chu that a tum ta a.

²⁵ Zippora chun meitâwklung ngei a lâk a, a naupa serhmawr vun chu a ât thlâk a, Mosie ke chu ân tâwktir a; chun, chu nu chun, “Ka ta dingin moneitu, thisen insuohmang, i ni ngei el hi,” a ti a.

²⁶ Chuongchun, Lalpain Mosie chu ân thla ta a. Chutikle chun a nih chu nu chun “Sertanna lei hin thisen insuohmang moneitu i nih,” a ti chu.

²⁷ Lalpa chun Aron kuomah, “Thlalêrah Mosie tuok dingin fe rawh,” a ti a. Chuongchun, a fe a, Pathien tlânga chun a vân tuokpui a, ama chu a fâwp ta a.

²⁸ Mosie chun Lalpain ama a tirna thuhai po po, le inchikna ama ân kawltirhai po po chu, Aron kuomah a hril ta a.

²⁹ Chun, Mosie le Aron chu an fe ta a, Israel upahai po po chu an ko khâwm a.

³⁰ Aron chun Lalpain Mosie kuoma thu a hril po pohai chu a hril a, mipuihai hmaa chun inchiknahai chu a thaw ta a.

³¹ Mipui chun an ring ta a: Lalpa chun Israel mihai chu a hung sir ta a, an rimsik tuorna chu a hmu tah ti an hriet chun, an luhai an kûn a, chibai an bûk ta a.